Eph 5 | KaaIBT22L | STEP | Solay etip, Qudaydıń súyikli balaları bolǵan sizler Oǵan elikleńler!

‏ Ephesians 5

Nurǵa tiyisli adamlarǵa say jasańlar!

1 Solay etip, Qudaydıń súyikli balaları bolǵan sizler Oǵan elikleńler! 2 Masiyx bizlerdi súyip, bizler ushın Qudayǵa unaytuǵın xosh iyisli sadaqa hám qurbanlıq bolıp, Ózin Qudayǵa baǵıshladı. Sol sıyaqlı, sizler de usınday súyispenshilik penen jasańlar.

3 Hesh qanday buzıqshılıq, haramılıq hám nápsiqawlıq arańızda tilge de alınbasın. Bul muxaddeslerge minásip emes. 4 Arańızda uyat hám pátiwasız gápler, turpayı házil de bolmasın. Bul sizlerge minásip emes. Bunıń ornına, Qudayǵa shúkirlik bildirińler. 5 Mınanı anıq bilip qoyıńlar: hesh bir buzıq, haram, nápsiqaw, yaǵnıy butparaz adam Masiyxtıń hám Qudaydıń Patshalıǵın miyras etip almaydı. 6 Hesh kim sizlerdi ótirik sózler menen aldamasın. Joqarıda aytılǵan isler sebepli, Ózine boysınbaytuǵınlarǵa Qudaydıń ǵázebi keledi. 7 Sonlıqtan bundaylarǵa sherik bolmańlar.

8 Sizler bir waqıtları qarańǵılıq edińiz, biraq endi bolsa, Iyemiz arqalı nur boldıńlar. Sol sebepten nurǵa tiyisli adamlarǵa say jasańlar. 9 Óytkeni nurdaǵı ómirdiń jemisi – hár túrli jaqsılıq, haqlıq hám haqıyqatlıqtan ibarat. 10 Iyemizge neniń unaytuǵının ayırıp bilińler. 11 Qarańǵılıqtaǵı ómirdiń jemissiz islerine qatnaspańlar. Kerisinshe, olardı áshkara etińler. 12 Qarańǵılıqtaǵı adamlardıń jasırın qılǵan islerin aytıwdıń ózi qattı uyat. 13 Biraq, qarańǵılıqqa nur shashılsa, hámme nárse anıq kórinedi. 14 Sebebi Qudaydıń nurında kóringen hár bir adam – nur. Sol sebepten bılay delingen: «Oyan, háy uyqıda jatqan,
Óliler ishinen tiril!
Masiyx saǵan nur shashar».

15 Solay etip, qalay jasaw kerekligine dıqqat awdarıp, nadan adamlar sıyaqlı emes, al dana adamlar sıyaqlı jasańlar. 16 Waqıttan únemli paydalanıńlar. Óytkeni házirgi kúnler jawızlıqqa tolı. 17 Sol sebepten aqılsız bolmay, Iyemizdiń qálewiniń ne ekenin túsinińler. 18 Sharap iship, más bolmańlar, bul adamnıń buzılıwına alıp keledi. Al bunıń ornına, Muxaddes Ruwxqa tolıńlar. 19 Zabur jırlarındaǵı, alǵıs-maqtaw qosıqlarındaǵı hám ruwxıy qosıqlardaǵı sózlerdi bir-birińizge aytıp, Iyemizdi qosıq-namalar menen shın júrekten alǵıslańlar. 20 Bárqulla hámme nárse ushın, Iyemiz Iysa Masiyxtıń atı menen Ákemiz Qudayǵa shúkirlik bildirińler.

Erli-zayıplılar arasındaǵı qatnasıq haqqında

21 Masiyxqa degen húrmetińiz sebepli, bir-birińizge boysınıńlar.

22 Háy hayallar, Iyemizge boysınatuǵınıńız sıyaqlı, kúyewlerińizge de boysınıńlar! 23 Sebebi Masiyx iseniwshiler jámáátiniń bası bolǵanı sıyaqlı, kúyewi de hayalınıń bası. Masiyx Óz denesiniń, yaǵnıy iseniwshiler jámáátiniń Qutqarıwshısı. 24 Iseniwshiler jámááti Masiyxqa boysınatuǵını sıyaqlı, hayallar da hámme iste kúyewlerine boysınsın.

25 Háy kúyewler, Masiyx iseniwshiler jámáátin súyip, onıń ushın Ózin qurban etkeni sıyaqlı, sizler de hayallarıńızdı súyińler. 26 Masiyx iseniwshiler jámáátin suw menen juwıp ^{▼▼ Suw menen juwıw – shomıldırıw rásiminen ótkiziw.} hám Qudaydıń sózi menen tazalap, onı muxaddes qılıw ushın, Ózin qurban etti. 27 Bunı Ol ústinde hesh bir daq, jıyrıq yamasa buǵan uqsaǵan bir nársesi joq, muxaddes hám minsiz bolǵan saltanatlı jámáátti Ózine alıw ushın isledi. 28 Sol sıyaqlı, kúyewler de hayalların óz denesin súygendey súyiwi shárt. Óz hayalın súygen ózin súygen boladı. 29 Hesh kim hesh qashan óz denesin jek kórmegen. Kerisinshe, Masiyx iseniwshiler jámáátine ǵamxor bolǵanı sıyaqlı, adam óz denesin azıqlandırıp, oǵan ǵamxorlıq qıladı. 30 Óytkeni bizler Masiyxtıń denesiniń ^{▼▼ Bazı qoljazbalarda «…Onıń etiniń hám súyekleriniń» degen sózler de bar.} múshelerimiz. 31 «Sonlıqtan er adam ata-anasın qaldırıp, óz hayalına qosıladı hám ekewi bir dene boladı». ^{▼▼ Jar 2:24.} 32 Bul sır ullı. Men bunı Masiyxqa hám iseniwshiler jámáátine baylanıslı aytıp atırman. 33 Solay etip, hár birińiz óz hayalın ózin súygendey súysin. Hayal da kúyewin húrmet etsin.