‏ Esther 6

Mordoxayǵa húrmet kórsetiliwi

1Sol túni patsha Axashweroshtıń uyqısı qashtı. Ol jılnama kitabın ákeliwdi buyırdı hám kitap patshaǵa oqıp berildi. 2Onnan dárwaza saqshıları bolǵan Bigtan hám Teresh degen eki aqtanıń patsha Axashweroshtı óltiriwdi rejelestirgeni, bunı Mordoxaydıń bilip qalǵanı hám xabarlaǵanı tuwralı jazılǵan sózler tabıldı.

3Patsha:

– Bul isi ushın Mordoxayǵa qanday húrmet-izzet kórsetildi? – dep soradı.

Patshanıń arnawlı xızmetshileri:

– Oǵan hesh nárse de islenbedi, – dep juwap berdi.

4Sonda patsha:

– Háwlide kim bar? – dep soradı. Tayarlatıp qoyǵan darına Mordoxaydı astırıwdı patshadan soraw ushın, Haman tap sol waqıtta saraydıń sırtqı háwlisine kelgen edi.

5Xızmetshileri patshaǵa:

– Háwlide Haman kútip turıptı, – dep juwap berdi.

– Ishke kirsin, – dedi patsha.

6Haman ishke kirgende, patsha onnan:

– Patsha húrmet kórsetkisi kelgen adamına ne islewi kerek? – dep soradı.

Haman ishinen: «Patsha mennen basqa kimge húrmet kórsetiwdi qáler edi», – dep oylap, 7patshaǵa bılay dedi:

– Patsha húrmet kórsetkisi kelgen adamǵa 8patsha kiygen patshalıq kiyim menen patsha mingen at ákelinsin hám attıń basına patshalıq taj kiydirilsin. 9Kiyim de, at ta patshanıń eń abıraylı wázirleriniń birine berilsin. Ol adam patsha húrmet kórsetkisi kelgen adamǵa sol kiyimlerdi kiygizip, sol atqa mindirip, onı qala maydanı boylap aylandırsın. Onıń aldında júrip: «Mine, patsha kimge húrmet kórsetkisi kelse, oǵan usılay isleydi», – dep jar salsın, – dedi.

10Sonda patsha Hamanǵa:

– Tez bar da, kiyimler menen attı alıp kel hám saray xızmetshisi yahudiy Mordoxayǵa ózińniń aytqanlarıńdı isle. Aytqanlarıńnıń birewi de qalıp qoymasın, – dedi.

11Solay etip, Haman kiyimlerdi hám attı alıp keldi. Keyin Mordoxaydı kiyindirip, onı atqa mindirdi de, qala maydanı boylap alıp júrdi hám onıń aldında: «Mine, patsha kimge húrmet kórsetkisi kelse, oǵan usılay isleydi», – dep jar saldı.

12Sońınan Mordoxay sarayǵa qaytıp keldi. Haman bolsa, shermendelikten júzin jawıp, asıǵıs úyine qayttı. 13Haman hayalı Zereshke hám hámme doslarına júz bergen barlıq waqıyalar tuwralı aytıp berdi. Sonda hayalı Zeresh hám keńesshileri oǵan:

– Seniń mártebeń Mordoxay aldında tómen túse baslaǵan eken, eger ol yahudiy bolsa, onda sen onı jeńe almaysań, kerisinshe, onıń aldında jıǵılatuǵınıń gúmansız, – dedi.

14Olar ele sóylesip otırǵanda, patshanıń aqtaları kelip, Hamandı Ester tayarlaǵan zıyapatqa asıǵıs alıp ketti.
Copyright information for KaaIBT22L