Deu 8 | KaaIBT22L | STEP | «Búgin men sizlerge berip atırǵan buyrıqlardıń hámmesin muqıyatlı túrde orınlańlar, sonda jasaysız hám kóbeyesiz. Jaratqan Iyeniń ata-babalarıńızǵa beremen dep ant ishken jerin múlik etip alasızlar.

‏ Deuteronomy 8

Jaratqan Iyeni umıtpańlar

1 «Búgin men sizlerge berip atırǵan buyrıqlardıń hámmesin muqıyatlı túrde orınlańlar, sonda jasaysız hám kóbeyesiz. Jaratqan Iyeniń ata-babalarıńızǵa beremen dep ant ishken jerin múlik etip alasızlar. 2 Qudayıńız Jaratqan Iye sizlerdi qırıq jıl dawamında shólde alıp júrdi, sol júrgen uzaq jolıńızdı este saqlańlar! Sizlerdiń júregińizde ne bar ekenin hám Onıń buyrıqlarına boysınatuǵınıńız, ya boysınbaytuǵınıńızdı biliw ushın, sizlerge qıyınshılıq jiberip, sınadı. 3 Ol sizlerdi ash qaldırıp, boysındırdı. Keyin ózlerińiz de, ata-babalarıńız da kórmegen manna menen toydırdı ^{▼▼ Shıǵ 16:31.}. Bunı adamnıń tek ǵana nan menen emes, al Jaratqan Iyeniń awzınan shıqqan hár bir sóz benen jasaytuǵının sizlerge úyretiw ushın isledi. 4 Sol qırıq jıl dawamında ya kiyimlerińiz tozbadı, ya ayaqlarıńız isip ketpedi. 5 Mınanı este tutıńlar: áke balasın qalay tárbiyalasa, Qudayıńız Jaratqan Iye de sizlerdi solay tárbiyalaydı.

6 Sonlıqtan Qudayıńız Jaratqan Iyeniń buyrıqlarına boysınıp, kórsetken jolı menen júriń hám Onnan qorqıń. 7 Ol sizlerdi jaqsı bir jerge alıp baradı. Ol jerdiń dáryaları, bulaqları hám tawlar menen oypatlıqlarda jer astınan shıǵatuǵın suwları, 8 biydayı, arpası, júzimi, ánjiri, anarı, záytún aǵashları hám palı bar. 9 Sol elde toyıp nan jeysizler, hesh qanday mútájlik kórmeysizler. Ol sonday el, taslarınan temir, tawlarınan mıs alasızlar.

10 Sol jerde iship-jep toyǵanıńızda, sizlerge bergen ónimdar el ushın, Qudayıńız Jaratqan Iyege shúkirlik bildirińler. 11 Qudayıńız Jaratqan Iyeni umıtpańlar, búgin men sizlerge jetkerip atırǵan Onıń buyrıqların, nızamların hám qaǵıydaların orınlamay qalıwdan saq bolıńlar. 12 Jáne, qarnıńız toyıp, sulıw úyler salıp, jaylasıp alǵanda, 13 iri hám mayda mallarıńız kóbeyip, gúmis-altınlarıńız hám mal-dúnyańız artqanda, 14 menmen bolıp ketpeńler! Sizlerdi Mısır elindegi qullıqtan alıp shıqqan Qudayıńız Jaratqan Iyeni umıtpańlar! 15 Jaratqan Iye sizlerdi záhárli jılanlar hám shayanlarǵa tolı sol úlken hám qorqınıshlı shólden, qurǵaq hám suwsız jerlerden alıp ótti. Ol jerde sizler ushın jartastan suw shıǵardı. 16 Ata-babalarıńız kórmegen manna menen shólde sizlerdi toydırdı. Aqıbetinde sizlerge jaqsılıq alıp keliw ushın, sizlerdi qıyınshılıqqa duwshar etip, sınadı. 17 Sizler: „Usı mal-dúnyanı óz kúsh-quwatım menen taptım“, – dep oylamańlar. 18 Al sol mal-dúnyanı jıynawǵa sizlerge kúsh-quwat bergen Qudayıńız Jaratqan Iye ekenin esińizde tutıńlar. Ol ata-babalarıńız benen dúzgen kelisimine sadıq bolǵanı ushın, onı búgin orınlap atır.

19 Búgin men sizlerdi qatal eskertemen: eger Qudayıńız Jaratqan Iyeni umıtıp, basqa qudaylardıń izine erip ketseńiz, olarǵa xızmet etip, aldında tabınsańız, onda sózsiz joq bolıp ketesiz! 20 Qudayıńız Jaratqan Iye sizlerdiń aldıńızdan basqa xalıqlardı joq qılıp atırǵanınday, Oǵan boysınbaǵanıńız ushın, sizlerdi de joq qıladı».