Eph 3 | KaaIBT22L | STEP | Sol sebepten men, Pavel, basqa milletlerden bolǵan sizler ushın, Masiyx Iysanıń tutqını boldım.

‏ Ephesians 3

Pavel bildirgen sır

1 Sol sebepten men, Pavel, basqa milletlerden bolǵan sizler ushın, Masiyx Iysanıń tutqını boldım. 2 Sizler ushın Qudaydıń Óz miyrimi menen maǵan bergen bul xızmeti haqqında, álbette, esitkensizler. 3 Joqarıda qısqasha jazıp ótkenimdey, Quday maǵan Óz sırın ayan arqalı bildirdi. 4 Bul xattı oqıǵanıńızda, Masiyxtıń sırın qalay túsingenimdi bilip alıwıńız múmkin. 5 Adamzattıń áwelgi áwladlarınan qupıya tutılıp, endi Qudaydıń muxaddes elshilerine hám payǵambarlarǵa Muxaddes Ruwx arqalı ashıp berilgen bul sır mınadan ibarat: 6 basqa milletler de yahudiyler menen birge miyrasqa sherik hám bir deneniń aǵzaları. Olar Xosh Xabar arqalı Masiyx Iysa sebepli berilgen wádege de sherik.

7 Qudaydıń háreket etetuǵın qúdireti menen, maǵan berilgen miyriminiń sıyı arqalı men Xosh Xabardı járiyalaw ushın xızmetke tayınlandım. 8 Men barlıq muxaddesler ishinde eń arzımaǵanı bolsam da, basqa milletlerge Masiyxtıń sheksiz baylıǵı haqqında járiyalaw ushın, Quday maǵan usı miyrimin berdi. 9 Jáne de, hámme nárseni ^{▼▼ Bazı qoljazbalarda «Iysa Masiyx arqalı» degen sózler de bar.} jaratqan Quday Ózinde áwelden-aq saqlanǵan sırlı jobasın hámmege ashıp beriw ushın da, maǵan usı miyrimin berdi. 10 Solay etip, Qudaydıń maqseti – iseniwshiler jámááti arqalı aspandaǵı hákimshiliklerge hám biyliklerge Óziniń kóp qırlı aqıl-danalıǵın házir málim etiw. 11 Quday usı máńgilik maqsetin Iyemiz Masiyx Iysa arqalı ámelge asırdı. 12 Bizler Masiyx penen qatnasta bolıp, Oǵan degen isenimimiz arqalı Qudayǵa batırlıq hám tolıq isenim menen jaqınlasa alamız. 13 Sonlıqtan sizler ushın shekken azaplarım sebepli qayǵırmawıńızdı ótinish etemen. Men shekken bul azaplar sizlerge ullılıq alıp keledi.

Masiyxtıń súyispenshiligin biliw

14 Sol sebepten men aspandaǵı Ákemizdiń aldında ^{▼▼ aspandaǵı Ákemizdiń aldında – Bazı qoljazbalarda «Iyemiz Iysa Masiyxtıń Ákesiniń aldında».} dize búgip, duwa etemen. 15 Ol aspandaǵı hám jer júzindegi hár qanday milletke at bergen. 16 Quday Óz ullılıǵınıń baylıǵı boyınsha ishki dúnyańızdı bekkemlew ushın, Óz Ruwxı arqalı sizlerge kúsh-quwat bersin. 17 Isenimińiz arqalı Masiyx júreklerińizde jasasın. Súyispenshilikke tamır urıp hám tiykarlanıp, 18 barlıq muxaddesler menen birge Masiyxtıń súyispenshiliginiń qanshelli keń, uzın, biyik hám tereń ekenligin túsinip alǵaysız. 19 Jáne de, sizler aqıl-oyǵa sıymaytuǵın usı súyispenshilikti bilip, Qudaydıń pútkil tolılıǵına tolıp barǵaysız. 20 Bizlerde háreket etiwshi qúdireti menen, Quday bizlerdiń tilegen hám oylaǵan hár bir nársemizdi artıǵı menen isley alatuǵın kúshke iye. 21 Onıń dańqı Masiyx Iysa menen qatnasta bolǵan iseniwshiler jámáátinde, áwladtan-áwladqa, máńgi-baqıy arta bersin! Awmiyin.