‏ Deuteronomy 28

Jarılqawlar

1«Eger Qudayıńız Jaratqan Iyeniń sózine qulaq salıp, búgin men sizlerge jetkerip atırǵan Onıń barlıq buyrıqların muqıyatlı túrde orınlasańız, Ol sizlerdi jer júzindegi hámme xalıqlardan joqarı qıladı. 2Qudayıńız Jaratqan Iyeniń sózin tıńlasańız, ústińizge mına bereketler jawadı hám bereketli bolasız:

3Qalada da, atızda da bereketli bolasız.

4Úbirli-shúbirli bolıp jarılqanasız. Jerińizdiń zúrááti mol boladı, mallarıńızdıń tólleri – pada hám súriwlerińizdiń buzawları menen qozıları kóp boladı.

5Dán sebetlerińiz hám qamır tabaqlarıńız bereketli boladı.

6Úyde de, dúzde de hár bir isińiz bereketli boladı.

7Jaratqan Iye sizlerge hújim qılǵan dushpanlarıńızdı jeńiliske ushıratadı. Olar sizlerge bir tárepten hújim etse, sizlerden tumlı-tusqa qashıp ketedi.

8Jaratqan Iyeniń buyrıǵı menen ǵállexanańız tolı boladı. Qol urǵan hár bir isińizdi Jaratqan Iye bereketleydi. Qudayıńız Jaratqan Iye sizlerge berip atırǵan elde sizlerdi jarılqaydı.

9Qudayıńız Jaratqan Iyeniń buyrıqlarına ámel qılıp, Onıń jolları menen júrseńiz, Jaratqan Iye sizlerge ant ishkenindey, sizlerdi Óziniń muxaddes xalqı qıladı. 10Jer júzindegi barlıq xalıqlar sizlerdiń Jaratqan Iyege tiyisli ekenińizdi kórip, sizlerden qorqatuǵın boladı. 11Jaratqan Iye sizlerge beremen dep, ata-babalarıńızǵa ant ishken elde molshılıqta jasawıńızdı támiyinleydi. Úbirli-shúbirli bolasız, mallarıńızdıń tólleri kóbeyedi hám jerińizdiń zúrááti mol boladı. 12Jaratqan Iye elińizge óz waqtında jawın jawdırıw ushın aspandaǵı bay ǵáziynesin ashadı hám qol urǵan hár bir isińizge bereket beredi. Kóp xalıqlarǵa qarız beresiz, ózlerińiz bolsa, qarız almaytuǵın bolasız. 13Búgin men sizlerge jetkerip atırǵan Qudayıńız Jaratqan Iyeniń buyrıqların tıńlap, olardı muqıyatlı túrde orınlasańız, Ol sizlerdi quyrıq emes, al bas qıladı. Sizler tómende emes, al joqarıda bolasız. 14Búgin men sizlerge jetkerip atırǵan buyrıqlardan ońǵa da, solǵa da shıǵıp ketpeńler, basqa qudaylarǵa erip, olarǵa tabınbańlar».

Náletler

15«Biraq, eger de Qudayıńız Jaratqan Iyeniń sózine qulaq salmay, búgin men sizlerge jetkerip atırǵan Onıń barlıq buyrıqların hám qaǵıydaların muqıyatlı túrde orınlamasańız, mına náletler basıńızǵa túsedi:

16Qalada da, atızda da náletiy bolasız.

17Dán sebetlerińiz hám qamır tabaqlarıńız náletiy boladı.

18Ul-qızǵa zar bolıp, jerińiz zúráátsiz, sıyırlarıńız hám súriwlerińiz kóbeymey, náletiy bolasız.

19Úyde de, dúzde de hár bir isińiz náletiy boladı.

20Jaratqan Iyeden júz burıp, jawızlıq islegenińiz ushın, qol urǵan hár bir isińizde Ol sizlerdi náletke hám bále-qadaǵa duwshar qıladı. Isińiz ońınan kelmeydi. Aqırında, tez arada ústińizge apat jawıp, pútkilley joq bolasız. 21Sizler múlik etiw ushın baratırǵan elińizge Jaratqan Iye illet jiberip, sizlerdi joq qıladı. 22Ol sizlerdi ókpe keselligine, ısıtpa hám qaltıratpaǵa duwshar qıladı. Sonıń menen birge, jazdıń saratan ıssısın hám qurǵaqshılıq jiberip, eginlerińizdi quwratıp taslaydı hám kesellendiredi. Sizler ólip ketkenińizshe, usı apatlar izińizden qalmaydı. 23Tóbeńizdegi aspan qola sıyaqlı, ayaǵıńızdıń astındaǵı jer temir sıyaqlı bolıp qaladı. 24Sizler joq bolıp ketpegenińizshe, Jaratqan Iye aspannan jawınnıń ornına elińizge shań-tozań jawdıradı.

