Deu 26 | KaaIBT22L | STEP | «Qudayıńız Jaratqan Iye sizlerge múlik etip berip atırǵan elge kirip, ol jerdi iyelep, jaylasıp alǵanıńızda,

‏ Deuteronomy 26

Birinshi zúráát hám onnan birin ajıratıw

1 «Qudayıńız Jaratqan Iye sizlerge múlik etip berip atırǵan elge kirip, ol jerdi iyelep, jaylasıp alǵanıńızda, 2 sol eldiń jerlerinen jıynap alatuǵın barlıq zúráátlerińizdiń birinshi ónimlerinen alıp, sebetke salıńlar. Keyin olardı Qudayıńız Jaratqan Iyeniń Óz atın ornalastırıw ushın tańlaytuǵın jerine alıp barıńlar. 3 Sol waqıtta xızmet etip atırǵan ruwxaniydiń aldına barıp, oǵan bılay dep aytıńlar: „Jaratqan Iyeniń bizlerge beremen dep, ata-babalarımızǵa ant ishken eline keldim. Búgin men usını Qudayıń Jaratqan Iyeniń aldında tán alaman“. 4 Ruwxaniy qolıńızdan sebetti alıp, Qudayıńız Jaratqan Iyeniń qurbanlıq ornınıń aldına qoysın. 5 Sonnan keyin, sizler Qudayıńız Jaratqan Iyeniń aldında bılay dep aytıńlar: „Ata-babam kóshpeli aramlı edi. Ol azǵantay adamı menen Mısırǵa barıp, sol jerde kelgindi bolıp jasay basladı. Biraq ol ullı, kúshli hám sansız xalıqqa aylandı. 6 Mısırlılar bizlerge jaman qatnasta bolıp, zulımlıq etti hám awır jumıs islewge májbúrledi. 7 Sonda bizler ata-babalarımızdıń Qudayı Jaratqan Iyege jalbarınıp, dad saldıq. Jaratqan Iye dadımızdı esitti hám bizlerdiń azap shegip atırǵanımızdı, islep atırǵan awır miynetimizdi, mısırlılardıń bizlerge islep atırǵan eziwshiligin kórdi. 8 Sonnan keyin, Ol qúdireti hám sozılǵan kúshli qolı, ullı hám qorqınıshlı isleri hám káramatlı belgileri menen bizlerdi Mısırdan alıp shıqtı. 9 Ol bizlerdi usı jerge alıp keldi, sút hám pal aǵıp turǵan usı jerdi bizlerge berdi. 10 Endi, Jaratqan Iye, bizlerge bergen jerińniń birinshi zúráátin Saǵan alıp keldik“.

Keyin sebetti Qudayıńız Jaratqan Iyeniń aldına qoyıp, Oǵan sıyınıńlar. 11 Qudayıńız Jaratqan Iyeniń sizlerge hám shańaraqlarıńızǵa bergen barlıq iygilikli zatları ushın quwanıp, shadlanıńlar. Lebiyliler hám arańızda jasap atırǵan kelgindiler de sizler menen birge bayramlasın.

12 Sizler úshinshi jılı, onnan birin beretuǵın jılı, barlıq zúráátińizden onnan bir bólegin ayırıp qoyıńlar. Sol onnan birińizdi lebiylilerge, kelgindilerge, jetim-jesirlerge berińler. Solay etip, olar da qalalarıńızda iship-jep toysın. 13 Sonnan keyin, Qudayıńız Jaratqan Iyege bılay dep aytıńlar: „Úyimnen muxaddes onnan birlerdi tolıǵı menen shıǵarıp, Óziń buyırǵanıńday, bulardı lebiylilerge, kelgindilerge hám jetim-jesirlerge berdim. Seniń hesh bir buyrıqlarıńdı buzbadım, olardıń hesh birin de umıtpadım. 14 Aza tutqan waqtımda, muxaddes onnan birinen jemedim, haram bolǵan waqtımda da, olarǵa tiymedim hám ólilerdiń árwaqlarına usınbadım. Qudayım Jaratqan Iye, Seniń sózińe qulaq saldım hám maǵan buyırǵanlarıńnıń hámmesin orınladım. 15 Endi aspandaǵı muxaddes mákanıńnan bizlerge názerińdi túsir! Ata-babalarımızǵa ishken antıń boyınsha bizlerge bergen sút hám pal aǵıp turǵan jerge hám Izrail xalqıńa bereket ber“».

Qudaydıń xalqı

16 «Búgin Qudayıńız Jaratqan Iye usı qaǵıydalarǵa hám nızamlarǵa ámel qılıwıńızdı buyırıp atır. Bulardı shın júregińiz hám jan-tánińiz benen muqıyatlı túrde orınlańlar. 17 Búgin sizler: „Jaratqan Iye bizlerdiń Qudayımız, Onıń jollarınan júremiz, Onıń qaǵıydalarına, buyrıqlarına hám nızamlarına ámel qılamız, Oǵan boysınamız“, – dep ashıq tán aldıńız. 18 Jaratqan Iye bergen wádesi boyınsha, búgin sizlerdi Óz ǵáziynesi sıpatında járiyalaydı. Onıń barlıq buyrıqlarına ámel qılıńlar. 19 Ol sizlerdi Ózi jaratqan barlıq xalıqlardan joqarı qıladı. Sizler alǵıs-maqtawǵa hám húrmetke erisesiz. Onıń bergen wádesi boyınsha, sizler Qudayıńız Jaratqan Iyeniń muxaddes xalqı bolasız».