Deu 19 | KaaIBT22L | STEP | «Qudayıńız Jaratqan Iye jerlerin sizlerge berip atırǵan xalıqlardı joq qılǵanda, sizler sol jerlerdi múlik etip alıp, qalalarına hám úylerine jaylasıp alasız.

‏ Deuteronomy 19

Panalaytuǵın qalalar

(San 35:9-34; Eshu 20:1-9)

1 «Qudayıńız Jaratqan Iye jerlerin sizlerge berip atırǵan xalıqlardı joq qılǵanda, sizler sol jerlerdi múlik etip alıp, qalalarına hám úylerine jaylasıp alasız. 2 – 3 Sonda eldi úsh bólimge bólińler. Hár bir bólimnen bir pana qaladan ajıratıńlar. Sol qalalarǵa baratuǵın jollar salıńlar, solay etip, adam óltirip qoyǵan adam sol qalalardıń birine qashıp, panalasın.

4 Sonday jaǵday basına túsken adamǵa baylanıslı qaǵıyda mınaday: eger bir adam aldınnan jawızlıq qılıw niyeti bolmay, abaysızda birewdi óltirip qoysa, onda ol sol jerge qashıp qutılıwı múmkin. 5 Mısalı: bir adam birew menen birge aǵash tayarlawǵa toǵayǵa barıp, aǵash shabıw ushın baltasın kótergende, baltanıń temiri sabınan shıǵıp ketse hám qasındaǵı adamǵa tiyip ketip, onı óltirip alsa, onda usınday abaysızda adam óltirip qoyǵan adam sol pana qalalardıń birine qashıp, janın qutqarıp qalsın. 6 Bolmasa, ólgen adamnıń óshin alıwshı ámeńger ashıwlanıp, qanxordıń izinen quwıwı múmkin hám pana qalaǵa baratuǵın jol uzaq bolǵanı ushın, oǵan jetip alıp, onı óltiriwi múmkin. Degen menen, óltirgen adam ólimge ılayıqlı emes, sebebi ólgen adamǵa onıń aldın ala qaslıǵı bolmaǵan. 7 Sizlerge úsh qalanı ózlerińiz ushın ayırıp qoyıńlar, dep buyırǵanımnıń sebebi usı edi.

8 – 9 Qudayıńız Jaratqan Iyeni súyip, hámme waqıtta Onıń jollarınan júriń, dep sizlerge buyrıq berdim. Eger de, sizler usı buyrıqlardıń birewin de qaldırmay orınlasańız, Qudayıńız Jaratqan Iye ata-babalarıńızǵa ishken antı boyınsha jer shegaralarıńızdı keńeytedi hám wáde qılǵan pútkil eldi sizlerge beredi. Sonda sizler ayırıp qoyǵan úsh qalańızǵa jáne úsh pana qala qosıńlar. 10 Solay etip, Qudayıńız Jaratqan Iye sizlerge múlik etip beretuǵın elde ayıpsız adamnıń qanı tógilmesin. Ayıpsız adamnıń tógilgen qanı ushın ayıplı bolıp qalmańlar.

11 Biraq bir adam birewge qaslıq etip, buqqıda jatsa hám hújim etip, onı óltirse, keyin ol sol qalalardıń birewine qashıp barsa, 12 onda sol jınayatshı jasaǵan qaladaǵı aqsaqallar onıń izinen adam jiberip, onı qaytarıp alıp kelsin. Jınayatshı ólgen adam ushın óshin alıwshınıń qolına tapsırılsın. Solay etip, ol óltiriliwi kerek. 13 Onday adamdı ayap otırmańlar. Ayıpsız qandı tógiw gúnasınan Izraildı tazalańlar. Sonda abadan turmıs keshiresiz.

14 Qudayıńız Jaratqan Iye sizlerge múlik etip berip atırǵan elde qońsıńızdıń burınnan belgilengen jer shegarasın jıljıtıwshı bolmańlar».

Gúwalar haqqında

15 «Birewdi qanday da jınayat yamasa gúna islegen, dep ayıplaw ushın bir gúwa jeterli emes. Bul eki yamasa úsh adamnıń gúwalıǵı menen tastıyıqlanıwı kerek.

16 Eger de bir adam jalǵan gúwalıq berip, birewdi jawız niyette ayıplasa, 17 onda ekewi de Jaratqan Iyeniń aldına, sol waqıtta xızmet etip atırǵan ruwxaniylerdiń hám qazılardıń aldına kelsin. 18 Qazılar sol máseleni jaqsılap tekserip shıqsın. Eger sol gúwanıń tuwısqanına qarsı jalǵan gúwalıq berip atırǵanı anıqlansa, 19 tuwısqanına qarsı oylaǵan jawız niyetin ózine qaytarıńlar. Solay etip, arańızdaǵı jawızlıqtı joq qılıńlar. 20 Basqalar usı bolǵan waqıyanı esitip, qorqadı hám usınday jawızlıqtı hesh kim islemeytuǵın boladı. 21 Jalǵan gúwalıq bergen adamdı ayap otırmańlar: janǵa jan, kózge kóz, tiske tis, qolǵa qol hám ayaqqa ayaq».