Eph 2 | KaaIBT22L | STEP | Sizler bir waqıtları ayıp hám gúnalarıńız sebepli óli edińler.

‏ Ephesians 2

Ólimnen ómirge ótiw

1 Sizler bir waqıtları ayıp hám gúnalarıńız sebepli óli edińler. 2 Sonda sizler bul dúnyanıń ádeti boyınsha, hawada húkimdarlıq etiwshi hákim – shaytanǵa, yaǵnıy házir Qudayǵa qulaq aspaytuǵın adamlarda háreket etiwshi ruwxqa boysınıp jasaytuǵın edińler. 3 Bir waqıtları bizlerdiń hámmemiz de usınday adamlardıń arasında óz gúnakar tábiyatımız boyınsha jasadıq. Denemizdiń hám oy-niyetimizdiń jaman qálewlerin orınladıq. Sol sebepten basqalar sıyaqlı bizler de tábiyatımız boyınsha Qudaydıń ǵázebine ılayıqlı adamlar edik.

4 Biraq, miyrim-shápáátke bay bolǵan Quday bizlerdi sonshelli súygenlikten, 5 gúnalarımız sebepli óli bolsaq ta, bizlerdi Masiyx penen birge tiriltti. Sizler Onıń miyrimi menen qutqarıldıńız. 6 Bizler Masiyx Iysa menen qatnasta bolǵanlıqtan, Quday bizlerdi Masiyx penen birge tiriltip, Onıń menen birge aspandaǵı orınlardan berdi. 7 Quday Masiyx Iysa arqalı bizlerge rehim etip, Óz miyriminiń sheksiz baylıǵın keleshek dáwirlerde kórsetiw ushın usılay isledi. 8 Sizler isenimińiz arqalı Qudaydıń miyrimi menen qutqarıldıńız. Bul sizlerdiń jetiskenligińiz emes, al Qudaydıń sıyı bolǵanlıqtan, 9 hesh kim islerim sebepli qutqarılǵanman dep, maqtana almaydı. 10 Sebebi bizler Qudaydıń dóretpesimiz. Ózi aldın ala tayarlaǵan jaqsı islerin islep jasawımız ushın, Ol bizlerdi Masiyx Iysa arqalı jarattı.

Iysa Masiyx arqalı birlesiw

11 Sonlıqtan mınalardı eske túsirińler: sizler bir waqıtları butqa tabınıwshı millet adamı bolıp tuwılıp, denesindegi eti qol menen kesilip súnnet etilgen yahudiyler tárepinen «súnnetsizler» dep atalatuǵın edińler. 12 Ol waqıtları sizler Masiyx penen baylanısı joq, Izrail xalqına jat hám wádeden ibarat bolǵan kelisimlerden biynesip adamlar edińler. Bul dúnyada úmitsiz hám qudaysız bolıp jasadıńlar. 13 Biraq burın Qudaydan uzaq bolǵan sizler endi Masiyx Iysa menen qatnas jasap, Masiyxtıń qanı arqalı Qudayǵa jaqın boldıńlar.

14 Óytkeni Masiyxtıń Ózi – yahudiyler menen basqa milletlerdi birlestirgen biziń jarastırıwshımız. Ol Óz denesin qurban etip, aradaǵı ayırıp turǵan diywaldı, yaǵnıy dushpanlıqtı joq qıldı. 15 Yahudiyler menen basqa milletlerden Ózi menen baylanısta bolatuǵın bir jańa xalıqtı jaratıw maqsetinde, Ol buyrıq hám qaǵıydalardan ibarat bolǵan Nızamdı biykar etti. Bunı tınıshlıqtı ornatıp, 16 dushpanlıqtı joq qılǵan atanaq aǵash arqalı ekewin bir jańa xalıq qılıp, Quday menen jarastırıw ushın isledi. 17 Masiyx kelip, Qudaydan uzaq bolǵan sizlerge hám Qudayǵa jaqın bolǵan yahudiylerge tınıshlıq Xosh Xabarın járiyaladı. 18 Ol arqalı bizler hámmemiz bir Muxaddes Ruwx penen Ákemiz Qudaydıń aldına bara alamız. 19 Solay etip, endi sizler jat hám shet jerli adam emessizler, al muxaddeslerge watanlas, Qudaydıń shańaraǵınıń aǵzalarısız. 20 Sizler elshiler hám payǵambarlar salǵan tırnaq tas ústine qalandıńlar. Al imarattıń múyeshiniń tiykarǵı tası – Masiyx Iysanıń Ózi boladı. 21 Onda pútkil imarat quralıp, Jaratqan Iyege tiyisli bir muxaddes Ibadatxana bolıw ushın ósip baradı. 22 Masiyx penen qatnasta bolǵan sizler de Qudaydıń Muxaddes Ruwxı arqalı jasaytuǵın mákan bolıwıńız ushın, hámmeńiz birlikte quralıp barasızlar.