‏ Deuteronomy 9

Jaratqan Iyeniń xalıqqa jerdi beriwiniń sebebi

1«Qulaq salıń, háy, Izrail xalqı! Sizler búgin ózlerińizden kóp hám kúshli bolǵan xalıqlardıń jerlerin múlik etiw ushın, Iordan dáryasınan ótesiz. Olardıń úlken qalaları aspanǵa tiyer diywallar menen qorshalǵan. 2Sol kúshli, uzın boylı xalıq Anaq áwladınan. Olardı ózlerińiz bilesiz. Olar haqqında: „Anaq áwladlarına kim qarsı shıǵa alar eken?“– degen sózlerdi esitkensizler. 3Biraq búgin mınanı bilip qoyıńlar: Qudayıńız Jaratqan Iye jalmamay jutatuǵın jalın sıyaqlı sizlerdiń aldıńızdan baradı. Ol Anaq áwladların jeńiliske ushıratıp, sizlerge bas iydiredi. Sonda Jaratqan Iye sizlerge wáde bergenindey, olardı quwıp, bir maydanda joq qılasız.

4Qudayıńız Jaratqan Iye sol xalıqlardı sizlerdiń aldıńızdan quwıp shıǵarǵannan keyin, sizler ózlerińizshe: „Jaratqan Iye haqlıǵımız sebepli bul eldi iyelewimiz ushın, bizlerdi usı jerge alıp keldi“, – dep oylap júrmeńler. Óytkeni Jaratqan Iye bul xalıqlardı islegen jawızlıqları ushın, sizlerdiń aldıńızdan quwıp atır. 5Sizler óz ádilligińiz hám kewlińizdiń haqlıǵı sebepli olardıń jerlerin múlik etip alıp atırǵan joqsız. Qudayıńız Jaratqan Iye bul xalıqlardı islegen jawızlıqları sebepli sizlerdiń aldıńızdan quwıp atır. Usılayınsha, Ol ata-babalarıńız Ibrayım, Ísaq hám Yaqıpqa ant iship, bergen wádesin orınlaydı. 6Mınanı bilip qoyıńlar: Qudayıńız Jaratqan Iye sizlerge bul jaqsı jerdi haq bolǵanıńız ushın berip atırǵan joq. Kerisinshe, sizler qaysar bir xalıqsız».

Tana súlderindegi but hám Muwsanıń xalıq ushın jalbarınıwı

7«Qudayıńız Jaratqan Iyeni shólde qanshelli ǵázeplendirgenińizdi esińizde saqlań, hasla umıtpańlar. Mısırdan shıqqan kúnnen baslap, usı jerge jetip kelgenge deyin hámme waqıtta Jaratqan Iyege qarsı bas kóterip keldińiz. 8Xoreb tawında Jaratqan Iyeniń ǵázebine tiygenińiz sonshelli, Ol sizlerdi joq qılıp jibereyin dep qaldı. 9Sonda men eki tastı, yaǵnıy Jaratqan Iyeniń sizler menen dúzgen kelisim tasların alıw ushın, tawǵa shıqqan edim. Men ol jerde qırıq kún, qırıq tún bolıp, hesh nárse iship-jemedim. 10Jaratqan Iye Óz qolı menen jazǵan eki tastı maǵan berdi. Bul taslarda sizler tawda jıynalǵan kúni Jaratqan Iyeniń ot ishinen sizlerge aytqan buyrıqlarınıń hámmesi jazılǵan edi. 11Sol qırıq kún, qırıq túnnen keyin Jaratqan Iye maǵan eki tastı, kelisim tasların berdi.

12Sonnan keyin, Jaratqan Iye maǵan: „Qáne, bul jerden dárhal tómen tús. Sebebi Mısırdan alıp shıqqan xalqıń joldan azǵırıldı. Olar Men buyırǵan joldan shıǵıp, ózlerine bir but músinin islep aldı“, – dedi. 13Jaratqan Iye maǵan jáne: „Bul xalıqtıń haqıyqattan qaysar xalıq ekenin kórdim! 14Endi Meni toqtatıp qalma. Men olardıń hámmesin joq qılıp, atların jer júzinen óshirip taslayman. Al sennen olardan góre kúshlirek hám kóbirek xalıq dóretemen“, – dedi.

