Exo 28 | KaaIBT22L | STEP | – Ruwxaniy bolıp, Maǵan xızmet etiwi ushın, izraillılar arasınan ájaǵań Xarondı, onıń ulları Nadab, Abihu, Elazar hám Itamardı janıńa al.

‏ Exodus 28

Ruwxaniylerdiń kiyimleri

1 – Ruwxaniy bolıp, Maǵan xızmet etiwi ushın, izraillılar arasınan ájaǵań Xarondı, onıń ulları Nadab, Abihu, Elazar hám Itamardı janıńa al. 2 Ájaǵań Xaronnıń mártebeli bolıp, kórkem kóriniwi ushın, oǵan muxaddes kiyimlerdi tiktirip ber. 3 Men ayrıqsha qábilet bergen adamlarǵa ayt, olar Xaronnıń Maǵan baǵıshlanıp, ruwxaniylik etiwi ushın, oǵan kiyim tiksin. 4 Olar mına kiyimlerdi tiksin: qaltalı óńirshe, efod, bahalı úst kiyim, naǵıslı uzın kóylek, sálle hám belbew. Ruwxaniy bolıp Maǵan xızmet qılıwı ushın, olar ájaǵań Xaronǵa hám onıń ullarına bul muxaddes kiyimlerdi tiksin. 5 Olar altın, jáne júnnen iyirilgen qızǵısh kók, shım qızıl, qırmızı jiplerdi hám hasıl zıǵır jibin qollansın.

Efod

6 – Efodtı ^{▼▼ Efod – sózlikke qarań.} altın sabaq, qızǵısh kók, shım qızıl hám qırmızı jipler menen hasıl zıǵır jipten sheberlik penen naǵıslap islesin. 7 Onıń aldınǵı hám artqı táreplerin bir-biri menen biriktiriw ushın, iyin arqalı ótetuǵın eki bawı bolsın. 8 Efodtıń joqarısına biriktirilgen halda belbew islet. Bul efod sıyaqlı altın sabaq, qızǵısh kók, shım qızıl, qırmızı jipler hám hasıl zıǵır jipten islensin. 9 Keyin sen eki oniks tas alıp, olarǵa Izrail ullarınıń atların oyıp jazdır. 10 Jasına qarap, altawın birinshi tasqa, qalǵan altawın ekinshi tasqa oyıp jazdır. 11 Ustanıń tasqa mórdi oyıp jazǵanınday, Izrail ullarınıń atların da eki tasqa oyıp jazdır hám taslardı órme naǵıslı altın qasnaqqa qondır. 12 Sońınan usı taslardı efodtıń iyin bawlarına ornat. Xaron Jaratqan Iyeniń, yaǵnıy Meniń aldıma kirgende, sol taslar Izraildıń on eki urıwın esletip turıw ushın, ol eki iyin bawında bul taslardı alıp júredi.

13 Altınnan jáne órme naǵıslı eki qasnaq islet. 14 Sap altınnan órilgen shınjırlar isletip, olardı qasnaqlarǵa biriktir.

Óńirshe

15 – Qudaydıń erkin biliwde qollanılatuǵın qaltalı óńirshe islet. Onı da efod sıyaqlı altın sabaq, qızǵısh kók, shım qızıl, qırmızı jipler hám hasıl zıǵır jipten sheberlik penen naǵıslap islet. 16 Óńirshe tórt múyeshli hám eki qabatlı bolıp, uzınlıǵı da bir qarıs, eni de bir qarıs bolsın. 17 Óńirshege tórt qatar qılıp hasıl taslardı qada. Birinshi qatarda serdolik, xrizolit hám zúmret, 18 ekinshi qatarda periwza, lazurit hám gagat, 19 úshinshi qatarda yaqıt, agat hám ametist, 20 tórtinshi qatarda sarı yaqıt, oniks hám yashma bolsın. Taslar altın qasnaqlarǵa ornatılıwı tiyis. 21 Taslar on eki bolıp, olarǵa mór oyılǵanday qılıp, Izraildıń on eki ulınıń atları birme-bir oyılıp jazılsın. Bul taslar Izraildıń on eki urıwınıń tımsalı bolsın.

