Exo 30 | KaaIBT22L | STEP | – Tútetki tútetiw ushın, akaciya aǵashınan tútetki tútetiletuǵın orın islet.

‏ Exodus 30

Tútetki tútetiletuǵın orın

1 – Tútetki tútetiw ushın, akaciya aǵashınan tútetki tútetiletuǵın orın islet. 2 Ol tórt múyeshli, uzınlıǵı bir shıǵanaq, eni bir shıǵanaq, biyikligi eki shıǵanaq bolıp, ózinen shıǵıp turatuǵın shaqları menen bir tutas qılıp islensin. 3 Orınnıń ústin, qaptalların hám shaqların sap altın menen qaplap, átirapına altın jiyek islet. 4 Eki qaptalındaǵı jiyektiń astına eki altın halqa ornat. Orındı kóterip júriw ushın, usı halqalardan sırıqlar ótkiziledi. 5 Sırıqlardı akaciya aǵashınan isletip, altın menen qaplat. 6 Orındı Kelisim sandıǵınıń, yaǵnıy sandıqtıń ústindegi gúnadan páklew qaqpaǵınıń aldındaǵı perdeniń sırtına, Men seniń menen ushırasatuǵın jerdiń sırtına qoy.

7 Xaron hár kúni azanda shıralardı tayarlaǵanda, orınnıń ústinde xosh iyisli tútetki tútetsin. 8 Al keshqurın shıralardı jaqqanda, jáne tútetki tútetsin. Solay etip, Meniń aldımda áwladlar boyı tútetki úzliksiz janıp turadı. 9 Orınnıń ústinde jat bolǵan tútetki tútetpeń hám bunda jandırılatuǵın qurbanlıq ta, ǵálle sadaqasın da bermeń. Onıń ústine ishimlik sadaqasın da quymań. 10 Xaron jılına bir ret gúnalardıń keshiriliwi ushın berilgen qurbanlıqtıń qanın tútetki tútetiletuǵın orınnıń shaqlarına súrtip, orındı pákleydi. Bul hár jılı, áwladlar boyı dawam etsin. Orın Maǵan, Jaratqan Iyege baǵıshlanǵan bolıp, júdá muxaddesdur.

Muxaddes shatır ushın tólenetuǵın qun

11 Sońınan Jaratqan Iye Muwsaǵa bılay dedi:

12 – Izraillılardıń esabın alǵanıńda, esaptan ótken hár bir adam óz janı ushın Maǵan qun tólesin. Sonda olardıń esabın alǵanıńda, olarǵa apat keltirmeymen. 13 Esaptan ótetuǵın hár bir adam Maǵan Muxaddes orın ólshemi menen yarım shekel gúmis názir bersin. Bir shekel jigirma geradan ^{▼▼ Jigirma gera – bir gera shama menen 0,5 gr.} ibarat. 14 Jigirma hám onnan joqarı jastaǵı esaptan ótetuǵın adamlar Maǵan názir beriwi tiyis. 15 Janıńızdıń qunı sıpatında usı názirdi bergenińizde, bay adam yarım shekelden artıq, al jarlı adam yarım shekelden kem bermewi kerek. 16 Izraillılardıń qun sıpatında bergen gúmislerin alıp, Ushırasıw shatırınıń xızmetinde qollan. Bul Jaratqan Iyeniń aldında janlarıńızdıń qunı tólengenin esletip turadı.

Qoladan islengen úlken lágen

17 Jáne Jaratqan Iye Muwsaǵa bılay dedi:

18 – Juwınıw ushın, qoladan úlken lágen islet. Onıń tuyaqları da qoladan bolsın. Lágendi Ushırasıw shatırı menen qurbanlıq orınnıń arasına qoyıp, ishine suw quy. 19 Xaron hám onıń ulları ayaq-qolların oǵan juwadı. 20 Olar Ushırasıw shatırına kirmesten, yaǵnıy Jaratqan Iyege sıylar tútetip jandırıw ushın qurbanlıq orınǵa jaqınlamastan aldın, ólip qalmawı ushın, suwǵa juwınıp alıwı tiyis. 21 Ólip qalmawı ushın olar ayaq-qolların juwsın. Xaron hám onıń urpaqları ushın bul máńgi qaǵıyda bolıp qaladı.

Maylaw rásimine arnalǵan may

22 Jaratqan Iye Muwsaǵa taǵı bılay dedi:

23 – Mına eń jaqsı xosh iyisli zatlardı al: 500 shekel suyıq mirra ^{▼▼ Mirra – xosh iyisli shayır.}, usınıń yarımına teń, yaǵnıy 250 shekel korica, 250 shekel iyisli qamıs 24 hám 500 shekel kassiya ^{▼▼ Kassiya – korica sıyaqlı xosh iyisli qabıq.}. Hámmesi Muxaddes orın ólshemi menen ólshensin. Bir hin záytún mayın alıp, 25 bulardı sheberlik penen aralastırıp, xosh iyisli muxaddes may isle. Ol maylaw rásimine arnalǵan muxaddes may boladı. 26 Bul maydı Ushırasıw shatırına, Kelisim sandıǵına, 27 stolǵa, shıra qoyǵıshqa hám olarǵa tiyisli hámme buyımlarǵa, tútetki tútetiletuǵın orınǵa, 28 qurbanlıq jandırılatuǵın orınǵa hám onıń hámme buyımlarına, úlken lágenge hám onıń tuyaqlarına serpip shıq. 29 Sol tárizde olardı muxaddes qıl. Sonda olar júdá muxaddes boladı. Olarǵa tiygen hár bir nárse de muxaddes boladı.

30 Soń, ruwxaniy bolıp Maǵan xızmet etiwi ushın, Xaron hám onıń ulların maylap, olardı baǵıshla. 31 Al izraillılarǵa bılay dep ayt: «Bul maylaytuǵın muxaddes may áwladlar dawamında tek Men ushın qollanıladı. 32 Onı basqa adamlardıń denesine súrtiwge bolmaydı. Usınday quramdaǵı maydı ózlerińizge tayarlamańlar. Ol muxaddes hám sizler ushın da muxaddes bolıwı kerek. 33 Kim de kim usınday maydı tayarlap, onı ruwxaniy bolmaǵan adamǵa jaqsa, ol Izrail xalqı arasınan joq qılınadı».

Xosh iyisli zatlar

34 Keyin Jaratqan Iye Muwsaǵa bılay dedi:

– Mına xosh iyisli zatlardı: balzamdı, mollyusk baqanshaǵın, galban shayırın hám taza livan shayırın al. Olardıń hámmesi birdey mólsherde bolsın. 35 Bulardı sheberlik penen aralastırıp, tútetki isle. Olar duzlanǵan, sap hám muxaddes boladı. 36 Onıń bir bólegin alıp, maydalap unta hám Meniń sen menen ushırasatuǵın Ushırasıw shatırımdaǵı Kelisim sandıǵınıń aldına qoy. Sizler ushın ol júdá muxaddes boladı. 37 Ózlerińiz ushın usınday quramdaǵı tútetki islemeńler. Onı Jaratqan Iyege arnalǵan muxaddes dep sanańlar. 38 Kim de kim ózi ushın tútetiwge usınday tútetki islese, ol xalıq arasınan joq qılınıwı tiyis.