‏ Ecclesiastes 3

Hár nárseniń waqtı bar

1Hár nárseniń óz máháli bar, quyash astındaǵı hár istiń óz waqtı bar.
2Tuwılıwdıń da, óliwdiń de óz waqtı bar.
Egiwdiń de, egisti jıynawdıń da óz waqtı bar.
3Óltiriwdiń de, shıpa beriwdiń de óz waqtı bar,
Buzıwdıń da, qurıwdıń da óz waqtı bar.
4Jılawdıń da, kúliwdiń de óz waqtı bar,
Joqlaw aytıp jılawdıń da, oyınǵa túsiwdiń de óz waqtı bar.
5Tas atıwdıń da, onı jıynawdıń da óz waqtı bar,
Qushaqlasıwdıń da, onnan ózin tıyıwdıń da óz waqtı bar.
6Izlewdiń de, joǵaltıwdıń da óz waqtı bar,
Saqlap qoyıwdıń da, taslap jiberiwdiń de óz waqtı bar.
7Jırtıwdıń da, tigiwdiń de óz waqtı bar,
Úndemewdiń de, sóylewdiń de óz waqtı bar.
8Súyiwdiń de, jek kóriwdiń de óz waqtı bar,
Urıstıń da, tınıshlıqtıń da óz waqtı bar.

9Jumısshı islegen miynetinen qanday payda tabadı? 10Insanlardıń ter tógiwi ushın, Quday bergen awır jumıslardı kórdim. 11Quday hámme nárseni óz waqtında ájayıp etip jarattı. Ol adamlarǵa dáwirdi túsiniw múmkinshiligin berdi. Sonda da adam Qudaydıń islegen islerin basınan aqırına deyin túsine almaydı. 12Adam ushın ómirde ráhátlenip jasawdan hám jaqsılıq islewden artıq hesh nárseniń joq ekenin bildim. 13Eger adam iship-jese hám óz miynetiniń ráhátin kórse, bul oǵan Qudaydan berilgen sıy. 14Jáne de, Quday islegen hár bir istiń máńgige ózgermeytuǵının bildim. Onnan hesh nárse alınıp, oǵan hesh nárse qosılmaydı. Quday adamlardıń Ózinen qorqıwı ushın usılay isledi. 15Házir ne bolsa, ótmishte de sol boldı,
Keleshekte bolatuǵınlar házir de bolıp atır,
Quday bolıp ótkenlerdi jáne qaytarar.
16Men quyash astında mına nárseni:
Ádalat qarar tabıwı tiyis orında nızamsızlıqtı,
Ádillik iske asıwı tiyis orında jawızlıqtı kórdim.
17Sonda men ishimnen:
«Quday jaqsını da, jamandı da húkim qıladı.
Ol hár bir nárse hám hár bir is ushın,
Húkim qılatuǵın waqıt belgilegen», – dedim.

18Jáne, adamlar tuwralı ishimnen bılay dedim: «Quday adamlardıń ózleriniń de haywanlarday ekenin kórsetiwi ushın, olardı sınaydı». 19Haywanlardıń basına túsken nárse adamlardıń da basına túsedi: haywanlar da óledi, adamlar da óledi. Ekewinde de birdey jan bar, adamnıń haywannan ústinligi joq. Awa, hámmesi biyhuda. 20Ekewi de bir jerge baradı, topıraqtan jaratılǵan, topıraqqa qaytadı. 21Adam balasınıń ruwxı joqarıǵa kóterile me, haywannıń ruwxı tómenge, jer astına kire me, bunı kim biledi? 22Sonda men adam ushın óz miynetinen ráhátleniwden basqa jaqsı nárseniń joq ekenin túsindim. Onıń payına tiygen nárse usı. Ózinen keyin bul dúnyada ne bolatuǵının oǵan kim kórsete aladı?