‏ Deuteronomy 29

Moab elindegi dúzilgen kelisimniń shártleri

1Jaratqan Iye izraillılar menen Xoreb tawında dúzgen kelisiminen tısqarı, Moabta izraillılar menen kelisim dúziwdi Muwsaǵa buyırdı. Bul kelisim tómendegiden ibarat:

2Muwsa pútkil Izrail xalqın bir jerge jıynap, olarǵa bılay dedi: «Jaratqan Iyeniń Mısırda kóz aldıńızda faraonǵa, onıń barlıq xızmetkerleri menen xalqına ne islegenlerin kórdińiz. 3Onıń jibergen ullı apatların, belgilerin hám qúdiretli káramatların óz kózińiz benen kórdińiz. 4Degen menen, Jaratqan Iye usı kúnge deyin sizlerge túsinetuǵın júrek, kóretuǵın kóz hám esitetuǵın qulaq bermedi. 5Ol sizlerdi qırıq jıl shólde alıp júrdi. Sonda sizlerdiń úst kiyimińiz de, ayaq kiyimińiz de tozbadı. 6Jegenińiz nan emes, ishkenińiz sharap yamasa basqa da ótkir ishimlik emes edi. Bulardıń barlıǵın Onıń Qudayıńız Jaratqan Iye ekenin túsiniwińiz ushın qıldı.

7Usı jerge kelgenimizde, Xeshbon patshası Sixon menen Bashan patshası Og bizlerge qarsı urıs ashtı. Biraq olardı jeńiliske ushırattıq. 8Olardıń jerlerin iyelep, Ruben, Gad urıwlarına hám Menashshe urıwınıń yarımına múlik etip berdik. 9Endi hár bir isińizde tabıslı bolıwıńız ushın, usı kelisim shártlerin muqıyatlı túrde orınlańlar.

10– 11Búgin hámmeńiz – urıw basshılarıńız, aqsaqallarıńız, qadaǵalawshılarıńız, pútkil Izrail erkekleri, balalarıńız, hayallarıńız hám arańızda jasap atırǵan otınıńızdı shabatuǵın hám suwıńızdı tasıytuǵın kelgindiler Qudayıńız Jaratqan Iyeniń aldında turıpsız. 12Búgin Qudayıńız Jaratqan Iyeniń sizler menen dúzetuǵın kelisiminiń kúshke miniwi ushın, onı ant iship tastıyıqlaw ushın usı jerde turıpsız. 13Solay etip, Ol ata-babalarıńız Ibrayımǵa, Ísaqqa hám Yaqıpqa ant iship, sizlerge wáde bergenindey, búginnen baslap, Ol sizlerdi Óz xalqı etip belgilesin hám sizlerdiń Qudayıńız bolsın. 14– 15Mine, Jaratqan Iye ant penen dúzetuǵın kelisimin usı jerde bizler menen birge Onıń aldında turǵan tek ǵana sizler menen emes, al ele dúnyaǵa kelmegen áwladlarıńız benen de dúzip atır.

16Mısırda qalay jasaǵanımızdı, basqa xalıqlardıń jerlerinen qalay ótip kelgenimizdi ózlerińiz de bilesiz. 17Olardıń aǵashtan, tastan, gúmisten hám altınnan islengen jerkenishli butların kórdińiz. 18Abaylı bolıńlar, sizlerdiń arańızda sol xalıqlardıń qudaylarına tabınıw ushın, Qudayımız Jaratqan Iyeden júz buratuǵın erkek yamasa hayal, tiyre yamasa urıw bolmasın. Arańızda bunday záhár hám ashshı miywe beretuǵın tamır bolmasın. 19Arańızda hesh bir adam usı kelisimdegi náletlerdi esitip turıp, kewlinde: „Óz qálewim boyınsha jasasam da, baxıtlı bolaman“, – dep oylamasın. Bunday pikir hámmeńizdiń basıńızǵa apat alıp keledi. 20Jaratqan Iye bunday adamdı keshirmeydi. Jaratqan Iyeniń ǵázebi hám qızǵanıshı ol adamǵa qarsı lawlap janadı. Usı kitapta jazılǵan barlıq náletler onıń basına jawıp, Jaratqan Iye onıń atın jer júzinen óshirip taslaydı. 21Usı Nızam kitabında jazılǵan kelisimdegi barlıq náletler boyınsha, Jaratqan Iye onı Izrail urıwlarınıń arasınan jazalaw ushın ayırıp aladı.

22Keleshek áwladlar, balalarıńız hám uzaq elden kelgen jat jerli adamlar Jaratqan Iyeniń usı elge jibergen apatların hám keselliklerdi kóredi. 23Pútkil eldi otlı kúkirt hám duz kúydirip taslaydı. Jerge hesh nárse egip te bolmaydı, hesh nárse ósip te shıqpaydı, hesh qanday shóp te kógermeydi. Elińiz Jaratqan Iyeniń lawlaǵan ǵázebinen jer menen jeksen bolǵan Sodom, Gomora, Adma hám Seboyım sıyaqlı bolıp qaladı. 24Pútkil xalıqlar: „Jaratqan Iye bul elge ne ushın bunday qıldı? Bunday ǵázeptiń tógiliwiniń sebebi nede eken?“– deydi. 25Sonda olarǵa mınaday juwap boladı: „Bul xalıq ata-babalarınıń Qudayı Jaratqan Iyeniń kelisiminen bas tarttı. Jaratqan Iye olardı Mısırdan alıp shıqqanda, olar menen usı kelisimdi dúzgen edi. 26Olar ózleri tanımaǵan, Jaratqan Iye ózlerine úles qılıp bermegen basqa qudaylarǵa xızmet etip, tabınıp ketti. 27Sol sebepli Jaratqan Iyeniń ǵázebi qaynap, usı kitapta jazılǵan barlıq náletlerdi usı elge jawdırdı. 28Ol qattı ashıwlanıp, kúshli ǵázebi menen olardı óz elinen suwırıp alıp, búgin kórip turǵanıńızday, basqa elge ılaqtırıp jiberdi. Olar búginge deyin sol ellerde jasap atır“.

29Jasırın qılmıslar Qudayımız Jaratqan Iyege tiyisli. Biraq ashılǵan qılmıslardı usı nızamnıń shártleri boyınsha jazalaw máńgige bizlerge hám urpaqlarımızǵa tapsırılǵan».