Deu 6 | KaaIBT22L | STEP | «Bular Qudayıńız Jaratqan Iyeniń sizlerge úyretiw ushın maǵan bergen buyrıqları, qaǵıydaları hám nızamları. Iordan dáryasınan ótip, múlik etiw ushın baratırǵan elde olarǵa ámel qılıń.

‏ Deuteronomy 6

Eń ullı buyrıq

1 «Bular Qudayıńız Jaratqan Iyeniń sizlerge úyretiw ushın maǵan bergen buyrıqları, qaǵıydaları hám nızamları. Iordan dáryasınan ótip, múlik etiw ushın baratırǵan elde olarǵa ámel qılıń. 2 Men sizlerge berip atırǵan barlıq qaǵıyda hám buyrıqlarǵa ózlerińiz, balalarıńız hám balalarıńızdıń balaları da ámel qılıp, ómirińizdiń aqırına deyin Qudayıńız Jaratqan Iyeden qorqıp jasań. Sonda ómirińiz uzaq boladı. 3 Háy, Izrail xalqı qulaq salıń! Bulardı muqıyatlı túrde orınlań. Sonda ata-babalarıńızdıń Qudayı Jaratqan Iyeniń sizlerge aytqanınday sút hám pal aǵıp turǵan jerde ósip-ónip kóbeyesiz hám abadan turmıs keshiresiz.

4 Qulaq sal, Izrail! Jaratqan Iye – bizlerdiń Qudayımız, tánha Jaratqan Iye. 5 Qudayıńız Jaratqan Iyeni shın júregińiz, jan-tánińiz hám bar kúshińiz benen súyiń. 6 Búgin men sizlerge berip atırǵan bul buyrıqlardı júrek tórińizde saqlań. 7 Bulardı balalarıńızǵa da muqıyatlı túrde úyretiń. Úyde otırǵanda da, jolda júrgende de, jatqanda da, turǵanda da usılar tuwralı aytıp beriń. 8 Bulardı belgi qılıp, qollarıńızǵa baylap qoyıń, mańlayıńızǵa nıshan sıpatında taǵıp qoyıń. 9 Úyińizdegi esiktiń jaqlawlarına, qalalarıńızdıń dárwazalarına jazıp qoyıń».

Qudaydıń sózine qulaq salmaytuǵınlarǵa qarsı eskertiw

10 «Qudayıńız Jaratqan Iye ata-babalarıńız bolǵan Ibrayımǵa, Ísaqqa hám Yaqıpqa beremen dep ant ishken jerge sizlerdi alıp kiredi. Ol sizlerge ózlerińiz qurmaǵan úlken hám jaqsı qalalardı, 11 ózlerińiz jıynamaǵan jaqsı mal-múliklerge tolı úylerdi, ózlerińiz miynet etip qazbaǵan suw saqlaǵıshlardı, ózlerińiz ekpegen júzimzarlardı hám záytún baǵların beredi. Ol jerde iship-jep toyasızlar. 12 Sol waqıtta abaylı bolıńlar! Sizlerdi Mısırdaǵı qullıqtan alıp shıqqan Jaratqan Iyeni umıtpańlar.

13 Qudayıńız Jaratqan Iyeden qorqıńlar. Tek ǵana Oǵan xızmet etip, Onıń atı menen ant ishińler. 14 Basqa qudaylarǵa, dógeregińizdegi xalıqlardıń qudaylarına ermeńler. 15 Sebebi arańızda bolatuǵın Qudayıńız Jaratqan Iye qızǵanıwshı Qudaydur. Eger Ol ǵázeplense, sizlerdi jer júzinen joq qılıp jiberedi. 16 Massada islegenińizdey ^{▼▼ Shıǵ 17:1-7; San 20:1-13.}, Qudayıńız Jaratqan Iyeni sınamańlar. 17 Qudayıńız Jaratqan Iyeniń buyrıqların, sizlerge bergen tártip hám qaǵıydaların birewin de qaldırmay orınlańlar. 18 Jaratqan Iyeniń názerinde durıs hám jaqsı bolǵan islerdi isleńler. Sonda sizler abadan turmıs keshiresiz, Ol ata-babalarıńızǵa beremen dep ant ishken jaqsı jerdi múlik etip alasız. 19 Jaratqan Iyeniń Ózi aytqanınday, Ol sizlerdiń barlıq dushpanlarıńızdı ol jerden quwıp shıǵaradı.

20 Eger de keleshekte balalarıńız sizlerden: „Qudayımız Jaratqan Iye usı tártiplerdi, qaǵıydalardı hám nızamlardı sizlerge ne sebepten berdi?“– dep sorasa, 21 olarǵa bılay dep aytıńlar: „Bizler Mısırda faraonnıń qulı edik. Jaratqan Iye bizlerdi kúshli qolı menen ol jerden alıp shıqtı. 22 Ol bizlerdiń kóz aldımızda Mısırǵa, faraonǵa hám olardıń shańaraqlarına qarsı ullı, qorqınıshlı káramatlar hám belgiler kórsetti. 23 Ol ata-babalarımızǵa ant iship, wáde qılǵan jerge bizlerdi alıp keliw ushın hám ol jerdi bizlerge beriw ushın bizlerdi Mısırdan alıp shıqtı. 24 Bizlerdiń bárha baxıtlı ómir súriwimiz hám búgingidey tiri júriwimiz ushın, Qudayımız Jaratqan Iye usı qaǵıydalardıń hámmesine ámel qılıp, Onnan qorqıwımızdı buyırdı. 25 Qudayımız Jaratqan Iyeniń aldında usı buyrıqlardı muqıyatlı túrde orınlasaq, bizler haq bolamız“».