Deu 17 | KaaIBT22L | STEP | «Hár qanday kemshiligi bar iri mal yamasa mayda maldı Qudayıńız Jaratqan Iyege arnap qurbanlıq qılmańlar. Qudayıńız Jaratqan Iye bunnan jerkenedi.

‏ Deuteronomy 17

1 «Hár qanday kemshiligi bar iri mal yamasa mayda maldı Qudayıńız Jaratqan Iyege arnap qurbanlıq qılmańlar. Qudayıńız Jaratqan Iye bunnan jerkenedi.

2 Qudayıńız Jaratqan Iyeniń sizlerge berip atırǵan qalalarınıń birinde Onıń názerinde jawız bolǵan isti qılıp, kelisimine qıyanet etetuǵın bir erkek yamasa hayal shıqsa 3 hám buyrıqlarıma qaramastan, basqa qudaylarǵa xızmet etse, sol qudaylarǵa, quyashqa hám ayǵa yamasa basqa da aspan denelerine tabınsa, 4 keyin bul haqqında sizlerge xabar jetse, esitkenlerińizdi jaqsılap tekserińler. Eger de Izrail xalqınıń arasında shınında da sonday jerkenishli is islengeni dálillense, 5 onda sol erkekti yamasa hayaldı qala dárwazasınıń sırtına alıp shıǵıp, tas boran qılıp óltirińler. 6 Degen menen, ólimge húkim etilgen adam eki yamasa úsh adamnıń gúwalıǵı menen óltiriliwi tiyis, biraq bir adamnıń gúwalıǵına tiykarlanıp óltirilmesin. 7 Sol gúna islegen adamǵa birinshi bolıp gúwalar tas ılaqtırsın, sonnan keyin pútkil xalıq tas boran qılsın. Solay etip, arańızdaǵı jawızlıqtı joq qılıńlar.

8 Eger qalańızda abaysızdan yamasa qastan adam óltiriwshilik, huqıq talasıw hám bir-birewge zorlıq qılıw tuwrısındaǵı dawlardı sheshiwińiz qıyın bolsa, Qudayıńız Jaratqan Iyeniń tańlaytuǵın jerine barıńlar. 9 Sol jerde sizler lebiyli ruwxaniyler hám sol waqıtta xızmet etip atırǵan qazılar menen másláhátlesińler. Olar húkim shıǵarıp, óz qararın sizlerge málim qıladı. 10 Jaratqan Iyeniń tańlaǵan jerinen olardıń sizlerge aytatuǵın qararın muqıyatlı túrde orınlańlar. 11 Olar túsindirip bergen nızamdı hám shıǵarǵan húkimdi tolıǵı menen orınlawıńız tiyis. Olar járiyalaǵan qarardan ońǵa da, solǵa da shıǵıp ketpeńler. 12 Kim de kim ózbasımshılıq qılıp, Qudayıńız Jaratqan Iyeniń aldında xızmet etip atırǵan ruwxaniyge hám qazıǵa qulaq salmasa, ol adam óltirilsin. Usılay etip, Izraildan jawızlıqtı joq qılıńlar. 13 Pútkil xalıq bul waqıyanı esitip qorqadı hám jáne ózbasımshılıq qılmaytuǵın boladı».

Patsha haqqında qaǵıydalar

14 «Qudayıńız Jaratqan Iye sizlerge beretuǵın elge barıp, ol jerdi múlik etip, jaylasıp alǵannan keyin: „Átirapımızdaǵı xalıqlar sıyaqlı bizler de ózlerimizge patsha saylayıq“, – dep aytasız. 15 Sonda sizler saylaytuǵın patsha Qudayıńız Jaratqan Iye tárepinen tańlanatuǵın adam bolıwı tiyis. Saylaytuǵın patshańız Izrail xalqınan bolsın. Óz xalqıńızdan bolmaǵan jat jerli adamdı patsha qılıp qoymańlar. 16 Patshanıń kóp atı bolmasın, jáne de at satıp alıw ushın adamlardı Mısırǵa jibermesin. Óytkeni Jaratqan Iye sizlerge: „Ol jerge qaytıp barmańlar“, – degen edi. 17 Saylaytuǵın patshańız kóp hayal almasın, bolmasa, ol Jaratqan Iyeden júz burıp ketedi. Jáne de, ol ózi ushın kóp muǵdarda gúmis hám altın jıynamasın.

18 Ol patshalıq taxtqa otırǵanda, lebiyli ruwxaniyler saqlap qoyǵan usı Nızamnan bir kóshirmeni ózi ushın jazdırıp alsın. 19 Sol Nızamnıń kóshirmesi hámme waqıtta patshanıń qasında bolsın. Patsha onı hár kúni ómiri dawamında oqısın. Solay etip, ol Qudayı Jaratqan Iyeden qorqıp, usı Nızamnıń barlıq sózlerine hám qaǵıydalarına ámel qılıwdı úyrensin. 20 Ol ózin tuwısqanlarınan joqarı sanamasın hám Jaratqan Iyeniń buyrıqlarınan ońǵa da, solǵa da burılmasın. Sonda ózi de, urpaǵı da Izraildıń ústinen uzaq jıllar dawamında patshalıq etedi».