Deu 20 | KaaIBT22L | STEP | «Sizler dushpanlarıńızǵa qarsı sawashqa shıǵıw ushın barǵanıńızda, olardıń atları, sawash arbaları hám sizlerden góre kóp áskerleri bar ekenin kórseńiz, olardan qorqpańlar. Óytkeni sizlerdi Mısırdan alıp shıqqan Qudayıńız Jaratqan Iye sizlerge yar boladı.

‏ Deuteronomy 20

Sawash haqqında

1 «Sizler dushpanlarıńızǵa qarsı sawashqa shıǵıw ushın barǵanıńızda, olardıń atları, sawash arbaları hám sizlerden góre kóp áskerleri bar ekenin kórseńiz, olardan qorqpańlar. Óytkeni sizlerdi Mısırdan alıp shıqqan Qudayıńız Jaratqan Iye sizlerge yar boladı. 2 Sawash baslamasıńızdan aldın ruwxaniy kelip, áskerlerdiń aldına shıǵıp, sóz sóylep, 3 olarǵa bılay dep aytsın: „Háy, izraillılar, qulaq salıńlar! Búgin sizler dushpanlarıńızǵa qarsı sawashqa baratırsız. Ruwxıńız túspesin, qorqpańlar. Qáweterge túsip, olardan seskenbeńler. 4 Qudayıńız Jaratqan Iyeniń Ózi sizler menen birge urısqa baradı! Ol sizler ushın dushpanlarıńızǵa qarsı urısıp, sizlerge jeńis beredi!“

5 Qadaǵalawshılar áskerlerge bılay dep aytsın: „Arańızda taza úy qurǵan hám oǵan kóship barıp, qollanıwǵa úlgermegen adam bar ma? Eger bar bolsa, úyine qaytsın. Ol urısta qaytıs bolsa, onıń úyine basqa birew kóship barıp, jasaydı. 6 Júzimzar egip, onıń miywesinen tatpaǵan adam bar ma? Eger bar bolsa, úyine qaytsın. Ol urısta qaytıs bolsa, onıń júzimin basqa birew terip aladı. 7 Bir qız benen atastırılıp bolıp, úylenbegen adam bar ma? Eger bar bolsa, úyine qaytsın. Ol urısta qaytıs bolsa, sol qızǵa basqa birew úylenip ketedi“.

8 Qadaǵalawshılar jáne bılay dep aytsın: „Arańızda qorqıp, ruwxı túsken adam bar ma? Bar bolsa, úyine qaytsın. Bolmasa, tuwısqanları da oǵan uqsap qorqısıp qaladı“. 9 Qadaǵalawshılar áskerlerge usı sózlerdi aytıp bolǵannan soń, áskerbasılar áskerlerdiń ústinen basshılıq etsin.

10 Bir qalaǵa qarsı hújim etiw ushın, oǵan jaqınlasqanıńızda, qala xalqına tınıshlıq jolı menen táslim bolıwın usınıńlar. 11 Eger de olar usı tınıshlıq usınısıńızdı qabıllap, dárwazaların sizlerge ashıp berse, onda qalada jasaytuǵınlardıń hámmesi erksiz xızmetshige aylanıp, sizler ushın jumıs isleydi. 12 Biraq tınıshlıq usınısıńızdı qala xalqı qabıllamay, sizler menen urısıwdı qálese, onda qalanı qorshap alıńlar. 13 Qudayıńız Jaratqan Iye qalanı sizlerge táslim qılǵanda, ol jerde jasap atırǵan barlıq erkeklerdi qılısh júzinen ótkizińler. 14 Hayallardı, balalardı, haywanlardı hám qaladaǵı hár bir nárseni ózlerińizge olja etip alıńlar. Qudayıńız Jaratqan Iyeniń sizlerge bergen dushpanıńızdıń mal-múliklerin qollanıwıńızǵa boladı. 15 Sizler iyelep alatuǵın elińizden uzaqta jaylasqan qalalarǵa usılay isleńler.

16 Biraq Qudayıńız Jaratqan Iye sizlerge múlik etip berip atırǵan jerdegi qalalarda hesh bir tiri jan qaldırmańlar. 17 Qudayıńız Jaratqan Iyeniń sizlerge buyırǵanınday, xet, amor, qanan, periz, xiw hám ebus xalıqların pútkilley qırıp taslańlar. 18 Bolmasa, olar ózleriniń qudaylarına tabınıp, isleytuǵın jerkenishli islerin sizlerge úyretedi hám sizler de Qudayıńız Jaratqan Iyege qarsı gúna isleysiz.

19 Eger de bir qalanı qolǵa alıw ushın, uzaq waqıt qorshap tursańız, onıń dógeregindegi miywe aǵashlardı shawıp, joq qılmańlar. Olardıń miywelerin jewińizge boladı, biraq shawıp taslamańlar. Óytkeni daladaǵı miywe aǵashlar qorǵannıń ishine qashıp ketetuǵınday adam emes-ǵo. 20 Tek ǵana miywe bermeytuǵın tereklerdi shawıp, joq qılıwıńızǵa boladı. Qalanı qolǵa alaman degenshe, qamal qılatuǵın úskeneler soǵıw ushın, sol tereklerden paydalanıwıńızǵa boladı».