Ecc 8 | KaaIBT22L | STEP | Kim dana adamǵa uqsaydı? Hámme nárseniń mánisin kim túsine aladı? Danalıq adamnıń júzin jaynatadı, Onıń betindegi qatallıqtı jumsartadı.

‏ Ecclesiastes 8

1 Kim dana adamǵa uqsaydı?
Hámme nárseniń mánisin kim túsine aladı?
Danalıq adamnıń júzin jaynatadı,
Onıń betindegi qatallıqtı jumsartadı.

Patshaǵa boysınıńlar

2 Men bılay deymen: patshanıń aytqanlarına qulaq sal, sebebi Quday oǵan ant ishken. 3 Patshanıń aldınan ketiwge asıqpa hám patshaǵa qarsı til biriktiriwshilerge qosılma. Ol qálegeniniń hámmesin isley aladı. 4 Patshanıń sózinde qúdiret bar, hesh kim oǵan: «Siz ne islep atırsız?» – dep aytpaydı.

5 Buyrıqtı orınlaǵanlar zıyan kórmeydi.
Dana adam durıs nárseni islew waqtın da, jolın da biledi.
6 Hár bir istiń óz waqtı hám qaǵıydası bar.
Sonday bolsa da, adam ushın qıyınshılıqtı kóteriw júdá awır.
7 Keleshekte ne bolatuǵının adam bilmeydi,
Bunıń qalay bolatuǵının oǵan kim ayta aladı?
8 Hesh kimniń samaldı uslap alıp,
Oǵan biylik etiwge kúshi jetpegenligi sıyaqlı,
Ólim kúni ústinen biylik etiwge de,
Hesh kimniń kúshi jetpeydi.
Urıstan qashıwǵa bolmaytuǵınlıǵı sıyaqlı,
Jawızlıq ta jawızlıq islewshi adamdı qutqara almaydı.

9 Men bulardıń hámmesin kórdim hám quyash astında bolıp atırǵan hámme nársege dıqqat awdardım: adam adamǵa húkimdarlıq etken waqıtta, bir-birine zıyan keltirgenin kórdim. 10 Keyin jaman adamnıń qalay jerlengenin kórdim. Muxaddes orınǵa kelip-ketip júrgen sol adamlar ózleri jamanlıq qılǵan qalada maqtaw aldı. Bul da biyhuda.

11 Jınayat ushın tez jaza berilmese, adam balasınıń júregi jamanlıq islewge qumar boladı. 12 Gúnakar júz márte gúna islep, uzaq ómir súrse de, Qudaydan qorqqanlardıń hám Onıń aldında hadal júrgenlerdiń jaqsılıq kóretuǵının anıq bilemen. 13 Al jaman adam Qudaydan qorqpaǵanı ushın jaqsılıq kórmeydi hám onıń sayaǵa uqsaǵan ómiri uzaq bolmaydı.

14 Jer betinde aqılǵa sıymaytuǵın mınaday nárse de bar: geyde ádil adamlar jaman adamlarǵa tiyisli bolǵan jazanı aladı, al ádil adamlarǵa tiyisli húrmetti jaman adamlar aladı. Men: «Bul da biyhuda, túsiniksiz nárse», – deymen. 15 Sonlıqtan men kewil kóteriwdi artıq kórdim. Quyash astında adam ushın iship-jep, kewil kóteriwden artıq baxıt joq. Quyash astında Qudaydıń adamǵa bergen ómiri dawamında islegen miynetinen oǵan qalatuǵını usı.

16 Men ózimdi danalıqtı biliwge hám jer betinde kúni-túni uyqı kórmey islenip atırǵan islerdi túsiniwge baǵıshladım. 17 Sonda men Qudaydıń hámme islerine oy juwırttım. Hesh kim quyash astında bolıp atırǵan nárselerge túsinbeydi. Ol qansha urınsa da, buǵan erise almaydı. Dana adam bunı biletuǵının aytsa da, ol bunıń túbine jete almaydı.