Deu 25 | KaaIBT22L | STEP | «Eki adamnıń arasında jánjel shıqsa, olar qazılardıń aldına barsın. Qazılar sol eki adamnıń arasındaǵı dawdı qarap shıqsın hám ayıpsızdı aqlap, al ayıplı adamdı jazaǵa tartsın.

‏ Deuteronomy 25

1 «Eki adamnıń arasında jánjel shıqsa, olar qazılardıń aldına barsın. Qazılar sol eki adamnıń arasındaǵı dawdı qarap shıqsın hám ayıpsızdı aqlap, al ayıplı adamdı jazaǵa tartsın. 2 Eger de ayıplı adam sabawǵa ılayıqlı bolsa, qazı onı jerge jatqarsın hám óziniń kóz aldında ayıbına jarasa sabatsın. 3 Ayıplı adam qırıqtan artıq sabalmasın. Eger qırıqtan asıp ketse, onda tuwısqanıńız sizlerdiń kóz aldıńızda xorlanıp qaladı.

4 Túyek aydap atırǵan ógizdiń awzın baylap qoymańlar.

Marhum tuwısqan aldındaǵı wazıypa

5 Eger birge jasap atırǵan aǵalı-inililerdiń biri perzentsiz qaytıs bolsa, marhumnıń hayalı jat adamǵa turmısqa shıqpasın. Marhumnıń tuwısqanı jesir qalǵan hayalǵa úylensin hám óziniń qáyinlik yamasa qaynaǵalıq wazıypasın orınlasın. 6 Sol hayal tuwǵan tuńǵısh ul marhumnıń atın dawam etsin. Solay etip, marhumnıń atı Izrail xalqınan óship ketpeydi. 7 Biraq sol adam marhum aǵasınıń yamasa inisiniń jesir qalǵan hayalına úyleniwden bas tartsa, jesir hayal qala dárwazasına barıp, aqsaqallarǵa bılay dep aytsın: „Marhum kúyewimniń tuwısqanı onıń atın Izrail xalqınıń arasında dawam ettiriwdi qálemey, óz wazıypasın orınlawdan bas tartıp atır“. 8 Sonda qalanıń aqsaqalları sol adamdı shaqırıp alıp, onıń menen sóylessin. Eger ol adam: „Oǵan úyleniwdi qálemeymen“, – dep turıp alsa, 9 jesir hayal marhum kúyewiniń tuwısqanınıń qasına kelsin. Hayal qala aqsaqallarınıń kóz aldında onıń bir ayaq kiyimin sheship alıp, júzine túkirip: „Tuwısqanınıń áwladın tiklewdi qálemegen adamǵa usınday islenedi“, – dep aytsın. 10 Usıdan keyin, sol adamnıń áwladı Izrailda „Ayaq kiyimi sheshilgen“, dep atalatuǵın boladı».

Basqa nızamlar

11 «Eki adam bir-biri menen tóbelesip atırǵanda, birewiniń hayalı kelip, urıp atırǵan adamnan kúyewin ayırıp alıw ushın, sol adamnıń jınısıy aǵzasınan uslasa, 12 onda hayaldıń qolın shawıp taslańlar. Onı ayap otırmańlar.

13 Dorbańızda birewi awır, ekinshisi jeńil eki túrli tárezi taslar bolmasın. 14 Úyińizde birewi úlken, ekinshisi kishkene sıyımlılıq ólsheytuǵın ıdıslar bolmasın. 15 Tárezi taslarıńız da, sıyımlılıq ólsheytuǵın ıdıslarıńız da hadal hám durıs bolsın. Sonda Qudayıńız Jaratqan Iyeniń sizlerge berip atırǵan jerinde ómirińiz uzaq boladı. 16 Qudayıńız Jaratqan Iye sonday nahaqlıq qılatuǵınlardan jerkenedi.

Amalek xalqın óltiriw haqqındaǵı buyrıq

17 Sizler Mısırdan shıqqannan keyin amalek xalqınıń sizlerge ne islegenin umıtpańlar. 18 Sizler joldan sharshap, hálsizlenip qalǵanıńızda, olar Qudaydan qorqpay sizlerge hújim qılıp, artıńızda qalǵan barlıq hálsiregenlerdi óltirgen edi. 19 Qudayıńız Jaratqan Iye sizlerge múlik etip berip atırǵan elde átirapıńızdaǵı barlıq dushpanlarıńızdı jeńip, tınıshlıqqa eriskenińizde, amalek xalqın joq qılıp, olardıń atın jer júzinen óshirip taslańlar. Bunı umıtpańlar!»