‏ Exodus 33

Sinaydan ketiwge tayarlıq

1Sońınan Jaratqan Iye Muwsaǵa bılay dedi:

– Barıńlar, óziń de, sen Mısır jerinen alıp shıqqan xalqıń da bul jerdi tárk etip, Men Ibrayımǵa, Ísaqqa hám Yaqıpqa: «Bul jerdi seniń urpaqlarıńa beremen», – dep ant ishken jerime ketińler. 2Men seniń aldıńnan Óz perishtemdi jiberip, qanan, amor, xet, periz, xiw hám ebus xalıqların sol jerden quwıp shıǵaraman. 3Sút hám pal aǵıp turǵan jerge ketińler. Meniń Ózim sizler menen barmayman, sebebi sizler qaysar xalıqsız. Bolmasa, sizlerdi jolda joq qılıp jiberiwim múmkin.

4Xalıq bul jaman xabardı esitip, qayǵıǵa tústi hám hesh kim bezeniw buyımların taqpadı. 5Óytkeni Jaratqan Iye Muwsaǵa: «Izraillılarǵa bılay de: „Sizler qaysar xalıqsız. Eger Men bir sát-aq sizler menen birge barsam, sizlerdi joq qılıwım múmkin. Endi bezeniw buyımlarıńızdı sheship qoyıńlar. Al sizlerge ne isleytuǵınım haqqında bir qararǵa kelemen“», – degen edi. 6Sonlıqtan izraillılar Xoreb tawınan shıǵıp ketkennen keyin bezeniw buyımların sheship tasladı.

Ordanıń sırtına qurılǵan Ushırasıw shatırı

7Muwsa ordanıń sırtına, ordadan uzaǵıraq jerge shatır tigetuǵın edi. Ol bul shatırdı «Ushırasıw shatırı» dep ataǵan edi. Jaratqan Iye menen másláhátlesiwdi qálegen adam ordanıń sırtındaǵı Ushırasıw shatırına keletuǵın edi. 8Muwsa shatırǵa qaray ketkende, pútkil xalıq ornınan turatuǵın edi. Hár bir adam óz shatırınıń kirer awzında turıp, Muwsa ishke kirgenshe izinen qarap turatuǵın edi. 9Muwsa shatırǵa kirip, Jaratqan Iye menen sóyleskende, minara sıyaqlı bult tómen túsip, shatırdıń kirer awzınıń aldında turatuǵın edi. 10Bulttıń shatırdıń aldında turǵanın kórgen hár bir adam ornınan turıp, óz shatırınıń kirer awzında sıyınatuǵın edi. 11Jaratqan Iye Muwsa menen júzbe-júz, dos sıyaqlı sóylesetuǵın edi. Keyin Muwsa ordaǵa qaytıp keletuǵın edi. Biraq onıń jas járdemshisi Nun ulı Eshua shatırdı tárk etpeytuǵın edi.

Jaratqan Iyeniń birge bolıwǵa bergen wádesi

12Sońınan Muwsa Jaratqan Iyege bılay dedi:

– Sen maǵan: «Bul xalıqtı baslap alıp júr», – deyseń. Biraq meniń menen kimdi jiberetuǵınıńdı aytpadıń. Maǵan: «Seni jaqınnan tanıyman, sen Meniń miyrimime eristiń», – degen ediń. 13Eger men Seniń miyrimińe erisken bolsam, ótinemen, maǵan Óz jolıńdı kórset. Seni ele de jaqsı bilip, miyrimińe erisip barayın. Bul xalıqtıń Óz xalqıń ekenin umıtpa.

14Jaratqan Iye Muwsaǵa:

– Ózim Seniń menen birge baraman hám seni tınıshlıqqa eristiremen, – dedi.

15Al Muwsa Jaratqan Iyege bılay dedi:

– Eger Seniń Óziń bizler menen birge barmasań, bizlerdi bul jerden shıǵarma. 16Bolmasa, men hám xalqıń Seniń miyrimińe eriskenimizdi qalay biliwge boladı? Seniń bizlerge joldas bolǵanıńnan emes pe? Tek usı arqalı ǵana men hám Seniń xalqıń jer júzindegi basqa xalıqlardan ayırılıp turamız.

17Jaratqan Iye Muwsaǵa:

– Aytqanıńday isleymen. Sebebi sen Meniń miyrimime eristiń hám seni jaqınnan tanıyman, – dedi.

18Sonda Muwsa Oǵan:

– Maǵan saltanatıńdı kórset, – dedi.

19Jaratqan Iye Muwsaǵa bılay dedi:

– Men pútkil iygiligimdi seniń aldıńnan alıp ótip, aldıńda Ózimniń «Jaratqan Iye» degen atımdı járiyalayman. Kimge miyrim-shápáátimdi beriwdi qálesem, soǵan miyrim-shápáátimdi beremen. Kimge rehim etiwdi qálesem, soǵan rehim etemen. 20Tek Meniń júzimdi kóre almaysań. Óytkeni Meniń júzimdi kórgen adam tiri qalmaydı. 21Maǵan jaqın jerde jartas bar. Sen sol jartastıń ústinde tur. 22Saltanatım janıńnan ótip baratırǵanda, seni jartastıń jarıǵına turǵızıp qoyıp, ótip ketkenimshe, seni qolım menen jawıp turaman. 23Keyin qolımdı alǵanımda, sen Meni artımnan kóreseń. Biraq júzimdi kórmeyseń.