Est 2 | KaaIBT22L | STEP | Patsha Axashweroshtıń ashıwı basılǵannan keyin, ol Washtiydi, onıń islegen isin hám oǵan qarsı shıǵarılǵan húkimdi esine túsirdi.

‏ Esther 2

Esterdiń xanbiyke bolıwı

1 Patsha Axashweroshtıń ashıwı basılǵannan keyin, ol Washtiydi, onıń islegen isin hám oǵan qarsı shıǵarılǵan húkimdi esine túsirdi. 2 Patshanıń arnawlı xızmetshileri: «Patshamız ushın jas, sulıw hám pák qızlar izlensin. 3 Bunıń ushın patshanıń qolı astındaǵı barlıq wálayatlarda baqlawshılar tayınlansın. Olar jas, sulıw hám pák qızlardı Suza qalasındaǵı hayal-qızlar sarayına jıynatıp, patshanıń hayallarına qaraytuǵın aqtası Hegaydıń qarawına tapsırsın hám olarǵa iyisli zatlar menen pardoz berilsin. 4 Patshamızǵa unaǵan qız Washtiydiń ornına xanbiyke bolsın», – dedi. Bul gáp patshaǵa maqul boldı hám ol solay isledi.

5 Suza qalasında Benyamin urıwınan bolǵan Mordoxay degen bir yahudiy jasaytuǵın edi. Ol Yair degen adamnıń ulı bolıp, Yair Shimeydiń, al Shimey Kishtiń ulı edi. 6 Kish Yahuda patshası Exoniya ^{▼▼ Exoniya – Ehoyakinniń basqa atı. 4Pat 24:6 qarań.} menen birge Babiloniya patshası Nabuxodonosor tárepinen Erusalimnen súrgin etilip alıp kelingenlerdiń biri edi. 7 Mordoxayǵa ákesi jaǵınan tuwısqan bolǵan Hadassa atlı bir qız bar edi. Basqa atı Ester bolǵan Hadassa ata-anasınan jetim qalǵannan soń, Mordoxay onı asırap alıp tárbiyaladı. Qız qáddi-qáwmeti kelisken, sulıw edi.

8 Patshanıń buyrıǵı menen pármanı járiyalanǵannan soń, kóp qızlar Suza qalasına ákelinip, hayal-qızlar ushın juwapker bolǵan Hegaydıń qarawına tapsırıldı. Patsha sarayına ákelingen qızlardıń ishinde Ester de bar edi. 9 Hegay Esterdi unattı hám oǵan kewli toldı. Ol Esterge pardozlanıwı ushın kerekli zatlardı hám oǵan arnalǵan azıq-awqatlardı beriwge asıqtı. Oǵan xızmet etiw ushın patsha sarayınan saylanǵan jeti qızdı belgiledi. Esterdi hám onıń qánizeklerin hayal-qızlar sarayınıń eń jaqsı bólmesine jaylastırdı.

10 Ester óz xalqı hám óz ata tegi haqqında ashıq aytpadı. Sebebi Mordoxay oǵan bul tuwralı awız ashpawdı buyırǵan edi. 11 Mordoxay hár kúni Esterdiń awhalınan xabar alıw ushın hám oǵan ne bolıp atırǵanın biliw ushın hayal-qızlar sarayınıń háwlisi átirapında júretuǵın edi.

12 Patsha Axashweroshtıń aldına kiriw gezegi kelgenshe, hár bir jas qızǵa on eki ay dawamında pardoz beriletuǵın edi. Qızlar ushın shıǵarılǵan qaǵıyda usınday bolıp, olarǵa altı ay mirra mayı ^{▼▼ Mirra mayı – qanday da bir terektiń shiresinen alınıp, qayta islep tayarlanǵan xosh iyisli may.}, altı ay átir mayları hám pardozlaytuǵın zatlar jaǵılatuǵın edi. 13 Sońınan qız patshanıń aldına kiretuǵın edi. Qız patsha sarayına kirer aldınan hayallar sarayınan neni alıwdı qálese, oǵan hámmesi beriletuǵın edi. 14 Keshte patshanıń bólmesine kirgen qız erteńine azanda patshanıń toqallarına qaraytuǵın aqtası Shaashgazdıń baqlawı astındaǵı ekinshi hayallar sarayına qaytatuǵın edi. Patshaǵa unamaǵan hám atı aytıp shaqırılmaǵan qız patshanıń janına qaytıp kire almaytuǵın edi.

15 Patshanıń bólmesine kiriw gezegi Mordoxaydıń asırap alǵan qızına, yaǵnıy onıń aǵası Abixayıldıń qızı Esterge kelgende, ol patshanıń hayalların qarawıllaytuǵın aqtası Hegaydıń aytqanların ǵana aldı hám basqa hesh nárse soramadı. Ester ózin kórgen hár bir adamnıń kewline unap qaldı. 16 Solay etip, Axashweroshtıń patshalıq etiwiniń jetinshi jılınıń onınshı ayı, tebet ayında Ester patsha Axashweroshtıń sarayına aparıldı.

17 Patsha Esterdi basqa qızlardan góre kóbirek jaqsı kórip qalıp, oǵan kewli toldı hám Esterdi basqa hayal-qızlarǵa qaraǵanda kóbirek unattı. Axashwerosh Esterdiń basına taj kiydirip, onı Washtiydiń ornına xanbiyke etip qoydı. 18 Sońınan patsha barlıq wázirleri hám xızmetshileri ushın Esterdiń húrmetine úlken zıyapat berdi. Ol wálayatlarǵa bayram járiya etti hám patshalarǵa ılayıq saqıylıq penen sawǵalar úlestirdi.

Mordoxaydıń patshanıń ómirin saqlap qalıwı

19 Qızlar ekinshi ret jıynalǵanda, Mordoxay sarayda óz xızmetin atqarıp otırǵan edi. 20 Ester Mordoxaydıń buyrıǵı boyınsha óziniń ata tegi hám xalqı haqqında ele hesh nárse aytpaǵan edi. Ester Mordoxaydıń tárbiyasında bolǵan waqtında oǵan qalay boysınatuǵın bolsa, házir de solay boysınatuǵın edi.

21 Sol kúnleri Mordoxay sarayda óz xızmetin atqarıp otırǵanda, dárwaza saqshıları bolǵan Bigtan hám Teresh degen eki aqta patsha Axashweroshqa ashıwlanıp, onı óltiriwdi rejelestirdi. 22 Mordoxay bul isti bilgende, xanbiyke Esterge xabarladı. Ester onı Mordoxaydıń atınan patshaǵa jetkizdi. 23 Bul waqıya tekserilip, durıs dep tabıldı hám eki saqshı da darǵa asıldı. Keyin bul waqıya jılnama kitabına patshanıń kóz aldında jazıp qoyıldı.