Ecc 11 | KaaIBT22L | STEP | Nanıńdı basqalarǵa bergende, qıynalmay ber, Sonda kúnler ótip, ol ózińe qaytıp keler.

‏ Ecclesiastes 11

Keleshekti oyla

1 Nanıńdı basqalarǵa bergende, qıynalmay ber,
Sonda kúnler ótip, ol ózińe qaytıp keler.
2 Barıńnan jeti yamasa segiz adamǵa pay ber,
Jer betinde qanday apatshılıq bolajaǵın bilmeyseń.
3 Bultlar toyınǵanda,
Jer betine jawın jawdıradı.
Terek qublaǵa qaray qulasa da, arqaǵa qaray qulasa da,
Ol qulaǵan jerinde qaladı.
4 Samal qattı esse, tuqım seppes,
Bult qoyıw bolsa, zúráátin ormas.

5 Samaldıń qay jaqtan esetuǵının hám qursaqtaǵı balanıń súyeginiń qalay payda bolatuǵının bilmeytuǵınıń sıyaqlı,
Hámme nárseni isleytuǵın Qudaydıń islerin de bile almaysań.

6 Azanda tuqım sep,
Keshte de qolıń bos turmasın.
Olardıń qaysısınıń ónimli bolatuǵının bilmeyseń.
Anawsı ma, mınawsı ma?
Bálkim ekewi de jaqsı ónim berer.

7 Jaqtılıq tatlı,
Quyashtı kóriw kózge jaǵımlı.
8 Adam qansha kóp jasasa da,
Bárqulla quwanıp jasasın.
Biraq qarańǵı kúnlerdiń bar ekenin de umıtpasın.
Olar da az emes.
Ne júz bermesin, bári de biyhuda.

Jaslıqtıń qádirin bil

9 Háy, óspirim! Jaslıq shaqta kewil kóter.
Jaslıq shaǵıńda júregiń seni shadlıqqa bólesin.
Kewliń kúsegen, kóziń qálegen nárseni isle.
Biraq bulardıń barlıǵı ushın, Qudaydıń seni húkim qılatuǵının bilip qoy.
10 Sonlıqtan júrekten qayǵını quwıp,
Deneńnen azaptı alıp tasla.
Balalıq ta, jaslıq ta tez ótip ketedi.