‏ Deuteronomy 2

Izraillılardıń shólde ótkergen jılları

1«Keyin, Jaratqan Iyeniń maǵan buyırǵanınday, bizler keynimizge qaytıp, Qızıl teńizge baratuǵın jol menen shólge kettik. Seir tawlarınıń átirapında uzaq waqıt júrdik.

2Aqırında Jaratqan Iye maǵan bılay dedi: 3„Usı tawlı úlkeniń dógereginde júrgenińiz jeter. Endi arqa tárepke qaray júrińler“. 4Sonnan keyin, xalıqqa mına buyrıqlardı beriwimdi ayttı: „Seir jerinde jasaytuǵın tuwısqanlarıńız bolǵan Esawdıń urpaqlarınıń jerinen ótesizler. Olar sizlerden qorqadı. Degen menen, ózlerińiz de abaylı bolıńlar. 5Olarǵa qarsı urıs ashpańlar. Sizlerge olardıń jerinen bir qarıs ta jer bermeymen. Óytkeni tawlı Seir jerin Esawǵa múlik etip berdim. 6Olardan jeytuǵın awqatıńızdı hám ishetuǵın suwıńızdı gúmiske satıp alıńlar. 7Qudayıńız Jaratqan Iye, yaǵnıy Men sizlerdiń qol urǵan hár bir isińizdi jarılqadım. Usı ushı-qıyırı joq shólde aylanıp júrgenińizde, sizlerdi qorǵadım. Men qırıq jıl dawamında sizler menen birge boldım hám sizlerdiń hesh qanday mútájligińiz bolmadı“.

8Solay etip, bizler Seirde jasap atırǵan tuwısqanlarımız Esaw urpaqlarınıń janınan óttik. Elat hám Esion-Geberden Iordan tegisligine baratuǵın joldan júrdik, keyin jolımızdı Moab shóline qaray burdıq.

9Sonda Jaratqan Iye maǵan: „Moablılarǵa hújim qılıp, urıs ashpańlar. Olardıń jerinen sizlerge múlik bermeymen. Óytkeni Ar qalasın Luttıń urpaǵına múlik etip berdim“, – dedi».

10Burın ol jerde anaqlar sıyaqlı uzın boylı, kúshli hám kóp sanlı em xalqı jasaytuǵın edi. 11Anaqlar sıyaqlı, em xalqı da refa xalqı dep esaplanatuǵın edi. Biraq moablılar olardı em xalqı dep ataǵan edi. 12Seirde burın xor xalqı jasaytuǵın edi. Esawdıń urpaqları ol jerdi olardan tartıp alǵan edi. Izrail xalqı Jaratqan Iyeniń múlik etip bergen jerinde xalıqlardı joq qılǵanınday, Esawdıń áwladları da xor xalqın joq etip, jerlerine jaylasıp alǵan edi.

13«Jaratqan Iye: „Qánekey, jolǵa shıǵıńlar, Zered dáryasınan ótińler“, – dedi. Bizler Zered dáryasınan óttik. 14Qadesh-Barniyadan jolǵa shıǵıp, Zered dáryasınan ótemen degenshe, otız segiz jıl jol júrdik. Jaratqan Iyeniń ant iship aytqanınday, usı waqıtqa kelip, Izrail xalqınan bunnan aldınǵı áwladtıń barlıq urısqa jaramlıları joq bolǵan edi. 15Hátteki, Jaratqan Iye olardı ordadan joq qılıw ushın, olarǵa qarsı qol kóterdi.

16Sol urısqa jaramlılardıń barlıǵı ólip, xalıq arasınan joq bolǵannan keyin, 17Jaratqan Iye maǵan bılay dedi: 18„Búgin Ar qalasınıń jolınan, Moab jerlerinen ótesizler. 19Ammon xalqına jaqınlasqanıńızda, olarǵa hújim qılıp, urıs ashpańlar. Sebebi ammonlardıń jerinen sizlerge múlik bermeymen. Men ol jerdi múlik etip Luttıń urpaǵına berdim“».