25Jaratqan Iye sizlerdi dushpanlarıńızǵa táslim etedi. Sizler olarǵa bir tárepten hújim etesiz, biraq olardan jeti tárepke qaray qashasız. Bunı kórip, jer júzindegi barlıq patshalıqlardıń húreyleri ushıp ketedi. 26Óliklerińiz barlıq quslarǵa hám jabayı haywanlarǵa jem boladı, olardı quwıp jiberetuǵın hesh kim bolmaydı. 27Jaratqan Iye mısırlılarǵa jibergen dawası joq shıyqanlar, qotır jaralar hám qıshımalarǵa sizlerdi duwshar etedi. 28Sonıń menen birge, Ol sizlerdi jinlilik, soqırlıq, esten ayırılıw báleleri menen jazalaydı. 29Soqır adam túnde sıypalanıp júrgenindey, sizler kúndizgi waqıt sıypalanıp júresiz. Islegen hár bir isińizde tabıssız bolasız, úzliksiz ezilip, tonalasız hám sizlerdi qutqaratuǵın hesh kim bolmaydı.

30Bir qız benen nekeden ótesiz, biraq onı basqa birew zorlaydı. Úy salasız, biraq onıń ishine kirip, jasay almaysız. Júzim baǵın otırǵızasız, biraq júziminen jey almaysız. 31Malıńız kóz aldıńızda soyıladı, biraq góshinen jey almaysız. Eshegińizdi sizlerden zorlap tartıp aladı hám qaytarıp bermeydi. Qoy-eshkilerińiz dushpanlarıńızǵa beriledi. Sizlerdi qutqaratuǵın hesh kim bolmaydı. 32Ul-qızlarıńız kóz aldıńızda basqa xalıqlarǵa qul etip beriledi. Qolıńızdan hesh nárse kelmegenlikten, hár kúni olardıń qaytıp keliwin kútip, jolına kóz tigip, kózlerińiz taladı. 33Sizler tanımaytuǵın bir xalıq kelip, jerińizdiń zúráátin hám barlıq miynetińizdiń miywesin jeydi. Ómirińiz boyı jábirlenip, ezilesiz. 34Usılardı kózlerińiz benen kórip, aqıl-esińizden ayırılasız. 35Jaratqan Iye sizlerdi basıńızdan ayaǵıńızdıń ushına deyin dawası joq jara hám shıyqanlar menen qaplaydı.

36Jaratqan Iye sizlerdi hám ózlerińizge tayınlaǵan patshańızdı ózlerińiz de, ata-babalarıńız da tanımaytuǵın bir xalıqqa súrginge aydatıp jiberedi. Ol jerde aǵashtan hám tastan islengen basqa qudaylarǵa tabınıp, xızmet etesiz. 37Jaratqan Iye sizlerdi sol basqa xalıqlarǵa alıp barǵanda, sizler olardıń arasında qorqınıshlı kóriniske hám ápsanaǵa aylanıp, masqara bolasız.

38Atızlarıńızǵa kóp tuqım egesiz, biraq az zúráát alasız. Sebebi zúráátińizdi shegirtke jep ketedi. 39Júzim baǵın otırǵızıp, tárbiyalaysız, biraq onıń sharabın ishpeysiz, júzimin termeysiz. Óytkeni olardı qurt jep ketedi. 40Elińizdiń hámme jerinde záytún baǵı bolsa da, onıń mayın ústińizge jaǵa almaysız. Sebebi záytún aǵashlarınıń miyweleri tógilip qaladı. 41Sizler ul-qızlı bolasız, biraq ózlerińizge buyırmaydı, olardı súrgin qılıp alıp ketedi. 42Barlıq miywe aǵashlarıńızdıń miywelerin hám jerińizdiń zúráátin shegirtkeler jep ketedi.

43Sizlerdiń arańızda jasap atırǵan kelgindilerdiń jaǵdayı joqarılap kúsheyedi, al sizler bolsa, tómenleysiz. 44Olar sizlerge qarız beretuǵın boladı, al sizler bolsa, olarǵa qarız bere almaysız. Olar bas, al sizler quyrıq bolasız.

45Sizler Qudayıńız Jaratqan Iyege qulaq salmay, Onıń bergen buyrıqlarına hám qaǵıydalarına ámel qılmasańız, usı náletler basıńızǵa jawıp, sizlerdi joq qılmaǵansha, izińizden qalmay, jetip aladı. 46Bul náletler sizler hám urpaǵıńız ushın, Quday bergen jazanıń máńgi belgisi bolıp qaladı. 47Sebebi hámme nárse molshılıq waqıtta, sizler Qudayıńız Jaratqan Iyege shadlı hám quwanıshlı túrde xızmet etpedińiz. 48Sonıń ushın, Jaratqan Iye sizlerge jibergen dushpanlarǵa qullıq etesiz, ash, suwsız hám jalańash qalıp, hámme nársege mútáj bolasız. Jaratqan Iye sizlerdi joq etpegenshe, moynıńızǵa temir moyıntırıq salıp qoyadı.

