Deuteronomy 34
Muwsanıń ólimi
1Sonnan keyin, Muwsa oypatlıqtıń Moabqa tiyisli bóleginen Erixo qalasına qarsı jaylasqan Nebo tawına, Pisga tawınıń tóbesine shıqtı. Jaratqan Iye oǵan pútkil eldi kórsetti: arqadaǵı Dan qalasına deyin sozılǵan Gilad jerin, 2pútkil Naftaliy jerlerin, Efrayım hám Menashshe jerlerin, batıstaǵı teńizge deyin sozılǵan pútkil Yahuda jerlerin, 3qubladaǵı Negebti hám tegislikti. Bul Soar qalasına deyin sozılǵan Palma qalası dep atalǵan Erixo tegisligi. 4Keyin Jaratqan Iye Muwsaǵa: «Ibrayımǵa, Ísaqqa hám Yaqıpqa: „Seniń urpaǵıńa beremen“dep ant ishken el usı boladı. Mine, usı eldi kózleriń menen kóriwge múmkinshilik berdim, biraq sen ol jerge kirmeyseń», – dedi. 5Solay etip, Jaratqan Iyeniń aytqanınday, Onıń qulı Muwsa sol Moab elinde qaytıs boldı. 6Jaratqan Iye onı Beyt-Peorǵa qarama-qarsı jaylasqan Moabtaǵı oypatlıqqa kómdi. Muwsanıń qábiri qay jerde ekenligin búginge deyin hesh kim bilmeydi. 7Muwsa qaytıs bolǵanda, bir júz jigirma jasta edi. Degen menen, onıń kózi de hálsizlenbegen, kúsh-ǵayratı da qaytpaǵan edi. 8Izraillılar oypatlıqtıń Moabqa tiyisli bóleginde Muwsanı joqlap otız kún aza tuttı. Keyin Muwsa ushın azalaw kúnleri tamam boldı. 9Nun ulı Eshua danalıq ruwxı menen tolǵan edi. Óytkeni Muwsa óliminen aldın oǵan qolların qoyıp, onı jolbasshı etip tayınlaǵan edi. Izraillılar oǵan qulaq salıp, Jaratqan Iyeniń Muwsa arqalı bergen buyrıqlarına ámel qıldı. 10Izrailda sol kúnnen búginge deyin, Muwsaǵa uqsaǵan payǵambar bolmadı. Sebebi Jaratqan Iye Muwsa menen júzbe-júz kórisip, sóylesetuǵın edi. 11Jaratqan Iye onı Mısırda faraonǵa, onıń xızmetkerlerine hám pútkil Mısır xalqına Óz káramat hám belgilerin kórsetiw ushın jibergen edi. 12Muwsa pútkil Izrail xalqınıń kóz aldında qúdiretli, ullı hám qorqınıshlı isler islegen edi.
Copyright information for
KaaIBT22L