Deu 7 | KaaIBT22L | STEP | «Qudayıńız Jaratqan Iye sizlerdi múlik etip alatuǵın jerińizge alıp barǵanda, kóp xalıqlardı – xet, girgash, amor, qanan, periz, xiw hám ebus xalıqların sizlerdiń aldıńızdan quwıp shıǵaradı. Bul jeti xalıq sizlerden góre kóp hám kúshli.

‏ Deuteronomy 7

Qudaydıń xalqı

(Shıǵ 34:11-16)

1 «Qudayıńız Jaratqan Iye sizlerdi múlik etip alatuǵın jerińizge alıp barǵanda, kóp xalıqlardı – xet, girgash, amor, qanan, periz, xiw hám ebus xalıqların sizlerdiń aldıńızdan quwıp shıǵaradı. Bul jeti xalıq sizlerden góre kóp hám kúshli. 2 Qudayıńız Jaratqan Iye bul xalıqlardı sizlerge táslim etkende, olardıń ústinen jeńiske erisesiz. Sonda olardıń hámmesin tolıǵı menen joq qılıńlar! Sol xalıqlar menen kelisim dúzbeńler, olardı ayamańlar. 3 Olar menen quda-tamır bolıp, óz qızlarıńızdı olardıń ullarına turmısqa bermeńler hám olardıń qızların ullarıńızǵa alıp bermeńler. 4 Sebebi olar ul-qızlarıńızdı Jaratqan Iyeden júz burdıradı hám ul-qızlarıńız basqa qudaylarǵa xızmet etetuǵın boladı. Sonda Jaratqan Iye sizlerge ǵázeplenip, sizlerdi sol waqıttıń ózinde joq qılıp jiberedi. 5 Kerisinshe, ol xalıqlarǵa mınaday qılıńlar: olardıń qurbanlıq orınların qıyratıńlar, kiyeli tasların sındırıp taslańlar, kiyeli aǵashların shawıp taslańlar hám butların jaǵıp jiberińler. 6 Óytkeni sizler Qudayıńız Jaratqan Iyeniń muxaddes xalqısız. Jer júzindegi barlıq xalıqlardıń arasınan Ol sizlerdi Óz ǵáziynesi sıpatında tańlap aldı.

7 Jaratqan Iye sizlerdi basqa xalıqlardan kóp bolǵanıńız ushın súyip, tańlamadı. Sizler basqa barlıq xalıqlardan az edińiz. 8 Al Jaratqan Iye sizlerdi súygeni ushın hám ata-babalarıńızǵa ishken antın orınlaw ushın sizlerdi kúshli qolı menen Mısırdaǵı qullıqtan, Mısır patshası faraonnıń qol astınan azat etti. 9 Solay etip, Qudayıńız Jaratqan Iye – haqıyqıy Quday ekenin bilip alıńlar. Ol sadıq Quday, Ózin súyip, buyrıqlarına ámel qılǵanlardıń mıńınshı áwladına deyin Óz kelisiminde sadıq qalıp, jaqsılıq qıladı. 10 Biraq Ózin jek kórgenlerdi bolsa, ekilenbesten joq etedi. Awa, olardı jazalawǵa keshikpeydi. 11 Sonıń ushın, búgin men sizlerge jetkerip atırǵan buyrıqlardı, qaǵıydalardı hám nızamlardı muqıyatlı túrde orınlańlar».

Buyrıqlarǵa boysınǵanlarǵa beriletuǵın jarılqaw

12 «Eger de usı buyrıqlarǵa boysınıp, olardı tolıq orınlasańız, onda Qudayıńız Jaratqan Iye ata-babalarıńızǵa ant ishkenindey, sizler menen dúzgen kelisimine sadıq qaladı. 13 Ol sizlerge beremen dep, ata-babalarıńızǵa ant ishken elde sizlerdi súyip, jarılqap, kóbeytedi. Sizlerdiń urpaqlarıńızdı ónip-óstirip, jerińizdiń zúráátin, dán ónimlerin, jańa sharaptı, záytún mayın, pada hám súriwlerińizdi mol qıladı. 14 Basqa xalıqlardan góre, sizler kóp bereketli bolasız. Sizlerdiń arańızda násilsiz erkek te, bala kótermeytuǵın hayal da, qısır mal da bolmaydı. 15 Jaratqan Iye sizlerdi hár túrli awırıw-sırqawlardan saqlaydı. Mısırda ózlerińiz kórgen qorqınıshlı keselliklerdiń hesh birin sizlerdiń basıńızǵa salmaydı, al olardı dushpanlarıńızǵa jiberedi. 16 Qudayıńız Jaratqan Iye sizlerge táslim qılatuǵın xalıqlardıń barlıǵın qırıp taslańlar, olardı ayap otırmańlar. Olardıń qudaylarına tabınbańlar. Óytkeni olardıń qudayları sizler ushın duzaq boladı.

17 Sizler: „Bul xalıqlar bizlerden góre júdá kúshli-ǵo, olardı qalayınsha quwıp shıǵaramız?“– dep oylap atırǵan shıǵarsız. 18 Biraq olardan qorqpańlar. Qudayıńız Jaratqan Iyeniń faraonǵa hám pútkil Mısır xalqına neler islegenin esińizde saqlańlar. 19 Qudayıńız Jaratqan Iyeniń sizlerdi Mısırdan shıǵarıw ushın, olarǵa jibergen ullı apatların, kórsetken káramatların, tań qalarlıq islerin, kúshli hám qúdiretli qolın sozǵanın óz kózińiz benen kórdińiz. Qudayıńız Jaratqan Iye házir sizler qorqıp atırǵan usı xalıqlardıń hámmesine de solay isleydi. 20 Hátteki, sizlerden jasırınıp, aman qalǵanlarǵa da eshek hárre ^{▼▼ Eshek hárre – albıraw yaki qorqınısh mánisin ańlatıwı múmkin.} jiberip, olardı óltiredi. 21 Olardan qorqıp, qáweterge túspeńler. Sizlerdiń arańızdaǵı Qudayıńız Jaratqan Iye ullı hám aybatlı Qudaydur. 22 Ol usı xalıqlardı aldıńızdan az-azdan quwadı. Sizler olardı birden joq qıla almaysız. Bolmasa, átirapıńızdı jabayı haywanlar basıp ketedi. 23 Qudayıńız Jaratqan Iye sol xalıqlardı sizlerge táslim qıladı hám olardıń hámmesin albırawshılıq ishinde qaldırıp, joq qıladı. 24 Olardıń patshaların da sizlerge táslim qıladı. Sizler olardıń atların jer júzinen óshirip taslaysız. Hesh kim sizlerge qarsı tura almaydı, sizler hámmesin qırıp taslaysız. 25 Olardıń qudaylarınıń músinlerin jaǵıp jiberińler. Sol músinler qaplanǵan gúmis hám altınǵa qızıǵıp, olardı ózlerińizge almańlar. Eger alsańız, onda olar sizlerge duzaq boladı. Bul músinler Qudayıńız Jaratqan Iyege jerkenishlidur. 26 Usı jerkenishli zatlardı úyińizge alıp barmańlar, bolmasa, olar sıyaqlı sizler de joq qılınasız. Sizler sol butlardı jek kórip, olardan jerkeniwińiz kerek, sebebi olar ǵarǵıstıń astında bolıp, joq qılınıwı kerek».