‏ Deuteronomy 22

1«Eger de bir izraillı tuwısqanıńızdıń adasqan sıyırın yamasa qoyın kórseńiz, ózińizdi kórmegenge salmańlar. Onı óz iyesine aparıp berińler. 2Eger de maldıń iyesi sennen uzaqta bolsa yamasa kimniń malı ekenin bilmeseń, onı ózińniń úyińe alıp bar. Maldıń iyesi malın izlep kelgen waqıtta, oǵan qaytarıp bereseń. 3Tuwısqanıńnıń eshegin, kiyimin yamasa basqa da joytqan nárselerin tawıp alǵanıńızda da anıq solay isleńler. Ózińizdi kórmegenge salmańlar.

4Jáne de, izraillı bir tuwısqanıńızdıń eshegi yamasa sıyırı jolda qulap jatırǵanın kórip qalsańız, onı kórmegenge salmańlar. Olardı ayaqqa turǵızıw ushın tuwısqanıńızǵa járdem berińler.

5Hayallar erkektiń kiyimin, erkekler hayal adamnıń kiyimin kiymesin. Qudayıńız Jaratqan Iye bunday qılǵanlardan jerkenedi.

6Jol-jónekey terekte yamasa jerde bir qustıń uyasına dus kelip qalsańız, qus máyek basıp atırǵan yamasa palapanları menen otırǵan bolsa, qustı palapanları menen birge qosıp almańlar. 7Ózińizge tek ǵana palapanların alıwıńızǵa boladı, biraq anasın bosatıp jiberińler. Sonda sizler abadan turmısqa erisip, ómirińiz uzaq boladı.

8Taza úy salǵanıńızda, tóbesin jiyeklep, qorshaw islep shıǵıńlar. Sonda úyińizdiń tóbesinen birew jerge qulap, ólip qalsa, shańaraǵıńız buǵan juwapker bolmaydı.

9Júzimzarıńızǵa júzimnen basqa egin ekpeńler. Bolmasa, ekken tuqımıńız da, júzimzarıńız da haram bolıp, ózlerińiz qollana almaysız.

10Jerdi súriw ushın eshek penen ógizdi bir gúndege qospań.

11Jún hám zıǵırdan aralastırıp toqılǵan kiyim kiymeń.

12Kiyimińizdiń etekleriniń tórt múyeshine shashaq isletip, tiktirip qoyıńlar».

Neke hadallıǵına baylanıslı qaǵıydalar

13«Eger birew úylenip, qız benen jatqannan keyin, onı unatpay qalsa 14hám onı ayıplap: „Bul qızǵa úylendim, biraq onıń menen jatqanımda, ol qız bolmay shıqtı“, – dep jaman atlı qılsa, 15qızdıń ata-anası qızınıń pákligin dálilleytuǵın tósektegi qızlıq belgini alıp, aqsaqallarǵa kórsetiw ushın qala dárwazasına alıp barsın. 16Qızdıń ákesi aqsaqallarǵa bılay desin: „Qızımdı mına jigitke uzatqan edim. Al keyin ol qızımdı unatpay qalıptı. 17Endi bolsa, qızıńız qız bolıp shıqpadı, dep jalǵan ayıplap atır. Biraq mınaw qızımnıń pákligin dálilleytuǵın qızlıq belgisi!“Keyin qızdıń ata-anası qızınıń qızlıq belgisi bar tósekti aqsaqallardıń kóz aldında jayıp, kórsetsin. 18Qala aqsaqalları úylengen jigitti ákeldirip, sabalap jazalasın. 19Jáne de, aqsaqallar sol jigitke ayıbı ushın júz shekel ▼

▼ Júz shekel – bir shekel shama menen 11 gr.

gúmis tóletsin. Jigit izraillı pák bir qızdı jaman atlı qılǵanı ushın, gúmisti qızdıń ákesine bersin. Qız sol jigittiń hayalı bolıp qalsın hám jigit ómiri dawamında qız benen ajırasıw huqıqına iye emes.

20Al eger de sol adamnıń aytqanları durıs bolıp, qızdıń pákliginiń dálili bolmasa, 21qızdı ákesiniń úyiniń esigine alıp barsın. Qala xalqı sol qızdı tas boran qılıp óltirsin. Óytkeni ol ákesiniń úyinde jasaǵan waqtında buzıqshılıq qılıp, Izrailda jerkenishli is qıldı. Solay etip, arańızdaǵı jawızlıqtı joq qılıńlar.

22Eger de bir adam basqa birewdiń hayalı menen jatqan jerinen uslansa, onda erkek te, hayal da óltirilsin. Usılay etip, Izraildan jawızlıqtı joq qılıńlar.

23Eger bir adam qalada basqa birew menen atastırılıp qoyılǵan bir qızdı ushıratıp qalıp, onıń menen jatsa, 24ekewi de qala dárwazasınıń qasına alıp barılsın hám tas boran qılıp óltirilsin. Sebebi qız qalanıń ishinde bolsa da járdem sorap, dawıslap baqırmadı, al erkek bolsa, basqa birewdiń bolajaq hayalınıń abırayın tókti. Solay etip, arańızdaǵı jawızlıqtı joq qılıńlar.

25Eger de bir adam atastırılıp qoyılǵan bir qızdı dalada ushıratıp qalıp, onı uslap alıp zorlasa, onda tek sol zorlaǵan adam ǵana óltirilsin. 26Qızǵa hesh nárse qılmańlar. Óytkeni qızdıń ólimge ılayıq hesh qanday ayıbı joq. Bul biymálel birewge hújim qılıp, onı óltirgen adamnıń isine uqsaydı. 27Sebebi ol adam atastırılǵan qızdı ashıq dalada uslap alǵan, al qız bolsa, járdem sorap, baqırǵan. Degen menen, qutqaratuǵın hesh kim bolmaǵan.

28Eger de bir adam atastırılmaǵan bir pák qızdı ushıratıp, onı uslap alsa hám onıń menen jatqan jerinen uslansa, 29qız benen jatqan adam qızdıń ákesine eliw shekel gúmis bersin. Ol qızdı zorlaǵanı ushın, oǵan úylensin hám ómiri dawamında qız benen ajırasıw huqıqına iye emes.

30Hesh kim ákesiniń hayalına úylenbesin, usılay islep, ákesin shermende qılmasın».