20Burın bul jer de refa xalqınıń eli dep esaplanatuǵın edi. Refa xalqı olardan aldın sol jerde jasaǵan edi. Ammon xalqı olardı zamzumlar dep ataytuǵın edi. 21Zamzumlar anaq xalqınday uzın boylı, kúshli hám kóp edi. Biraq Jaratqan Iye olardı ammon xalqınıń aldında qıyrattı. Ammonlar zamzumlardıń jerlerin basıp alıp, sol jerge jaylasıp alǵan edi. 22Jaratqan Iye Seirde jasaytuǵın Esaw urpaǵı ushın da solay islep, xor xalqın olardıń aldında qıyrattı. Esaw áwladları xorlardıń jerlerin basıp alıp, sol jerge jaylasqan edi. Olar búgin de sol jerde jasaydı. 23Kaftordan kelgen kaftorlılar da Gazaǵa deyin sozılǵan awıllarda jasaytuǵın aw xalqın joq etip, olardıń jerlerine jaylasıp alǵan edi.

24«Bizler Moab jerinen ótkenimizden keyin, Jaratqan Iye bizlerge: „Endi jolǵa shıǵıńlar! Arnon dáryasınan ótińler! Mine, amor xalqınıń Xeshbondaǵı patshası Sixondı hám onıń elin sizlerge táslim qılaman. Oǵan hújim qılıp, jerin iyelep baslańlar. 25Búginnen baslap Men jer júzindegi xalıqlardı sizlerden húreyi ushıp, qorqatuǵın qılaman. Olar sizler tuwralı esitkende, qorqıwdan titireytuǵın boladı“, – dedi».

Izraillılardıń Xeshbon patshası Sixondı jeńiwi

26«Sonnan keyin, men Kedemot shólinen Xeshbon patshası Sixonǵa elshiler arqalı tınıshlıq kelisimin usınıp, mına xabardı jiberdim: 27„Elińizden ótip ketiwimizge ruxsat berseńiz. Bizler ońǵa da, solǵa da burılmay tuwrı joldan ótip ketemiz. 28Jeytuǵın awqatımızdı da, ishetuǵın suwımızdı da sizden gúmiske satıp alamız. Tek ǵana jerińizden ótip ketsek boldı. 29Seirde jasaytuǵın Esaw áwladları menen Arda jasaytuǵın moab xalqı óz shegaralarınan ótiwimizge ruxsat berdi. Siz de jerińizden ótip ketiwimizge ruxsat berseńiz. Iordan dáryasınan ótip, Qudayımız Jaratqan Iye bizlerge beretuǵın jerge jetip alayıq“.

30Degen menen, Xeshbon patshası Sixon jerinen ótiwimizge ruxsat bermedi. Sebebi Qudayıńız Jaratqan Iye búgin kórip turǵanıńızday, Sixondı sizlerge táslim qılıw ushın, onıń júregin tas etip, ójet qılıp qoyǵan edi.

31Jaratqan Iye maǵan: „Mine, Sixondı hám onıń elin saǵan táslim qılıp atırman. Endi onıń elin qolǵa kirgizip, iyelep alıwdı basla“, – dedi. 32Sixon bizler menen urısıw ushın, Yahasta barlıq áskerleri menen bizlerge qarsı shıqtı. 33Qudayımız Jaratqan Iye onı bizlerge táslim qıldı. Sixondı, onıń ulların hám pútkil xalqın qırıp tasladıq. 34Olardıń barlıq qalaların qolǵa kirgizip, hámmesin joq qıldıq. Erkek, hayal hám balalarınan hesh birin aman qaldırmadıq. 35Tek ǵana olardıń haywanların hám qalalarındaǵı mal-múliklerin ózlerimizge olja etip aldıq. 36Arnon sayınıń shetinde jaylasqan Aroerden hám saydıń ishindegi qaladan baslap Giladqa deyin hesh bir qala bizlerden ústem kelmedi. Sebebi Qudayımız Jaratqan Iye hámmesin bizlerge táslim qılǵan edi. 37Biraq Qudayımız Jaratqan Iyeniń buyrıǵı boyınsha ammonlardıń eline, Yabboq dáryasınıń boylarındaǵı hám tawlı úlkedegi qalalarǵa jaqınlamadıq».