‏ Ecclesiastes 1

Jumbaqlı dúnya

1Bular Dawıttıń ulınıń, Erusalimde patshalıq etken Wazshınıń sózleri: 2«Biyhuda, biyhuda, – deydi Wazshı, – hámmesi biyhuda!»

3Quyash astında islegen barlıq miynetinen,
Adam ne payda tabar?
4Bir áwlad keter, bir áwlad keler,
Al dúnya máńgige usılay qala berer.
5Kún shıǵar, kún batar,
Keyin ol shıqqan ornına qaytıwǵa asıǵar.
6Samal qublaǵa eser, keyin arqaǵa aylanar.
Ol aylanıp-aylanıp esip,
Qaytıp óz jolına túser.
7Barlıq dáryalar teńizge quyar,
Biraq teńiz hesh tolmas.
Dáryalar aqqan jaqqa qaytadan aǵa berer.
8Hámme nárse jalıqtıradı,
Adam olardı sóz benen jetkere almas.
Kóz kóriwden,
Qulaq esitiwden toymas.
9Aldın ne bolǵan bolsa, jáne bolar.
Ne qılınǵan bolsa, jáne qaytalanar.
Quyash astında hesh qanday jańa nárse joq.
10Qanday da bir nárse bar ma: «Qarańlar, mınaw jańalıq-ǵo», – dep ayta alǵanday?
Biraq ol nárse de áyyemnen, bizlerden ásirler aldın bar edi.
11Burın bolǵanlar eske alınbas,
Keleshekte bolatuǵınlar da olardan keyingiler arasında eske alınbas.

Danalıq izlewdiń paydası joq

12Men, Wazshı, Erusalimde Izrail patshası edim. 13Ózimdi aspan astında islenip atırǵan nárselerdiń hámmesin danalıq penen izertlewge hám úyreniwge baǵıshladım. Qudaydıń adam balasına bergen júgi qanday awır! 14Men quyash astında islenip atırǵan barlıq islerdi kórdim: olardıń hámmesi biyhuda, hámmesi samaldıń izinen quwǵanǵa uqsaydı eken.

15Qıysayǵan nárseni dúzetip bolmas,
Joq nárseni sanap bolmas.

16Men ózime ózim bılay dedim: «Mine, men ullılıqta hám danalıqta Erusalimde ózimnen aldın biylik etkenlerdiń hámmesinen de ilgerilep, ozıp kettim. Mol danalıq hám bilimdi iyelep aldım». 17Men ózimdi danalıqtı biliwge, jáne aqılsızlıq penen aqmaqlıqtı biliwge baǵıshladım. Sonda bunıń da samaldıń izinen quwǵanǵa uqsaytuǵının túsindim.

18Kóp bilgen sayın, qapashılıq ta kóbeyer.
Kóp túsingen sayın, dárt te asıp barar.