Ecc 5 | KaaIBT22L | STEP | Tiliń sóylewge asıqpasın. Qudaydıń aldında sóz sóylewge júregiń asıqpasın. Quday aspanda, sen bolsań, jerdeseń. Sonlıqtan gápiń qısqa bolsın.

‏ Ecclesiastes 5

1 Tiliń sóylewge asıqpasın.
Qudaydıń aldında sóz sóylewge júregiń asıqpasın.
Quday aspanda, sen bolsań, jerdeseń.
Sonlıqtan gápiń qısqa bolsın.
2 Mashqala kóp bolǵanda, adam kóp tús kóretuǵını sıyaqlı,
Kóp sóylegende, aqılsızlıq júzege keledi.

3 Qudayǵa wáde berseń, onı orınlawdı keshiktirme. Ol aqılsızlardı unatpaydı. Al sen wádeńdi orınla. 4 Wáde berip, orınlamaǵannan góre, wáde bermegeniń jaqsıraq. 5 Tilińniń seni gúnaǵa baslawına jol qoyma hám Qudaydıń ruwxaniyine: «Wáde berip, qáte qıldım», – deme. Sózleriń menen Qudaydıń ǵázebin keltirme. Bolmasa, Ol qollarıń menen islegen islerińdi joq qıladı. 6 Kóp sóylew de, kóp tús kóriw de paydasız. Jaqsısı, Qudaydan qorq!

Baylıqtıń biyhudalıǵı

7 Eger sen bir jerde jarlıǵa zulımlıq qılınıp, ádillik hám haqlıqtıń ayaq astı etilip atırǵanın kórseń, buǵan hayran bolma. Sebebi hámeldardıń ústinen qadaǵalawshı úlkeni bar, al olardıń ústinen qadaǵalawshı olardan da úlkeniregi bar. 8 Hár bir adam jerdiń ónimine ósh, hátte, patsha da atızdan alınǵan ónimnen óziniń payın aladı.

9 Puldı súygen, pulǵa toymas,
Baylıqtı súygen baylıqqa toymas.
Bul da biyhudalıq.
10 Mal-dáwlet kóbeyse, olardı isletiwshiler de kóbeyedi.
Sonda baylıqtıń iyesi óz baylıǵına telmirip, qızıqsınıp qarawdan basqa ne payda tabadı?
11 Jumısshı az jese de, kóp jese de tınısh uyıqlaydı.
Al baydı baylıǵı uyqıdan mahrum qıladı.

12 Men quyash astında jáne bir qayǵılı waqıyanı kórdim:
Jıynalǵan baylıq iyesine zıyan keltirdi.
13 Bul baylıq áwmetsizligi sebepli joq bolıp ketti,
Ulı tuwılǵanda,
Ulına hesh nárse qaldıra almadı.
14 Adam anadan qalay jalańash tuwılǵan bolsa,
Bul dúnyadan da solay ketedi.
Islegen miynetiniń jemisinen
Hesh nárseni de qollarına alıp kete almaydı.
15 Mınaw da awır qayǵılı nárse:
Adam qalay kelgen bolsa, solay ketedi.
Onda qurı dalaǵa miynet etiwdiń ne keregi bar?
16 Ol ómir boyı nanın qarańǵılıqta jeydi,
Qıyınshılıqtı, kesellikti hám ashıwshaqlıqtı bastan keshiredi.

17 Men insan ushın jaqsı hám ájayıp nárse – bul Qudaydıń ózine bergen qısqa ómiri ishinde iship-jew, quyash astında islegen barlıq miynetiniń ráhátin kóriw ekenin bildim. Insanǵa tiygen pay – usı. 18 Eger Quday adamǵa mal-múlik hám baylıq berse, oǵan usı nárselerden paydalanıwǵa, óz úlesin alıp, miynetinen ráhátleniwge jol ashsa, onda bul Qudaydan berilgen sıy. 19 Quday onıń júregin quwanıshqa toltırıp qoyǵanlıqtan, bunday adam qansha ómiri ketip, qanshası qalǵanlıǵı tuwralı kem oylaydı.