‏ Deuteronomy 5

On buyrıq

(Shıǵ 20:1-17)

1Muwsa pútkil izraillılardı bir jerge jıynap, olarǵa bılay dedi: «Háy, Izrail, búgin sizlerge aytatuǵın qaǵıydalar hám nızamlarǵa qulaq salıńlar! Olardı úyrenip, muqıyatlı túrde orınlańlar! 2Qudayımız Jaratqan Iye Xoreb tawında bizler menen bir kelisim dúzdi. 3Jaratqan Iye ata-babalarımız benen emes, al bizler menen, búgin usı jerde tiri bolǵan hámmemiz benen kelisim dúzdi. 4Jaratqan Iye sol tawda ottıń ishinen sizler menen júzbe-júz sóylesti. 5Sol waqıtta men Jaratqan Iye menen sizlerdiń arańızda turıp, Onıń sózin sizlerge jetkerdim. Sebebi sizler ottan qorqıp, tawǵa shıqpadıńız. Sonda Jaratqan Iye bılay dep ayttı:

6„Men – seni Mısırdan, qul bolǵan jerińnen alıp shıqqan Qudayıń Jaratqan Iyemen.

7Seniń Mennen basqa qudaylarıń bolmasın.

8Joqarıdaǵı aspanda, tómendegi jer júzinde hám jer astındaǵı suwlarda bolǵan hesh bir nárseniń kórinisin soǵıp, ózińe but jasama. 9Olarǵa tabınba hám xızmet qılma. Sebebi Men – seniń Qudayıń Jaratqan Iye, qızǵanıwshı Qudayman. Meni jek kórgenlerdi ákesiniń gúnası ushın balaların, olardıń úshinshi, tórtinshi áwladına shekem jazalayman. 10Biraq Meni súygenlerge hám buyrıqlarımdı orınlaǵanlarǵa mıńınshı urpaǵına deyin jaqsılıq qılaman.

11Qudayıń Jaratqan Iyeniń atın jónsiz tilińe alma. Óytkeni Jaratqan Iye atın bosqa tilge alǵanlardı jazasız qaldırmaydı.

12Qudayıń Jaratqan Iyeniń buyrıǵına muwapıq, Shabbat kúnine ámel qılıp, onı muxaddes tut. 13Altı kún jumıs islep, barlıq islerińdi isle. 14Al jetinshi kún Maǵan, Qudayıń Jaratqan Iyege arnalǵan Shabbat kúni. Sol kúni hesh qanday is qılma. Ulıń da, qızıń da, qulıń da, shorıń da, ógiziń, eshegiń hám basqa mallarıń da, arańızdaǵı kelgindi adam da hesh qanday is qılmasın. Solay etip, qul hám shorılarıń da ózińdey dem alsın. 15Mısırda qul bolǵanıńdı hám Qudayıń Jaratqan Iye seni sol jerden kúshli hám qúdiretli qolın sozıp shıǵarǵanın esle. Sonıń ushın, Qudayıń Jaratqan Iye Shabbat kúnine ámel qılıwıńdı buyırdı.

16Qudayıń Jaratqan Iye buyırǵanınday, ata-anańdı húrmetle. Sonda Qudayıń Jaratqan Iyeniń saǵan beretuǵın jerinde ómiriń uzaq boladı hám abadan turmıs keshireseń.

17Adam óltirme.

18Neke hadallıǵın buzba.

19Urlıq isleme.

20Hesh kimge qarsı jalǵan gúwalıq berme.

21Hesh bir adamnıń hayalın kúseme. Onıń úyin, atızın, qulın, shorısın, ógizin, eshegin, hesh bir nársesin kúseme“.

22Jaratqan Iye bul sózlerdi pútkil jámiyetińizge sol tawda ottıń, bulttıń, qoyıw qarańǵılıqtıń ishinen bálent dawıs penen ayttı. Bul sózlerge basqa hesh nárse qospadı. Sonnan keyin, Ol bul buyrıqlardı tegis eki tastıń ústine jazıp, maǵan berdi.

23Taw ot bolıp janıp turǵanda, qarańǵılıq ishinen dawıs esittińiz. Sonda barlıq urıw basshılarıńız hám aqsaqallarıńız meniń aldıma kelip, 24bılay dedi: „Mine, Qudayımız Jaratqan Iye bizlerge saltanatın hám ullılıǵın kórsetti hám ottıń ishinen shıqqan Onıń dawısın esittik. Búgin bizler Qudaydıń adamzat penen sóyleskenin hám adamzattıń tiri qalǵanın kórdik. 25Biraq endi bizler ne ushın ómirimizdi jáne qáwip astına qoyıwımız kerek? Bul úlken ot bizlerdi jaǵıp, joq etedi-ǵo! Eger Qudayımız Jaratqan Iyeniń dawısın jáne bir márte esitsek, onda sózsiz ólip qalamız. 26Ottıń ishinen sóylegen tiri Qudaydıń dawısın bizler sıyaqlı esitip, tiri qalǵan adam bar ma? 27Sen barıp, Qudayımız Jaratqan Iyeniń sózlerin tıńla. Sonnan keyin, Onıń barlıq sózlerin bizlerge aytıp ber. Bizler qulaq salıp, orınlaymız“.

28Jaratqan Iye sizlerdiń maǵan aytqanlarıńızdı esitip, maǵan bılay dedi: „Men bul xalıqtıń saǵan ne aytqanların esittim. Olardıń barlıq aytqanları durıs. 29Qánekey, olardıń júrekleri hámme waqıtta usınday bolsa, Mennen qorqıp, barlıq buyrıqlarıma ámel qılsa! Sonda ózleri de, urpaqları da máńgi abadan turmıs keshirer edi.

30Endi sen olarǵa barıp, shatırlarıńızǵa qaytıń, dep ayt. 31Al sen usı jerde, Meniń qasımda qal. Men saǵan barlıq buyrıqlarımdı, qaǵıydalarımdı hám nızamlarımdı beremen. Bulardı xalıqqa sen úyreteseń. Solay etip, Men olarǵa múlik etip berip atırǵan elde bulardıń hámmesine ámel qılsın“.

32Endi ońǵa da, solǵa da burılmay, Qudayıńız Jaratqan Iyeniń sizlerge bergen buyrıqların muqıyatlı túrde orınlańlar. 33Qudayıńız Jaratqan Iyeniń buyırǵan barlıq jolları menen júrińler. Sonda sizler múlik etip alatuǵın jerde aman bolıp, abadan turmıs keshirip, uzaq ómir súresizler».