Est 3 | KaaIBT22L | STEP | Bul waqıyadan keyin patsha Axashwerosh Agag áwladınan bolǵan Hammedata ulı Hamandı joqarı lawazımǵa tayınlap, onıń mártebesin kóterdi. Onı barlıq wázirlerden de joqarı biylikke iye qıldı.

‏ Esther 3

Hamannıń yahudiylerdi joq qılıwdı oylawı

1 Bul waqıyadan keyin patsha Axashwerosh Agag áwladınan bolǵan Hammedata ulı Hamandı joqarı lawazımǵa tayınlap, onıń mártebesin kóterdi. Onı barlıq wázirlerden de joqarı biylikke iye qıldı. 2 Patshanıń buyrıǵı boyınsha, patsha sarayındaǵı xızmetshilerdiń hámmesi Hamanǵa tájim etip, jerge deyin iyiletuǵın edi. Biraq Mordoxay oǵan tájim etpedi de, jerge deyin iyilmedi de. 3 Patsha sarayındaǵı xızmetshiler Mordoxaydan: «Sen ne ushın patshanıń buyrıǵına boysınbay atırsań?» – dep soradı. 4 Olar bul sózdi hár kúni qaytalasa da, Mordoxay olardı tıńlamadı. Sonlıqtan olar bunı Hamanǵa jetkizdi. Sebebi Mordoxay olarǵa óziniń yahudiy ekenin aytqan edi hám olar Mordoxaydıń usılay islewdi dawam etetuǵının yamasa etpeytuǵının kórgisi keldi.

5 Haman Mordoxaydıń ózine tájim etip, jerge deyin iyilmegenin kórgende, ashıwdan tútep ketetuǵın edi. 6 Haman Mordoxaydıń jalǵız ózin óltiriwdi oylap qoymay, Mordoxaydıń qaysı xalıqtan ekenin bilgenlikten, Axashweroshtıń pútkil patshalıǵındaǵı barlıq yahudiylerdi, yaǵnıy Mordoxaydıń pútkil xalqın qırıp taslawdı qarar etti.

7 Axashweroshtıń patshalıǵınıń on ekinshi jılınıń birinshi ayında, nisan ayında bul isti ámelge asıratuǵın kún hám aydı belgilew ushın Hamannıń aldında pur, yaǵnıy shek taslandı. Shek on ekinshi ayǵa, adar ayına tústi.

8 Sońınan Haman patsha Axashweroshqa bılay dedi:

– Patshalıǵıńızdaǵı barlıq wálayatlardaǵı xalıqlar arasına jayılıp, tarap ketken bir xalıq bar. Olardıń nızamları basqa barlıq xalıqlardıń nızamlarınan ózgeshe bolıp, olar patshamızdıń nızamlarına boysınbaydı. Olardı óz bildiginshe qaldırıw patshamızdıń mártebesine zıyan tiygizedi. 9 Eger patshamız maqul kórse, olardı qırıp taslaw ushın párman shıǵarsın. Men bul isti orınlaǵanlarǵa tólew ushın patsha qaznasına on mıń talant ^{▼▼ On mıń talant – bir talant shama menen 34 kg.} gúmis beremen.

10 Sonda patsha qolındaǵı mór júzigin sheship, pármandı tastıyıqlaw ushın, yahudiylerdiń dushpanı, Agag áwladınan bolǵan Hammedata ulı Hamanǵa berdi. 11 Patsha oǵan:

– Gúmis ózińde qalsın. Sol xalıqqa qálegenińdi isle, – dedi.

12 Birinshi aydıń on úshinshi kúni patshanıń xatkerleri shaqırıldı. Hamannıń hámme buyrıqları patshanıń nayıplarına ^{▼▼ Nayıplar – Persiya imperiyasında joqarı lawazımdı iyelegen basshılar. Olar birikken bir neshe wálayatlardı basqaratuǵın edi.}, barlıq wálayatlardıń hákimlerine, barlıq xalıqlardıń beklerine, hár bir wálayatqa óz jazıwında hám hár bir xalıqqa óz tilinde patsha Axashweroshtıń atınan jazılıp, onıń mór júzigi menen tastıyıqlandı. 13 «Yahudiylerdiń hámmesi: jası hám ǵarrısı, hayal hám bala-shaǵası on ekinshi aydıń, adar ayınıń on úshinshi kúni, bir kúnde óltirilip, joq qılınsın, qırıp taslanıp, mal-múlki talan-taraj qılınsın», – degen patshanıń xatı patshalıqtıń pútkil wálayatlarına shabarmanlar arqalı jiberildi. 14 Bul pármannıń kóshirmesi hár bir wálayatta nızam sıpatında járiyalanıp, barlıq xalıqlarǵa bildiriliwi tiyis boldı. Sebebi hámme belgilengen sol kúnge tayar bolıp turıwı kerek edi.

15 Shabarmanlar patshanıń buyrıǵı menen asıǵıs jolǵa shıqtı. Párman Suza qalasında da járiyalandı. Qala xalqı albırasıp atırǵan waqıtta patsha menen Haman otırıp alıp, sharap ishti.