‏ Exodus 35

Dem alıs kúni haqqında

1Muwsa Izrail xalqınıń pútkil jámiyetin shaqırıp alıp, olarǵa bılay dedi:

– Jaratqan Iye mına islerdi islewińizdi buyırdı: 2altı kún jumıs isleń. Biraq jetinshi kún sizler ushın Jaratqan Iyege arnalǵan tolıq dem alatuǵın muxaddes Shabbat kúni boladı. Sol kúni jumıs islegen hár bir adam óltiriledi. 3Shabbat kúni óz shańaraqlarıńızda ot ta jaqpań.

Muxaddes shatır ushın sadaqalar

4Muwsa Izrail xalqınıń pútkil jámiyetine bılay dedi:

– Jaratqan Iyeniń buyrıǵı mınaw: 5ózlerińizde barınan Jaratqan Iyege názir berińler. Oǵan shın kewilden beriwdi qálewshiler mına nárselerdi bersin: altın, gúmis, qola, 6júnnen iyirilgen qızǵısh kók, shım qızıl, qırmızı jip hám hasıl zıǵır jip, eshkiniń júni, 7qızılǵa boyalǵan qoshqar terisi, jumsaq teri hám akaciya aǵashı, 8shıralar ushın záytún mayı, maylaw rásimine arnalǵan may hám xosh iyisli tútetki ushın xosh iyisli zatlar, 9bas ruwxaniydiń efodına hám qaltalı óńirshesine taǵılatuǵın oniks hám qımbatbaha taslar.

10Arańızdaǵı barlıq uqıplı adamlar kelip, Jaratqan Iyeniń buyırǵanlarınıń hámmesin islesin. Olar mınalardı: 11Muxaddes shatırdı, onıń ishki hám sırtqı japqıshların, ilmeklerin, taxtayların, qadaların, baqanların, ultanların, 12Kelisim sandıǵı hám onıń sırıqların, qaqpaqtı, bólmeni jawıp turatuǵın perdeni, 13stol hám onıń sırıqların, stoldıń barlıq buyımların hám usınılǵan nanlardı, 14jaqtı túsiriw ushın shıra qoyǵıshtı, onıń buyımların, onıń shıraların hám shıralar ushın záytún mayın, 15tútetki tútetiletuǵın orın menen onıń sırıqların, maylaw rásimi ushın záytún mayın, xosh iyisli tútetkini, Muxaddes shatırdıń kirer awzındaǵı perdeni, 16qurbanlıq jandırılatuǵın orındı hám onıń qola torın, sırıqların hám barlıq buyımların, úlken lágendi hám onıń tuyaqların, 17háwliniń perdelerin, baqanların, baqannıń ultanların, háwliniń kirer awzındaǵı perdeni, 18Muxaddes shatırdıń qazıqların, háwliniń qazıqların hám arqanların, 19Muxaddes orında xızmet etiwge arnalıp, ájayıp qılıp tigilgen kiyimlerdi – ruwxaniy Xaronnıń muxaddes kiyimlerin hám onıń ullarınıń ruwxaniylik kiyimlerin islesin.

20Sońınan Izrail xalqınıń pútkil jámiyeti Muwsanıń qasınan ketti. 21Júreginde qálew hám tilegi bar adamlar Ushırasıw shatırınıń qurılısı, ondaǵı xızmet hám muxaddes kiyimler ushın, Jaratqan Iyege sadaqalar alıp keldi. 22Solay etip, júreginde qálewi bar hár bir erkek hám hayal hár túrli altın buyımlardı: bilezik, sırǵa, júzik hám háykellerdi ákelip, Jaratqan Iyege baǵıshlap, usındı. 23Kimde júnnen iyirilgen qızǵısh kók, shım qızıl, qırmızı jip, hasıl zıǵır jip, eshki júni, qızılǵa boyalǵan qoshqar terisi hám jumsaq teri bolsa, alıp keldi. 24Gúmis hám qolanı sadaqa qılıp bere alǵanlar da olardı Jaratqan Iyege arnadı. Kimde akaciya aǵashı bolsa, onı shatırdıń mútájlikleri ushın alıp keldi. 25Jip iyiriwge uqıplı barlıq hayallar óz qolları menen iyirgen qızǵısh kók, shım qızıl, qırmızı jip hám hasıl zıǵır jiplerdi alıp keldi. 26Jún iyirip biletuǵın, júreginde qálewi bar barlıq hayallar da eshki júnin iyirdi. 27Basshılar efodqa hám qaltalı óńirshege taǵılatuǵın oniks hám qımbatbaha taslar, 28shıralar ushın, maylaw ushın hám xosh iyisli tútetki ushın xosh iyisli zatlar menen záytún mayın alıp keldi. 29Hayal, erkek, júreginde qálewi bar barlıq izraillılar Jaratqan Iyeniń Muwsa arqalı islewdi buyırǵan isleri ushın, Jaratqan Iyege ıqtıyarlı sadaqalar berdi.

Muxaddes shatırdı isleytuǵın ustalar

30Muwsa izraillılarǵa bılay dedi:

– Minekey, Jaratqan Iye Yahuda urıwınan bolǵan Xurdıń aqlıǵı, Uriydiń ulı Besaleldi tańlap aldı. 31Onı Qudaydıń Ruwxına toltırıp, oǵan ónermentshiliktiń barlıq tarawlarında qábilet, uqıp hám sheberlik berdi. 32Solay etip, oǵan altın, gúmis hám qoladan kórkem isler islewge, 33hasıl taslardı jonıp qondırıwǵa, aǵash ustashılıǵı boyınsha hám hár qıylı kórkem óner islerin islewge qábilet berdi. 34Jaratqan Iye oǵan hám Dan urıwınan bolǵan Axisamax ulı Oholiabqa basqalarǵa úyretiw uqıbın da berdi. 35Bul adamlardıń hár qanday isti isley alıwı ushın, olarǵa ustashılıq, bezewshilik, qızǵısh kók, shım qızıl, qırmızı jip hám hasıl zıǵır jiplerden toqımashılıq hám hár túrli ónermentshilik islerin islew ayrıqsha qábiletin berdi.