Deu 18 | KaaIBT22L | STEP | «Lebiyli ruwxaniyler pútkil Lebiy urıwı menen birge basqa izraillılar sıyaqlı úles te, múlik te almaydı. Olarǵa tiyisetuǵın úles Jaratqan Iyege beriletuǵın sıylar bolıp, olar solardan jeydi.

‏ Deuteronomy 18

Ruwxaniylerdiń úlesi

1 «Lebiyli ruwxaniyler pútkil Lebiy urıwı menen birge basqa izraillılar sıyaqlı úles te, múlik te almaydı. Olarǵa tiyisetuǵın úles Jaratqan Iyege beriletuǵın sıylar bolıp, olar solardan jeydi. 2 Tuwısqanları arasında olardıń múlki bolmaydı. Jaratqan Iyeniń lebiylilerge wáde bergenindey, Onıń Ózi olardıń ırısqı-nesiybesin beredi.

3 Mal yamasa qoy qurbanlıq etilgende, ruwxaniylerge tiyisli pay mınalardan ibarat: maldıń aldınǵı san jiligi, jaǵı hám asqazanı. 4 Dánińizdiń, taza sharabıńızdıń, záytún mayıńızdıń birinshi ónimin hám qoylarıńızdıń birinshi qırqılǵan júnlerin ruwxaniyge beriń. 5 Óytkeni Qudayıńız Jaratqan Iye Lebiy urıwı Óziniń aldında turıp, Jaratqan Iyeniń atı menen máńgi xızmet etiwi ushın, olardı pútkil urıwlarıńızdıń ishinen tańlap aldı.

6 Eger bir lebiyli Izraildaǵı ózi jasap atırǵan qaladan Jaratqan Iyeniń tańlaytuǵın jerine óz qálewi menen barsa, 7 sol jerde Jaratqan Iyeniń aldında xızmet etip atırǵan lebiyli tuwısqanları sıyaqlı ol da Qudayı Jaratqan Iyeniń atı menen xızmet etiwine boladı. 8 Ol ata-babalarınıń miyrasınan qalǵan zattı satıp, óz paydasına alǵan bolsa da, basqa lebiyliler menen birdey ózine tiyisli úlesin alıwı kerek».

Basqa xalıqlardıń jerkenishli úrp-ádetlerinen saqlanıw

9 «Qudayıńız Jaratqan Iyeniń sizlerge berip atırǵan jerine kirgenińizde, ol jerdegi xalıqlardıń jerkenishli islerin úyrenbeńler. 10 Sizlerdiń arańızda óz ulın yamasa qızın otta qurbanlıq qılatuǵın, pal ashatuǵın, adamnıń keleshegin boljaytuǵın, belgilerdi jorıytuǵın, sıyqırshılıq qılatuǵın, 11 zikir salatuǵın, árwaqlardı hám ruwxlardı shaqıratuǵın yamasa óliler menen tillesip, másláhát alatuǵın birde bir adam bolmasın. 12 Sebebi Jaratqan Iye sonday isleytuǵınlardan jerkenedi. Qudayıńız Jaratqan Iye usınday jerkenishli isleri sebepli sol xalıqlardı sizlerdiń aldıńızdan quwıp shıǵarıp atır. 13 Qudayıńız Jaratqan Iyeniń aldında minsiz bolıńlar».

Payǵambar jiberiw haqqında

14 «Sizler elin alıp atırǵan sol xalıqlar boljawshılar menen palkerlerdiń úgit-násiyatına qulaq saladı. Biraq Qudayıńız Jaratqan Iye sizlerdiń bulay islewińizge ruxsat bermeydi. 15 Qudayıńız Jaratqan Iye sizler ushın arańızdan, óz tuwısqanlarıńızdan men sıyaqlı bir payǵambar shıǵaradı. Oǵan qulaq salıńlar. 16 Sizler Xoreb tawında jıynalǵan kúni Qudayıńız Jaratqan Iyeden ózlerińiz mınaday dep tilegen edińiz: „Qudayımız Jaratqan Iyeniń dawısın ekinshi márte esitpeyik, sol ullı ottı da basqa kórmeyik, bolmasa ólip qalamız“. 17 Sonda Jaratqan Iye maǵan bılay dedi: „Olardıń aytqanları durıs. 18 Olar ushın ózleriniń arasınan sen sıyaqlı bir payǵambar shıǵaraman. Men onıń awzına Óz sózlerimdi salaman hám ol Men ayt dep buyırǵanlarımnıń hámmesin olarǵa jetkeredi. 19 Ol Meniń atımnan sóyleydi, oǵan qulaq salmaǵan adamdı Men Ózim juwapkershilikke tartaman. 20 Biraq bir payǵambar Men buyırmaǵan sózdi Meniń atımnan sóylewge júreksinse yamasa basqa qudaylardıń atınan sóylese, ol óliwi tiyis“.

21 Sizler: „Jaratqan Iyeniń aytqanın yamasa aytpaǵanın qayaqtan bilemiz?“– dep oylawıńız múmkin. 22 Eger de bir payǵambar Jaratqan Iyeniń atınan sóylese, biraq aytqan sózleri orınlanbasa yamasa ámelge aspasa, onda sol sózdi Jaratqan Iye aytpaǵan boladı. Payǵambar óz atınan sóylegen, onnan qorqpańlar».