‏ Deuteronomy 23

Jaratqan Iyeniń jámiyetiniń arasına kirmeytuǵınlar

1«Tuqım bezi ezilgen yamasa jınısıy aǵzası kesilgen adam Jaratqan Iyeniń jámiyetine kirmeydi.

2Tıyım salınǵan nekeden tuwılǵan bala Jaratqan Iyeniń jámiyetine kirmeydi, hátteki, onıń keyingi onınshı áwladına deyin Jaratqan Iyeniń jámiyetine kire almaydı.

3Ammon yamasa moab xalqınan bolǵan adam Jaratqan Iyeniń jámiyetine kirmeydi. Hátteki, olardıń onınshı áwladına deyin Jaratqan Iyeniń jámiyetine hasla kire almaydı. 4Óytkeni Mısırdan shıǵıp kiyatırǵanıńızda, olar jolda sizlerdi nan hám suw menen kútip almadı. Jáne de, Aram-Naharayımdaǵı Petor qalasınan bolǵan Beor ulı Bilamdı sizlerdi náletlew ushın jallaǵan edi. 5Degen menen, Qudayıńız Jaratqan Iye Bilamǵa qulaq salıwdı qálemedi. Qudayıńız Jaratqan Iye sizlerdi súygeni ushın, náletti jarılqawǵa aylandırdı. 6Ómirińiz dawamında olardıń tınıshlıǵı hám iygiligi ushın háreket etpeńler.

7Edomlılardan bolsa, jerkenbeńler, olar sizlerdiń tuwısqanıńızdur. Mısırlılardan da jerkenbeńler. Óytkeni olardıń jerinde sizler kelgindi bolıp jasaǵan edińler. 8Olardan tuwılǵan úshinshi áwlad Jaratqan Iyeniń jámiyetine kire aladı».

Ordanı pák tutıw

9«Dushpanlarıńız benen urısıw ushın orda qurǵanıńızda, hár qanday haramılıqtan saq bolıńlar. 10Eger arańızda bir adamnıń túnde urıǵı aǵıp, haram bolsa, ol ordadan shıǵıp ketsin hám sol jerde qalsın. 11Ol keshke qaray juwınıp alsın, kún batqannan keyin ordaǵa qaytıwına boladı.

12Ordanıń sırtında dáretke shıǵatuǵın jerińiz bolsın. 13Qural-jaraǵıńızdıń arasında jer qazıw ushın bir belshe bolsın. Dáretke shıǵarda, shuqır qazıp, keyin onı kómip taslań. 14Ordańızdı pák saqlańlar, sebebi Qudayıńız Jaratqan Iye sizlerdi qutqarıp, dushpanlarıńızdı sizlerge táslim qılıw ushın, ordada sizler menen birge júredi. Eger de Jaratqan Iye arańızda qanday da bir ádepsiz islerdi kórse, Ol sizlerden júz buradı».

Hár túrli qaǵıydalar

15«Xojayınınan qashıp, Izraildan pana izlep kelgen quldı xojayınına qaytarıp berip jibermeńler. 16Ol sizlerdiń arańızda, ózi unatqan jerde, qálegen qalalardıń birinde jasasın. Oǵan jawızlıq qılmańlar.

17Butxanalarda buzıqlıq penen shuǵıllanatuǵın izraillı hesh qanday hayal yamasa erkek bolmasın. 18Qudayıńız Jaratqan Iye buzıqlıq penen shuǵıllanatuǵın hayal hám erkeklerden jerkenedi. Olardıń is haqısın Qudayıńız Jaratqan Iyeniń Úyine wáde boyınsha beriletuǵın sıy etip alıp kelmeńler.

19Izraillı tuwısqanıńızǵa puldı, nandı yamasa basqa da zatlarıńızdı qarızǵa bergenińizde, onnan ústeme talap qılmańlar. 20Basqa jat jerli adamnan ústeme alıwıńızǵa boladı, biraq izraillı tuwısqanıńızdan almańlar. Sonda sizler múlik etip alıw ushın baratırǵan elde, Qudayıńız Jaratqan Iye sizlerdiń qol urǵan hár bir isińizge bereket beredi.

21Qudayıńız Jaratqan Iyege qanday da bir wáde berseńiz, onı keshiktirmey orınlańlar. Qudayıńız Jaratqan Iye sizlerden wádeńizdi orınlawıńızdı talap qıladı. Eger wádeńizdi orınlamasańız, ózlerińizge gúna arttırıp alasız. 22Eger wáde bermegen bolsańız, gúnalı bolmaysız. 23Al awzıńızdan shıqqan wádeńizdi sózsiz orınlańlar. Óytkeni Qudayıńız Jaratqan Iyege óz qálewińiz benen wáde berdińiz.

24Tuwısqanıńızdıń júzimzarına kirgenińizde, júzimnen toyǵanıńızsha jewińizge boladı, biraq onnan ıdısıńızǵa terip almańlar. 25Tuwısqanıńızdıń egisligine kirgenińizde, qolıńız benen masaǵın úzip alıwıńızǵa boladı, biraq onıń eginlerin orıp almańlar».