‏ Deuteronomy 31

Eshuanıń Muwsanıń ornına tayınlanıwı

(San 27:15-23)

1Muwsa pútkil Izrail xalqına joqarıdaǵı sózlerdi aytıp bolǵannan keyin, 2bılay dedi: «Házir men bir júz jigirma jastaman. Bunnan bılay, men sizlerge basshılıq ete almayman. Onnan qala berse, Jaratqan Iye maǵan: „Iordan dáryasınıń arǵı jaǵına ótpeyseń“, – dep aytqan edi. 3Sizler Qudayıńız Jaratqan Iyeniń basshılıǵında Iordannıń arǵı jaǵına ótesiz. Ol sol jerde jasaytuǵın xalıqlardı joq qıladı. Sizler olardıń ellerin múlik etip, iyelep alasız. Jaratqan Iyeniń sózi boyınsha Eshua sizlerge basshılıq qıladı. 4Jaratqan Iye amor xalqınıń patshaları Sixon menen Ogtı óltirip, olardıń elin joq qılǵanınday, sol xalıqlardı da joq qıladı. 5Jaratqan Iye olardı sizlerge táslim qıladı. Olarǵa men sizlerge buyırǵanımday isleńler. 6Kúshli hám batır bolıńlar! Olardan qorqıp, seskenip júrmeńler. Óytkeni Qudayıńız Jaratqan Iye sizler menen birge baradı. Ol sizlerdi tárk etpeydi hám taslap ketpeydi».

7Sonnan keyin, Muwsa Eshuanı shaqırıp alıp, pútkil izraillılardıń aldında oǵan bılay dedi: «Kúshli hám batır bol! Sebebi sen Jaratqan Iye ata-babalarıńızǵa beremen dep ant ishken elge bul xalıq penen birge barasań hám eldi múlik etip, olarǵa sen bereseń. 8Jaratqan Iyeniń Ózi seniń aldıńda júrip, saǵan yar boladı. Ol seni tárk etpeydi hám taslap ketpeydi. Qorqpa hám qáweterlenbe».

Hár jeti jılda nızamnıń oqılıwı

9Muwsa usı nızamdı jazıp, Jaratqan Iyeniń Kelisim sandıǵın alıp júrgen lebiyli ruwxaniylerge hám Izrail xalqınıń barlıq aqsaqallarına berdi. 10Keyin Muwsa olarǵa bılay dep buyırdı: «Hár jetinshi jıldıń, qarızlar keship jiberiletuǵın jıldıń aqırında, Qos bayramında usı nızamdı oqıńlar. 11Qudayıńız Jaratqan Iyeniń tańlaǵan jerinde, Onıń aldında jıynalǵan pútkil Izrail xalqına usı nızamdı oqıp berińler. 12Barlıq erkeklerdi, hayallardı, balalardı hám qalalarıńızda jasap atırǵan kelgindilerdi jıynań. Solay etip, olardıń hár biri onı esitip, úyrenip alsın hám Qudayıńız Jaratqan Iyeden qorqsın. Usı nızamnıń barlıq sózlerin muqıyatlı túrde orınlasın. 13Nızamdı bilmeytuǵın urpaqlarıńız da esitsin. Solay etip, sizler múlik etetuǵın Iordan dáryasınıń arǵı jaǵındaǵı elde, olar ómiri dawamında Qudayıńız Jaratqan Iyeden qorqıwdı úyrensin».

