Deu 24 | KaaIBT22L | STEP | «Eger de bir adam úylenip, keyin ala hayalınan shermendelik bir nárse tawıp, onı unatpay qalsa, hayalına talaq xat jazıp berip, onı úyinen shıǵarıp jiberiwi múmkin.

‏ Deuteronomy 24

Ajırasıw hám qayta turmıs qurıw

1 «Eger de bir adam úylenip, keyin ala hayalınan shermendelik bir nárse tawıp, onı unatpay qalsa, hayalına talaq xat jazıp berip, onı úyinen shıǵarıp jiberiwi múmkin. 2 Hayal kúyewiniń úyinen ketkennen keyin, basqa birewge turmısqa shıqsa, 3 ekinshi kúyewi de onı unatpay qalıp, ol da oǵan talaq xat jazıp berip, úyinen shıǵarıp jiberse yamasa sol ekinshi kúyewi ólip qalsa, 4 ajırasqan birinshi kúyewi hayalǵa qaytadan úyleniwine bolmaydı. Sebebi hayal haramlanǵan. Eger úylense, bunnan Jaratqan Iye jerkenedi. Qudayıńız Jaratqan Iye sizlerge múlik etip berip atırǵan eldi gúnaǵa batırmańlar.

Hár túrli nızamlar

5 Jaqında úylengen adam urısqa barmasın, oǵan hár túrli wazıypalar berilmesin. Ol bir jıl dawamında úyinde bolıp, hayalın baxıtlı qılsın.

6 Hesh kim kepillik sıpatında digirmandı yamasa digirmannıń ústindegi tastı da almasın. Bunday is qılıw adamnıń janın kepillikke alǵan menen barabar boladı.

7 Eger birewdiń izraillı tuwısqanlarınan birin urlap, oǵan qul sıpatında qarap, zulımlıq qılǵanı yamasa onı qul qılıp satıp jibergeni málim bolsa, onda bunday urı adam óltirilsin. Solay etip, arańızdaǵı jawızlıqtı joq qılıńlar.

8 Jaman teri keselligi máselesinde, lebiyli ruwxaniylerdiń sizlerge úyretetuǵınlarınıń hámmesin muqıyatlı túrde orınlańlar. Meniń lebiylilerge bergen buyrıqlarıma ámel qılıńlar. 9 Sizler Mısırdan shıqqannan keyin, jolda Qudayıńız Jaratqan Iyeniń Máriyamǵa ne qılǵanın ^{▼▼ San 12:15.} esińizde saqlańlar.

10 Izraillı tuwısqanıńızdıń birewine bir nárseni qarızǵa bergenińizde, kepillikke zat alıw ushın, onıń úyine kirmeńler. 11 Sırtta kútip turıńlar. Ol adam kepillikke beretuǵın zatın ózi sırtqa alıp shıqsın. 12 Eger ol kámbaǵal adam bolsa, onıń kepillikke bergen kiyimin tún boyı ózińizde qaldırmańlar. 13 Onnan alǵan kiyimdi quyash batar waqıtta qaytarıp berińler. Ol óz kiyimin kiyip uyıqlap, sizge aq pátiya beredi. Usılay islep, sizler Qudayıńız Jaratqan Iyeniń aldında durıs is qılǵan bolasız.

14 Kámbaǵal hám mútájlikte jasap atırǵan jallanba jumısshınıń is haqısın uslap qalmańlar. Ol izraillı bolsın, qalańızdıń birinde jasap atırǵan kelgindi adam bolsın, onday qılmańlar. 15 Onıń is haqısın hár kúni quyash batpastan aldın berińler. Sebebi ol kámbaǵal bolǵanı ushın, tirishiligi usıdan ibarat. Bolmasa, ol adam sizlerge qarsı Jaratqan Iyege nalıydı hám ózińizge gúna arttırıp alasız.

16 Balalarınıń gúnası ushın ákeler, ákeleriniń gúnası ushın balalar óltirilmesin. Hár bir adam óz gúnası ushın óltirilsin.

17 Kelgindi adamlardıń hám jetimlerdiń huqıqın ayaq astı qılmańlar. Jesir hayaldıń kiyimin kepillikke almańlar. 18 Mısırda qul bolǵanıńızdı hám Qudayıńız Jaratqan Iyeniń sizlerdi sol jerden azat etkenin esińizde saqlańlar. Sonıń ushın da, men sizlerge usı buyrıqtı berip atırman.

19 Atızıńızdaǵı egindi orǵanıńızda, orılǵan bir bawdı umıtıp qaldırǵan bolsańız, onı alıw ushın keynińizge qaytpańlar. Onı kelgindilerge hám jetim-jesirlerge qaldırıńlar. Sonda Qudayıńız Jaratqan Iye sizlerdiń qol urǵan hár bir isińizge bereket beredi. 20 Záytún aǵashlarıńızdıń miywelerin qaǵıp alǵanıńızdan keyin, shaqalarda qalıp qoyǵanlardı jáne terip alıw ushın barmańlar. Olardı kelgindilerge hám jetim-jesirlerge qaldırıńlar. 21 Jáne de, júzimzarıńızdıń miywelerin tergenińizde de, shaqalarında qalıp ketken júzimlerdi qaytadan terip almańlar. Bulardı kelgindilerge hám jetim-jesirlerge qaldırıńlar. 22 Mısırda qul bolǵanıńızdı esińizde saqlańlar. Sonıń ushın da, men sizlerge usı buyrıqtı berip atırman».