Ecc 9 | KaaIBT22L | STEP | Solay etip, bulardıń hámmesin úyrenip, mına juwmaqqa keldim: ádiller, danalar hám olar islegen hár bir is Qudaydıń qolında. Olardı Quday unata ma, unatpay ma, bunı adam bilmeydi.

‏ Ecclesiastes 9

Adamlar Qudaydıń qolında

1 Solay etip, bulardıń hámmesin úyrenip, mına juwmaqqa keldim: ádiller, danalar hám olar islegen hár bir is Qudaydıń qolında. Olardı Quday unata ma, unatpay ma, bunı adam bilmeydi. 2 Hár bir adamnıń aqıbeti birdey boladı. Ádil adam menen jawız adamnıń da, jaqsı adam menen jaman adamnıń da, hadal adam menen haram adamnıń da, qurbanlıq beretuǵın adam menen qurbanlıq bermeytuǵın adamnıń da aqıbeti birdey boladı. Jaqsı adamǵa ne bolsa, gúnakarǵa da sol boladı.
Ant ishkenge ne bolsa, ant ishiwden qorqqanǵa da sol boladı.

3 Quyash astında bolıp atırǵan islerdiń hámmesiniń ishinde qayǵılısı mınaw: hámmeniń táǵdiri birdey. Adamlardıń júregi jawızlıqqa tolǵan hám olar ómir súrgen dáwirinde aqmaqlıq isleydi. Keyin olar ólilerdiń janına ketedi. 4 Biraq tiri júrgen hár bir adam ushın úmit bar. Awa, óli arıslannan tiri iyt jaqsı.

5 Tiriler óletuǵının biledi,
Al óliler hesh nárseni bilmeydi.
Olarǵa artıq sıy joq,
Olar endi hesh eske alınbaydı.
6 Ólgenlerdiń súyispenshiligi, jek kóriwshiligi,
Qızǵanıshları álle qashan ótip ketti.
Olar quyash astında bolıp atırǵan nárselerge,
Endi aralasa almaydı.

7 Endi barıp, shadlıq penen nanıńdı jep, quwanısh penen sharabıńdı ish. Quday usı islerińdi maqullaydı. 8 Kiyimlerińiz hárdayım taza bolsın, basıńızdan átir arımasın. 9 Quyash astında Quday ózińe bergen qısqa ómirińniń pútkil jumbaqlı kúnlerin súyikli hayalıń menen ráhátte ótker. Ómirden hám quyashtıń astında islegen miynetińnen saǵan berilgen pay usı boladı. 10 Qolıńnan ne nárse kelse, hámmesin bar kúshiń menen isle. Sen baratuǵın jerde, yaǵnıy óliler mákanında jumıs ta, oy-pikir de, bilim de, danalıq ta joq.

11 Quyash astında men jáne bir nárseni kórdim:
Jarısta júyrik,
Urısta kúshli jeńe bermeydi eken.
Danaǵa – mal-múlik,
Aqıllıǵa – baylıq,
Uqıplıǵa – húrmet bárqulla nesip ete bermeydi eken.
Biraq olardıń hámmesi ushın ele waqıt hám úmit bar.

12 Adam óz waqtın bilmeydi.
Torǵa túsken balıq hám duzaqqa túsken qus sıyaqlı,
Adam da kútilmegende baxıtsızlıqqa ushıraydı.

Danalıq aqılsızlıqtan jaqsıraq

13 Quyash astında men danalıqtan jáne bir mısal kórdim. Ol maǵan áhmiyetli bolıp kórindi. 14 Ishinde az ǵana adam jasaytuǵın kishkene bir qala bar edi. Kúshli bir patsha ol jerge kelip, onı qamal qıldı hám qalanı basıp alıw ushın, onıń qarsısına úlken bekinis qurdı. 15 Biraq sol qalada jarlı bolsa da, dana bir adam jasaytuǵın edi. Ol óz danalıǵı menen bul qalanı qutqarıp qaldı. Degen menen, keyin bul jarlı adamdı hesh kim eske almadı. 16 Sonda men ózime ózim: «Danalıq kúshten artıq. Biraq jarlı adamnıń danalıǵına kewil bólip, onıń sózlerin tıńlamaydı eken», – dedim.

17 Dananıń álpayım aytqan sózi,
Aqılsızlar ishindegi basshınıń baqırıp aytqan sózlerinen jaqsıraq.
18 Danalıq urıs qurallarınan jaqsıraq,
Biraq bir aqılsız kóp jaqsılıqtı joqqa shıǵaradı.