Est 7 | KaaIBT22L | STEP | Solay etip, patsha Haman menen birge xanbiyke Esterdiń zıyapatına keldi.

‏ Esther 7

Hamannıń ólimge húkim etiliwi

1 Solay etip, patsha Haman menen birge xanbiyke Esterdiń zıyapatına keldi. 2 Ekinshi zıyapat kúni de olar sharap iship otırǵanda, patsha Esterge jáne:

– Ester, qanday tilegiń bar? Tilegiń orınlanadı. Qanday ótinishiń bar? Patshalıqtıń yarımın sorasań da beriledi, – dedi.

3 Sonda xanbiyke Ester juwap berip bılay dedi:

– Taqsırım! Eger maǵan kewlińiz tolǵan bolsa hám durıs dep tapsańız, meniń janımdı saqlap qalıwıńızdı tileymen hám meniń xalqıma da ómir baǵıshlawıńızdı ótinemen. 4 Sebebi men hám meniń xalqım óltirilip joq etiliw hám qırıp taslanıw ushın satılǵanbız. Eger bizler qul hám shorı etip satılǵanımızda, men úndemegen bolar edim. Óytkeni bul is sebepli patshamızdıń tınıshın alıw maqul bolmas edi, – dedi.

5 Sonda patsha Axashwerosh xanbiyke Esterden:

– Bunday isti islewge kimniń batılı bardı, sol adam qay jerde? – dep soradı.

6 Ester:

– Dushpanımız hám jawımız – bul jawız Haman, – dedi.

Sonda patshanıń hám onıń hayalınıń aldında Hamannıń húreyi ushıp, qorqıp ketti. 7 Patsha ǵázeplenip, ornınan turdı da, saray baǵına qaray ketti. Al Haman xanbiyke Esterden óz janın qutqarıwın ótinip soraw ushın ishte qaldı. Óytkeni ol patshanıń ózin qatań jazalawdı qarar etkenin túsingen edi.

8 Patsha saray baǵınan zıyapat bolıp atırǵan jerge qaytqanda, Ester jambaslap otırǵan orınlıqta Hamannıń et betinen jıǵılıp atırǵanın kórdi de:

– Bul adam sarayda, hátteki, meniń kóz aldımda hayalıma zorlıq qılmaqshı ma? – dep baqırdı. Patsha usı sózlerdi aytıp bolar-bolmastan, patshanıń xızmetshileri Hamannıń betin japtı.

9 Sońınan patshaǵa xızmet etetuǵın aqtalardıń biri Xarbona bılay dedi:

– Hamannıń úyiniń aldında biyikligi eliw shıǵanaq keletuǵın dar turıptı. Bul dar patshamızdı eskertip, onıń ómirin saqlap qalǵan Mordoxaydı asıw ushın qurılǵan, – dedi.

Sonda patsha:

– Sol darǵa onıń ózin asıńlar! – dep buyrıq berdi. 10 Solay etip, Hamannıń Mordoxaydı asıw ushın qurdırǵan darına onıń ózin astı. Sonnan keyin ǵana patshanıń ashıwı basıldı.