15Solay etip, men tawdan tómenge tústim. Taw ot bolıp janıp turǵan edi. Meniń qolımda eki kelisim tası bar edi. 16Sonda men sizlerdiń Qudayıńız Jaratqan Iyege qarsı gúna islep, ózlerińizge tananıń súlderindegi buttı islep alǵanıńızdı kórdim. Sizler Jaratqan Iyeniń bergen jolınan dárhal shıǵıp ketken edińiz. 17Sol sebepli qolımdaǵı eki kelisim tasın ılaqtırıp jiberip, sizlerdiń kóz aldıńızda sındırıp tasladım. 18Sonnan keyin, men kóp gúnańız sebepli, jáne Jaratqan Iyeniń aldında uzaq waqıt, qırıq kún, qırıq tún hesh nárse iship-jemey, et betimnen jerge jatıp, sizler ushın jalbarındım. Sebebi Jaratqan Iyeniń názerinde jawız bolǵan isti islep, Onıń ǵázebin keltirgen edińiz. 19Men Jaratqan Iyeniń janıp turǵan ǵázebiniń aldında qattı qorqqan edim. Onıń ǵázebi sonshelli lawlap ketkenlikten, Ol sizlerdi joq qılmaqshı edi. Degen menen, Jaratqan Iye bul ret te meniń jalbarınıwıma qulaq saldı. 20Jaratqan Iye Xaronǵa da qattı ǵázeplenip, onı óltirmekshi edi. Biraq sol waqıtta Xaron ushın da jalbarınǵan edim. 21Al men sizlerdiń gúnalı isińizdi, yaǵnıy tanaǵa megzetip islegen butıńızdı alıp, jaǵıp jiberdim. Onı bóleklep, untaqlap ezdim de, keyin onı tawda aǵıp turǵan bulaqqa shashıp jiberdim.

22Sizler jáne, Taberada da, Massada da, Kibrot-Hattaawada da Jaratqan Iyeniń ǵázebin keltirdińiz. 23Jaratqan Iye Qadesh-Barniyadan sizlerdi jiberip: „Barıńlar, sizlerge berip atırǵan eldi múlik etip, iyelep alıńlar“, – dep buyırǵanda da, sizler Onıń buyrıǵına qarsı shıqtıńız. Sizler Oǵan isenbedińiz, sózlerine de qulaq salmadıńız. 24Men sizlerdi tanıǵanımnan baslap, házirge deyin Jaratqan Iyege qarsı shıǵıp, bas kóterip kiyatırsız.

25Jaratqan Iye sizlerdi joq etetuǵının aytqanlıqtan, men Onıń aldında sol qırıq kún, qırıq tún boyı et betimnen jerge jatıp alǵan edim. 26Sonda men Jaratqan Iyege bılay dep jalbarınǵan edim: „Quday Iye, Sen Óz ullılıǵıń menen azat etip, qúdiretli qolıń menen Mısırdan alıp shıqqan xalqıńdı, Óz múlkińdi joq etpe. 27Qullarıń Ibrayımdı, Ísaqtı hám Yaqıptı esle. Bul xalıqtıń qaysarlıǵına, jawızlıqları menen gúnalarına itibar berme. 28Bolmasa, Sen bizlerdi alıp shıqqan eldiń xalqı: Jaratqan Iye olardı wáde qılǵan jerine alıp bara almadı. Ol sol xalıqtı jek kórgeni ushın, shólde joq qılıw maqsetinde olardı Mısırdan alıp shıqqan eken, – dep aytadı. 29Biraq olar ullı kúshiń hám qúdiretli qolıń menen Mısırdan alıp shıqqan Ózińniń xalqıń hám múlkińdur“».