49Jaratqan Iye sizlerge qarsı uzaqtan, dúnyanıń basqa shetinen bir xalıqtı tómenge taslanıp atırǵan búrkittey etip jiberedi. Sizler olardıń tilin túsinbeysiz. 50Bul xalıq qorqınıshlı bolıp, jası úlkenlerge rehim, jası kishilerge miyrim-shápáát kórsetpeydi. 51Olar sizlerdi joq qılmaǵansha, mallarıńızdıń tóllerin hám jerińizdiń zúráátin jeydi. Sizlerge dán de, sharap ta, záytún mayın da, sıyırlarıńızdıń buzawların da, qoylarıńızdıń qozıların da qaldırmaydı. Sonda sizler joq bolıp ketesiz. 52Olar Qudayıńız Jaratqan Iye sizlerge berip atırǵan eldegi barlıq qalalardı qamal qıladı. Sizler isengen biyik hám bekkem diywallar jer menen jeksen boladı.

53Dushpanıńız qamal qılıp, qısqıǵa alǵanda, sizler óz perzentlerińizdi, Qudayıńız Jaratqan Iye ózlerińizge bergen ul-qızlarıńızdı jeysiz. 54Arańızdaǵı eń múláyim, eń názik adam da tuwısqanına, hayalına hám aman qalǵan balalarına janı ashımay, 55ózi jep otırǵan balasınıń góshin qızǵanıp, olardıń hesh biri menen bólispeydi. Óytkeni sizlerdi dushpanıńız qamal qılıp, qısqıǵa alǵanı sebepli qalalarıńızda hesh qanday awqat qalmaydı. 56Arańızdaǵı eń múláyim, eń názik hayal, múláyimligi hám názikliginen ayaǵın jerge basıwdı qálemeytuǵın hayal súyikli kúyewine, óz ul-qızına janı ashımay, 57ash bolǵanlıqtan, tuwǵan balasın hám balasınıń joldasın jasırınsha jep, olar menen bólispeydi. Sebebi dushpanıńız sizlerdi qamal qılıp, qısqıǵa alǵanlıqtan, usınday qıyın awhalda qalıp qoyasız.

58Usı kitapta jazılǵan nızamnıń barlıq sózlerin muqıyatlı túrde orınlamay, Qudayıńız Jaratqan Iyeniń ullı hám aybatlı atınan qorqpasańız, 59Ol sizlerdi hám urpaǵıńızdı qorqınıshlı, ullı hám úzliksiz apatlarǵa, jáne de, awır hám dawasız keselliklerge duwshar qıladı. 60Sizlerdi qorqınıshqa salǵan Mısırdaǵı barlıq keselliklerdi sizlerge jáne jiberedi hám olardan hesh qashan shıpa taba almaysız. 61Sizler joq bolıp ketpegenińizshe, Jaratqan Iye usı Nızam kitabında jazılmaǵan hár túrli awırıwlar menen apatlardı basıńızǵa dóndiredi. 62Sizler aspandaǵı juldızlar sıyaqlı kóp edińiz, biraq Qudayıńız Jaratqan Iyege qulaq salmaǵanıńız ushın, sanıńız azayıp qaladı. 63Jaratqan Iye sizlerge jaqsılıq qılıp, kóbeytkeninen qanshelli súysingen bolsa, sizlerdi qulatıp, joq etkende de, sonshelli súysinedi. Múlik etip alıw ushın baratırǵan elden sizlerdi suwırıp, ılaqtırıp jiberedi.

64Jaratqan Iye sizlerdi dúnyanıń arǵı shetinen bergi shetine deyin, barlıq xalıqlardıń arasına tarqatıp jiberedi. Ol jerde ózlerińiz de, ata-babalarıńız da tanımaǵan aǵashtan hám tastan islengen basqa qudaylarǵa tabınasız. 65Biraq sol xalıqlardıń arasında tınıshlıǵıńız da, dem alatuǵın bir jerińiz de bolmaydı. Ol jerde Jaratqan Iye sizlerge titiregen júrekler, úmitsizlik hám úmitsiz kózler beredi. 66Ómirińiz qıl ústinde turǵanday bolıp, kúni-túni ólimnen qorqıp jasaysız. 67Túnde júregińizdi biylep alǵan qorqınısh sebepli „Qánekey, azan bolǵanda ma edi!“deysiz, al azanda óz kózińiz benen kóretuǵın waqıyalar sebepli „Qánekey, kesh bolǵanda ma edi!“deysiz. 68Jaratqan Iye sizlerge Mısırǵa qaytıp barmaysız, dep aytqan bolsa da, Ol sizlerdi kemeler menen Mısırǵa qaytadan jiberedi. Ol jerde sizler ózlerińizdi dushpanlarıńızǵa qul hám shorı qılıp satıwǵa háreket etesiz, biraq sizlerdi satıp alatuǵın qarıydar bolmaydı».