‏ Ecclesiastes 2

Keypi-sapanıń biyhudalıǵı

1Men ózime: «Qáne, endi ráhátlenip, kewil-xoshlıq etip kóreyin», – dedim. Biraq ol da biyhuda eken. 2Men kúlki haqqında: «Aqılsızlıq», – dedim, al kewil-xoshlıq haqqında: «Ne keregi bar?» – dedim. 3Danalıǵım basshılıǵında denemdi sharap penen sınap kóriw ushın aqmaqlıqqa beriliwdi sheshtim. Usılayınsha, adamlar aspan astındaǵı qısqa ómirinde nelerdi islese paydalı bolatuǵının bilmekshi boldım.

4Men ullı isler isledim: ózime úyler qurdım, júzim baǵların ósirdim, 5baǵlar hám sulıw toǵaylar jarattım, ol jerlerge túrli miywe aǵashların otırǵızdım, 6Aǵashlardı suwǵarıw ushın háwizler qurdım, 7qul hám shorılar satıp aldım, úyimde tuwılǵan qul hám shorılarım da bar edi, iri hám mayda mallarım da sonshelli kóp edi. Mennen aldın Erusalimde jasaǵanlardıń hesh birinde bunshelli kóp mal bolmaǵan. 8Ózime gúmis hám altın jıynadım, patshalardan hám wálayatlardan ǵáziyne topladım, hayal hám erkek qosıqshılarǵa iye boldım, erkekke unaytuǵın sulıw toqallardı alıp kewlimdi xoshladım. 9Solay etip, men ullılıqqa erisip, ózimnen aldın Erusalimde jasaǵanlardıń hámmesinen asıp tústim. Danalıǵım da meni tárk etpedi. 10Kózim túsip, unatqannıń hesh qaysısınan bas tartpadım.
Kewlim kúsegen nársege shek qoymadım.
Qılǵan hár bir isimnen kewlim xosh boldı.
Pútkil miynetime berilgen pay usı boldı.
11Biraq óz qollarım menen islegen islerime,
Qılǵan hámme miynetlerime qarasam,
Bulardıń hámmesi biyhuda, samaldıń izinen quwǵanday nárse ekenin,
Quyash astında hesh qanday paydalı nárse joq ekenin kórdim.

Danalıq hám aqılsızlıq

12Sonnan keyin, jáne danalıq, aqılsızlıq hám aqmaqlıqtıń ne ekenin kórmekshi boldım.
Patsha miyrasxorı álle qashan islengen islerden basqa neler isley alar edi?
13Jaqtılıqtıń qarańǵılıqtan jaqsıraq bolǵanı sıyaqlı,
Danalıqtıń da aqılsızlıqtan jaqsıraq ekenin kórdim.
14Dana júrer jolın biler,
Al aqılsız qarańǵılıqta júrer.
Biraq men ekewiniń de ómiriniń aqıbetiniń birdey ekenin túsindim.
15Sonda men ishimnen bılay dedim: «Aqılsızdıń basına ne tússe, meniń basıma da sol túsedi.
Onda júdá aqıllı bolıwdıń ne keregi bar?»
Jáne ózime ózim: «Bul da biyhuda», – dedim.
16Aqılsız da, dana da,
Uzaq este saqlanbaydı,
Ekewi de tez arada umıtıladı.
Dana da aqılsız benen birdey ólim kórmey me?
17Usılayınsha men ómirdi jek kórdim.
Sebebi quyash astında islengen hár bir is maǵan júdá qayǵılı kórindi.
Hámmesi biyhuda, samaldıń izinen quwǵanday nárse eken.

Miynettiń biyhudalıǵı

18Men quyash astında islegen pútkil miynetimdi jek kórdim. Sebebi olardı ózimnen keyingi adamǵa qaldırıwım kerek edi. 19Ol dana bola ma, aqılsız bola ma, kim biledi? Bári bir ol meniń quyash astında miynet etip, aqıl menen eriskenlerimniń hámmesine iyelik qıladı. Bul da biyhuda. 20Sonlıqtan men quyash astında islegen barlıq miynetlerime ashına basladım. 21Adam danalıǵı, bilimi hám uqıbı menen miynet etedi, keyin bulardıń hámmesi, tap onıń payı sıyaqlı bularǵa hesh miyneti sińbegen adamǵa qalıwı kerek boladı. Bul da biyhuda, bul – ullı azap! 22Quyash astında islegen miynetinen hám urınıwlarınan adam nege erisedi? 23Onıń barlıq kúnleri dártke, jumısları qayǵıǵa tolı, hátte, júregi túnde de tınıshlanbaydı. Bul da biyhuda.

24Adam ushın iship-jewden, islegen miynetinen ráhátleniwden artıq nárse joq eken. Bulardıń da Qudaydan berilgenine kózim jetti. 25Aqırı, Ol bermese, kim jey aladı, kim ráhátlene aladı? 26Ózine ılayıqlı bolǵanlarǵa Quday danalıq, bilim hám quwanısh beredi. Al gúnakarlarǵa bolsa, baylıq arttırıp jıynaw isin tapsıradı. Sońınan Ózine ılayıqlı bolǵan adamlarǵa onıń jemisin beredi. Bul da aqılǵa sıymaydı, bul da samaldıń izinen quwǵanday nárse.