Jaratqan Iyeniń Muwsaǵa bergen eń sońǵı buyrıǵı

14Jaratqan Iye Muwsaǵa: «Seniń ólimiń jaqınlap qaldı, Eshuanı shaqır hám ekewińiz de Ushırasıw shatırına keliń. Men oǵan orınlaytuǵın wazıypaların tapsıraman», – dedi. Muwsa menen Eshua Ushırasıw shatırına barıp turdı. 15Keyin Jaratqan Iye minara sıyaqlı bult ishinde kórindi. Bult shatırdıń kirer awzınıń aldında turdı. 16Jaratqan Iye Muwsaǵa bılay dedi: «Jaqında ólip, ata-babalarıńa qosılasań. Al bul xalıq ózleri kiretuǵın elde Maǵan opasızlıq qıladı, sol eldiń qudaylarına erip, xızmet etip ketedi. Olar Mennen bas tartıp, olar menen dúzgen kelisimimdi buzadı. 17Sonda Men olarǵa ǵázeplenip, taslap ketemen hám olardan júzimdi jasıraman. Olar basqalarǵa ańsat olja bolıp qaladı. Baslarına sansız qayǵılar hám apatlar kelgen kúni, olar: „Usı qayǵılardıń basımızǵa túsiwi Qudayımız bizler menen birge bolmaǵanı ushın emes pe?“– deydi. 18Basqa qudaylarǵa erip, qılǵan jawızlıqları ushın, sol kúni Men sózsiz olardan júzimdi jasıraman.

19Endi ózlerińiz ushın mına jırdı jazıp alıń, onı izraillılarǵa úyretiń hám olar yadlap alsın. Solay etip, bul jır izraillılarǵa qarsı Meniń gúwalıǵım bolsın. 20Men ata-babalarına ant ishkenimdey, olardı sút hám pal aǵıp turǵan jerge alıp kiremen. Olar iship-jep toyınıp, semiredi de, basqa qudaylarǵa eredi hám olarǵa xızmet etip ketedi. Olar Meni kózge ilmey bas tartıp, kelisimimdi buzadı. 21Al baslarına sansız qayǵı hám apatlar túskende, bul jır olarǵa qarsı gúwalıq boladı. Sebebi olardıń áwladları bul jırdı umıtpaytuǵın boladı. Men beremen dep ant ishken elge olardı alıp kelmesimnen aldın, olardıń qanday niyetleri bar ekenin bilemen». 22Sol kúni Muwsa usı jırdı jazıp alıp, izraillılarǵa úyretti.

23Jaratqan Iye Nun ulı Eshuaǵa mınaday buyrıq berdi: «Kúshli hám batır bol! Sen Izrail xalqın Men olarǵa beremen dep ant ishken elge alıp barasań. Men seniń menen birge bolaman».

24Muwsa nızamnıń barlıq sózlerin aqırına deyin orama kitapqa jazıp bolǵannan keyin, 25Jaratqan Iyeniń Kelisim sandıǵın alıp júrgen lebiylilerge mına buyrıqtı berdi: 26«Mına Nızam kitabın alıp, Qudayıńız Jaratqan Iyeniń Kelisim sandıǵınıń janına qoyıń. Bul ol jerde sizlerge qarsı gúwalıq bolıp tursın. 27Sebebi men sizlerdiń qozǵalańshı hám qaysar ekenińizdi jaqsı bilemen. Búgin men sizlerdiń arańızda tiri bolǵanımnıń ózinde Jaratqan Iyege qarsı shıǵıp atırsız, al ólgenimnen keyin, bunnan da beter bolasız. 28Endi urıwlarıńızdıń barlıq aqsaqalların hám qadaǵalawshıların maǵan shaqırıp kelińler. Olarǵa usı sózlerdi aytayın. Aspan hám jer olarǵa qarsı gúwa bolsın. 29Meniń ólimimnen soń, sizlerdiń azǵırılıwǵa túsetuǵınıńızdı, sizlerge buyırǵan joldan shıǵıp ketetuǵınıńızdı bilemen. Waqıttıń ótiwi menen baxıtsızlıqqa duwshar bolasız. Óytkeni sizler Jaratqan Iyeniń názerinde jawız bolǵan islerdi islep, Onıń ǵázebin keltiresiz».

Muwsanıń jırı

30Sonnan keyin, Muwsa pútkil Izrail jámiyetine mına jırdı aqırına deyin aytıp berdi: