‏ Ecclesiastes 4

Dúnyadaǵı qıyınshılıqlar

1Men quyash astında bolıp atırǵan eziwshiliklerdi kórdim:
Jábirlengenlerdiń kóz jasların kórdim,
Olardı jubatıwshı joq edi.
Kúsh eziwshiler tárepinde edi.
Al ezilgenlerge táselle beriwshi de joq.
2Sonda men ólip ketken marhumlardıń jaǵdayınıń,
Tirilerdiń jaǵdayınan jaqsıraq ekenin túsindim.
3Biraq ele tuwılmaǵanlar,
Bular ekewinen de baxıtlıraq.
Olar quyash astında islenip atırǵan jawız islerdi kórmedi.

4Men jáne adamnıń pútkil miyneti hám istegi jetiskenligi adamlar arasında qızǵanısh tuwdıratuǵının kórdim. Bul da biyhuda, bul da samaldıń izinen quwǵanǵa uqsaydı. 5Aqılsız qolların qawsırıp alıp, óziniń etin ózi jeydi.
6Tınıshlıq penen alınǵan bir uwıs zat,
Samaldıń izinen quwıp, awır miynet etip tapqan bir qosuwıs zattan jaqsıraq.

Jalǵızlıqtıń biyhudalıǵı

7Men quyash astında jáne bir biyhudalıqtı kórdim:
8Bir jalǵız baslı adam bar edi.
Onıń perzenti de, tuwısqanı da joq edi.
Ol tınım tappay miynet eter,
Kózleri de baylıqqa toymas edi.
Ol ózinen: «Men kim ushın miynet etip,
Ózimdi ráhátleniwden mahrum etip atırman?» – dep soramaydı.
Bul da biyhuda, awır bir dárt.

9Birewden ekew jaqsı,
Olar miynetine jaqsı sıy aladı.
10Eger birewi qulasa, ekinshisi turǵızadı.
Al eger jalǵız adam qulasa,
Onı turǵızatuǵın adam bolmaydı.
11Eki adam birge jatsa, jıllı jatadı.
Al jalǵız jatqan adam qalay jılınadı?
12Eger birew jalǵız bolsa, jeńiler,
Ekew bolsa, qarsı tura alar.
Úsh jipten esilgen arqan teginlikte úzilmes.

Joqarılawdıń biyhudalıǵı

13Berilgen keńeske qulaq aspaytuǵın aqılsız ǵarrı patshadan, jarlı, biraq aqıllı jigit jaqsıraq. 14Sonday jigit patshalıqta jarlı bolıp tuwılıp, qamaqxanada otırǵan bolsa da, ol qamaqxanadan shıǵıp, patsha bolıp kóteriliwi múmkin. 15Men quyash astında jasap atırǵan hár bir adamnıń patshanıń ornına otırǵan sonday jigittiń izine ergenin kórdim. 16Onıń izine ergen xalıq esap-sansız bolsa da, keyingi urpaqlardıń oǵan kewli tolmaydı. Awa, bul da biyhuda, bul da samaldıń izinen quwǵanǵa uqsaydı.

Quday menen qarım-qatnas

17Qudaydıń Úyine barǵanda, qádemińdi oylap bas! Ol jerge islegen jamanlıǵınıń parqına barmaytuǵın aqılsızlar sıyaqlı tek qurbanlıq beriw ushın barǵannan góre, tıńlaw ushın barǵan jaqsıraq.