22 Qaltalı óńirshe ushın sap altınnan órilgen shınjırlar islet. 23 Taǵı da, eki altın halqa da isletip, olardı óńirsheniń ústingi eki múyeshine taq. 24 Órilgen eki altın shınjırdıń bir ushın óńirshedegi halqalarǵa ildir. 25 Al ekinshi ushın iyin bawlardaǵı eki qasnaqqa bekkemlep, efodtıń aldı betine bayla. 26 Jáne eki altın halqa islet. Olardı óńirsheniń astınǵı eki shetine, efodqa jaqın bolǵan ishki jiyegine taq. 27 Taǵı da, eki altın halqa islet. Olardı efodtıń aldı betindegi iyin bawlardıń astınan, tigiske jaqın qılıp, belbewdiń joqarısınan taq. 28 Qaltalı óńirsheniń halqaları menen efodtıń halqaları qızǵısh kók bawlar menen bir-birine baylansın. Sonda óńirshe efodtan ayırılmay, efodtıń belbewiniń joqarısında turadı.

29 Solay etip, Xaron hár sapar Muxaddes orınǵa kirgende, Jaratqan Iyeniń aldında máńgige estelik bolıwı ushın, Izrail ullarınıń atları jazılǵan óńirsheni júreginiń tusında kóterip júredi. 30 Usı qaltalı óńirshege Urim menen Tummimdi ^{▼▼ Urim menen Tummim – bul Qudaydıń erkin biliw ushın arnalǵan taslar bolıp, olardı shek taslaw jolı menen qollanǵan bolıwı múmkin.} salıp qoy. Xaron Meniń aldıma kelgende, olar Xaronnıń júreginiń tusında bolsın. Xaron izraillılarǵa Meniń erkimdi bildiriw ushın qollanatuǵın Urim menen Tummimdi Jaratqan Iyeniń aldında bárqulla júreginiń tusında alıp júrsin.

Ruwxaniylerdiń basqa kiyimleri

31 – Efodtıń ishinen kiyiletuǵın bahalı kiyim tolıq qızǵısh kók jipten islensin. 32 Onda bas sıyatuǵın orın bolsın. Ol sótilip ketpewi ushın, onıń jiyeklerin aylandırıp toqıt. 33 – 34 Usı kiyimniń etegine qızǵısh kók, shım qızıl hám qırmızı jiplerden islengen anardı hám onıń aralarına kishkene altın qońırawlardı gezekpe-gezek taqtır. 35 Xaron xızmet etkende, usı kiyimdi kiysin. Ol Muxaddes orınǵa kirgende hám shıqqanda qońıraw sesti esitilsin, sonda ol ólmey aman qaladı.

36 Sap altınnan taj sıyaqlı mańlaysha isletip, oǵan mór oyǵanday qılıp: «Jaratqan Iyege baǵıshlanǵan» dep jazdır. 37 Mańlayshanı qızǵısh kók baw menen sálleniń aldı betine baylap qoy. 38 Solay etip, izraillılar Maǵan arnap muxaddes sıyların ákelgende, qátege jol qoysa, olardıń ayıpların Xaron óz moynına aladı. Meniń olardıń qurbanlıqların qabıl alıwım ushın, Xaron mańlayshanı bárqulla mańlayına taǵıp júriwi tiyis.

39 Hasıl zıǵırdan bir uzın kóylek naǵıslap toqıt hám hasıl zıǵırdan bir sálle islet. Jáne de, naǵıslı belbew toqıt.

40 Xaronnıń ulları mártebeli bolıp, kórkem kóriniwi ushın, olarǵa uzın kóylekler, belbewler hám kishigirim sálleler tiktir. 41 Bul kiyimlerdi ájaǵań Xaronǵa hám onıń ullarına kiydir. Olardıń baslarına may quyıp, ruwxaniylik wazıypasına tayınla. Usılay etip, olardıń xızmet etiwi ushın, Maǵan baǵıshla.

42 Deneniń ashıq jerleri kórinip qalmawı ushın, olarǵa zıǵırdan diz kiyimler tiktir. Bul kiyimler belinen dizesine deyin jawıp tursın. 43 Xaron hám onıń ulları Ushırasıw shatırına kirgende yamasa Muxaddes jerde xızmet etiw ushın qurbanlıq orınǵa jaqınlaǵanda, usı kiyimlerdi kiyiwi tiyis. Bolmasa, olar ayıplı bolıp, ólip qaladı. Xaron hám onıń urpaqları ushın bul máńgi qaǵıyda bolsın.