Est 4 | KaaIBT22L | STEP | Mordoxay bolǵan islerdiń hámmesinen xabar tapqanda kiyimlerin jırtıp, aza kiyimin kiydi hám basına kúl shashıp, dad salıp baqırıp jılawı menen qala ortasına keldi.

‏ Esther 4

Mordoxaydıń Esterden járdem sorawı

1 Mordoxay bolǵan islerdiń hámmesinen xabar tapqanda kiyimlerin jırtıp, aza kiyimin kiydi hám basına kúl shashıp, dad salıp baqırıp jılawı menen qala ortasına keldi. 2 Ol barıp, saray dárwazasınıń aldında turdı, óytkeni aza kiyimindegi hesh bir adamdı sarayǵa kirgizbeytuǵın edi. 3 Sonday-aq patshanıń buyrıǵı hám pármanı jetip barǵan hár bir wálayatta yahudiyler ullı qayǵıǵa batıp, oraza tuttı hám dad salıp jılastı. Kópshiligi aza kiyimin kiyip, kúldiń ústinde jattı.

4 Xanbiyke Esterdiń qánizekleri hám aqtaları kelip, Mordoxay tuwralı xabar bergende, Ester qattı tınıshsızlandı. Ústindegi aza kiyimlerin sheship, mınalardı kiyip alsın dep, ol Mordoxayǵa kiyimler jiberdi. Biraq Mordoxay olardı qabıl etpedi.

5 Ester ózine patsha tárepinen xızmetshi etip tayınlanǵan Hatax degen aqtasın shaqırtıp alıp, oǵan Mordoxayǵa ne bolǵanın bilip keliwdi buyırdı. 6 Hatax patsha sarayınıń dárwazası aldındaǵı ashıq maydanǵa, Mordoxaydıń janına ketti. 7 Mordoxay oǵan basına túsken hámme nárseni hám Hamannıń yahudiylerdi qırıp taslaw ushın patsha qaznasına qansha gúmis beriwdi wáde etkenin de aytıp berdi. 8 Keyin Mordoxay yahudiylerdi qırıp taslaw haqqında Suzada járiyalanǵan pármannıń bir kóshirmesin Hataxqa berip: «Esterge mınanı kórsetip, oǵan hámmesin túsindir. Ester patshaǵa barsın hám onnan óz xalqına rehim etiwdi jalbarınıp sorasın», – dep tapsırdı.

9 Hatax qaytıp kelip, Mordoxaydıń aytqanların Esterge jetkizdi. 10 Ester Hataxtı Mordoxayǵa jáne jiberip, mına sózlerdi jetkiziwdi buyırdı: 11 «Saraydıń ishki háwlisine, patshanıń aldına shaqırılmastan kirgen hár bir adamdı, onıń erkek yamasa hayal bolıwına qaramastan, tek bir jaza, yaǵnıy ólim jazası kútedi. Bul haqqında patshanıń hámme xızmetshileri de, onıń qol astındaǵı wálayatlardıń xalıqları da biledi. Tek patsha kimge óziniń altın hasasın sozsa, sol adam ǵana tiri qaladı. Men de patshanıń aldına otız kúnnen beri shaqırılǵan joqpan».

12 Hatax Esterdiń bul sózlerin Mordoxayǵa jetkizgende, 13 Mordoxay Esterge mına juwaptı qaytardı: «Sarayda jasaǵanım ushın pútkil yahudiyler ishinde jalǵız ózim aman qalaman, dep oylama. 14 Eger sen házir úndemey qalsań, yahudiylerge járdem hám qutqarılıw basqa jaqtan keledi. Al sen hám seniń ákeńniń úy-ishi nabıt bolasızlar. Kim biledi, bálkim, usınday kúnler ushın sen xanbiyke bolıw mártebesine erisken shıǵarsań».

15 Ester de Mordoxayǵa mına juwaptı qaytardı: 16 «Barıp, Suzadaǵı barlıq yahudiylerdi jıynap, men ushın oraza tutıńlar. Úsh kún hám úsh tún hesh nárse iship-jemeńler. Men de óz qánizeklerim menen sizler sıyaqlı oraza tutaman, sońınan bul nızamǵa qarsı bolsa da, patshanıń aldına baraman. Eger meniń óliwim tiyis bolsa, ólemen».

17 Solay etip, Mordoxay sol jerden ketip, Esterdiń ózine buyırǵanlarınıń hámmesin orınladı.