Exo 31 | KaaIBT22L | STEP | Jaratqan Iye Muwsaǵa bılay dedi:

‏ Exodus 31

Muxaddes shatırdı isleytuǵın ustalar

1 Jaratqan Iye Muwsaǵa bılay dedi:

2 – Minekey, Men Yahuda urıwınan bolǵan Xurdıń aqlıǵı, Uriydiń ulı Besaleldi tańladım. 3 Onı Qudaydıń Ruwxına toltırıp, oǵan ónermentshiliktiń barlıq tarawlarında qábilet, uqıp hám sheberlik berdim. 4 Ol altın, gúmis hám qoladan kórkem islerin islewge, 5 hasıl taslardı jonıp qondırıwǵa, aǵash ustashılıǵı boyınsha hám hár túrli ónermentshilik islerin islewge qábiletli. 6 Jáne de, Dan urıwınan bolǵan Axisamaxtıń ulı Oholiabtı oǵan járdemshi qılıp berdim. Saǵan buyırǵan islerimniń hámmesin isley alıwı ushın, Men olarǵa járdem beretuǵın barlıq adamlarǵa ayrıqsha qábilet berdim. 7 Olar Ushırasıw shatırın, Kelisim sandıǵın, sandıqtıń ústindegi qaqpaqtı, shatırdaǵı barlıq buyımlardı, 8 stol hám onıń buyımların, sap altın shıra qoyǵıshtı hám onıń buyımların, tútetki tútetiletuǵın orındı, 9 qurbanlıq jandırılatuǵın orındı hám orınnıń hámme buyımların, úlken lágen hám onıń tuyaqların, 10 sonday-aq, ruwxaniy Xaron ushın ájayıp qılıp tigilgen muxaddes kiyimlerdi, onıń ullarınıń ruwxaniylik kiyimlerin, 11 maylaytuǵın záytún mayın, Muxaddes orın ushın xosh iyisli tútetkini, ulıwma hámmesin Meniń saǵan buyırǵanımday qılıp islesin.

Shabbat kúni

12 Sońınan Jaratqan Iye Muwsaǵa bılay dedi:

13 – Izraillılarǵa mınalardı ayt: «Meniń Shabbatıma ámel qılıńlar. Sebebi bul Men hám Izrail xalqı arasındaǵı áwladlar boyı dawam etetuǵın bir nıshan boladı. Solay etip, Jaratqan Iye ekenimdi hám sizlerdi Ózime ajıratıp alıp, muxaddes qılǵanımdı bilip alasızlar.

14 Shabbat kúnine ámel qılıńlar. Óytkeni bul sizler ushın muxaddes. Kim de kim onı xorlasa, ol sózsiz óltirilsin. Sol kúni jumıs islegen hár bir adam óz xalqınıń arasınan joq qılınıwı tiyis. 15 Altı kún jumıs isleńler, biraq jetinshi kún Jaratqan Iyege arnalǵan tolıq dem alatuǵın muxaddes Shabbat kúni. Usı kúni jumıs islegen hár bir adam sózsiz óltirilsin. 16 Izraillılar máńgi kelisim sıpatında Shabbat kúnin, áwladlar dawamında saqlasın. 17 Bul Meniń menen izraillılar arasındaǵı máńgilik bir nıshan boladı. Sebebi Men, Jaratqan Iye aspan hám jerdi altı kúnde jarattım, al jetinshi kúni dem alıp, hállendim».

18 Solay etip, Quday Sinay tawında Muwsa menen sóylesip bolıp, oǵan buyrıqlar jazılǵan eki tastı berdi. Quday bul buyrıqlardı taslarǵa Óz qolı menen jazǵan edi.