Deu 15 | KaaIBT22L | STEP | «Hár jetinshi jıldıń aqırında sizlerge qarızdar bolǵanlardı qarızlarınan keship jiberińler.

‏ Deuteronomy 15

Jetinshi jıl

1 «Hár jetinshi jıldıń aqırında sizlerge qarızdar bolǵanlardı qarızlarınan keship jiberińler. 2 Qarızlardı keship jiberiw ushın bılay isleńler: izraillı bir tuwısqanına qarız bergen hár bir adam qarızın keship jibersin hám onnan qaytıp talap qılmasın. Sebebi Jaratqan Iyeniń Ózi qarızlardı keship jiberiliwdi járiyaladı. 3 Jat jerli adamnan qarızıńızdı sorasańız boladı. Biraq izraillı tuwısqanıńa bergen qarızıńnan keship jiberiwiń tiyis.

4 Sizlerdiń arańızda hesh qanday jarlı adam bolmasın. Qudayıńız Jaratqan Iye múlik etip berip atırǵan elde sizlerge bereket beredi. 5 Tek ǵana Qudayıńız Jaratqan Iyeniń sózine qulaq salıp, búgin men sizlerge jetkerip atırǵan usı buyrıqlardı muqıyatlı túrde orınlawıńız kerek. 6 Qudayıńız Jaratqan Iye Ózi wáde bergenindey sizlerge bereket beredi. Sonda sizler kóp xalıqlarǵa qarız beretuǵın bolasız, al ózlerińiz qarız almaysız. Kóp xalıqlardıń ústinen húkimdarlıq qılasız, biraq olar sizlerge húkimdarlıq etpeydi.

7 Qudayıńız Jaratqan Iye sizlerge beretuǵın eldegi qalalardıń birinde izraillı tuwısqanıńızdıń biri jarlı bolsa, júreklerińizdi tas qılmay, járdem qolıńızdı ayamańlar. 8 Kerisinshe, sizler ashıq qol bolıńlar hám oǵan mútájligine qarap, qarız berińler. 9 Saq bolıńlar, qarızlardı keship jiberetuǵın jetinshi jıl jaqınlap qalǵanı ushın, jarlı tuwısqanıńızǵa járdem beriwden bas tartpańlar. Kewlińizde usınday jaman oyǵa jol qoymańlar. Eger de sonday tuwısqanıńızǵa járdem beriwden bas tartsańız, onda ol Jaratqan Iyege nalıydı hám ózlerińizge gúna arttırıp alasız. 10 Oǵan qıynalmastan ashıq kewlińiz benen qarız berińler. Sonda Qudayıńız Jaratqan Iye sizlerdiń qol urǵan hár bir isińizge bereket beredi. 11 Elińizde hámme waqıtta jarlı adamlar boladı. Sonıń ushın, elińizdegi járdemge mútáj jarlı tuwısqanlarıńızǵa hámme waqıtta járdem qolıńız ashıq bolıwın buyıraman».

Qul hám shorılar haqqında

12 «Eger evrey tuwısqanıńızdan bir erkek yamasa hayal sizge ózin xızmetke satsa, ol altı jıl saǵan xızmet etsin, al jetinshi jılı onı azat qılıwıń tiyis. 13 Onı azat qılǵanıńızda, qolın bos jibermeń. 14 Oǵan súriwińizdegi malıńızdan, dánińizden hám sharabıńızdan mol-mol etip beriń. Qudayıńız Jaratqan Iyeniń sizlerge bergen bereketinen, oǵan da beriń. 15 Mısırda qul bolǵanıńızdı hám Qudayıńız Jaratqan Iye sol jerden sizlerdi azat etkenin este tutıńlar. Sonıń ushın da, búgin men sizlerge usı buyrıqtı berip atırman.

16 Eger qulıńız sizdi hám shańaraǵıńızdı jaqsı kórip, sizler menen birge qalıwdı qálese hám „Siziń qasıńızdan ketiwdi qálemeymen“, dep aytsa, 17 onda onı esigińizdiń qasına alıp barıń. Keyin onıń qulaǵın esikke qoyıp, biz benen tesiń. Sonda ol ómiri boyı qulıńız bolıp qaladı. Shorıńızǵa da solay islewińiz kerek. 18 Qulıńızdı azat qılǵanıńızda ókinbeń. Sebebi sizge xızmet etken sol altı jıl dawamında, ol jallanba xızmetshiden góre eki ese kóp jumıs isledi. Onı azat qılsańız, Qudayıńız Jaratqan Iye sizlerdiń qol urǵan hár bir isińizge bereket beredi».

Iri hám mayda mallardıń birinshi tuwılǵan tólleri haqqında

19 «Iri hám mayda mallarıńızdıń birinshi tuwılǵan hár bir erkek tólin Qudayıńız Jaratqan Iyege baǵıshlańlar. Malıńızdıń birinshi tuwılǵan buǵasın jumısqa qospań, birinshi tuwılǵan mayda malıńızdıń júnin qırqıp almań. 20 Bulardıń góshin shańaraǵıńız benen birge hár jılı Qudayıńız Jaratqan Iyeniń aldında, Onıń tańlap alatuǵın jerinde jeńler. 21 Eger de sol mal aqsaq yamasa soqır bolsa yamasa onıń basqa bir kemshiligi bolsa, onı Qudayıńız Jaratqan Iyege qurbanlıqqa bermeń. 22 Bunday mallardı óz qalańızda jeseńiz boladı. Pák adam bolsa da, napák adam bolsa da, jeyran yamasa suwınnıń góshindey etip sonday maldıń góshinen jewine boladı. 23 Biraq onıń góshin qanı menen birge jemeńler. Onıń qanın suw sıyaqlı topıraqqa aǵızıp jiberińler».