‏ Exodus 36

1– Besalel, Oholiab hám Jaratqan Iye Muxaddes shatırdı qurıw ushın qábilet, uqıp hám sheberlik bergen barlıq adamlar hár bir nárseni Jaratqan Iyeniń buyırǵanınday qılıp islesin.

2Muwsa Besaleldi, Oholiabtı hám Jaratqan Iye qábilet bergen, islewge qálewi bar barlıq adamlardı jumısqa shaqırdı. 3Kelgenler Muxaddes shatırdı qurıw ushın, izraillılar ákelgen barlıq sadaqalardı Muwsadan aldı. Izraillılar hár kúni azanda ıqtıyarlı sadaqaların Muwsaǵa ákeliwdi dawam etti. 4Sonda Muxaddes shatırdı qurıw isleri menen shuǵıllanıp atırǵan ustalar islerin qaldırıp, 5Muwsanıń janına keldi de:

– Xalıq Jaratqan Iye buyırǵan is ushın kereginen zıyat alıp kelmekte, – dedi.

6Sonda Muwsa xalıqqa járiyalanıwı ushın mınaday buyrıq berdi: «Endi birde bir erkek te, hayal da Muxaddes shatır ushın hesh nárse ákelmesin». Solay etip, xalıq sadaqa ákeliwdi toqtattı. 7Sebebi sol waqıtqa deyin ákelingenler isti pitkeriwge jetetuǵın, hátte, awısıp ta qalatuǵın edi.

Muxaddes shatırdıń qurılıwı

8Islewshiler arasındaǵı uqıplı adamlar shatırdı on perdeden qurdı. Olardı hasıl zıǵır jipten, júnnen iyirilgen qızǵısh kók, shım qızıl hám qırmızı jiplerden islep, ústine kerublardıń súwretlerin sheberlik penen kesteledi. 9Hár bir perdeniń uzınlıǵı jigirma segiz shıǵanaq, eni tórt shıǵanaq edi. Perdelerdiń hámmesi bir ólshemde boldı. 10Olar perdelerdi besew-besewden bir-birine qosıp tikti. 11Birinshi bes perdeniń shetine qızǵısh kók jipten ilgekler tikti. Ekinshi bes perdeniń shetine de solay isledi. 12Birinshi bes perdeniń dáslepki perdesine eliw, ekinshi bes perdeniń sońǵı perdesine eliw ilgek tikti. Ilgekler bir-birine qarama-qarsı jaylasqan edi. 13Sońınan eliw altın ilmek islep, olar járdeminde perdelerdi bir-birine biriktirdi. Sol tárizde shatır bir tutas boldı.

14Jáne de, Muxaddes shatırdıń ústin jabıw ushın, eshki júninen on bir perde isledi. 15Hár bir perdeniń uzınlıǵı otız shıǵanaq, eni tórt shıǵanaq edi. On bir perde de bir ólshemde boldı. 16Olar bes perdeni bir bólek, qalǵan altı perdeni bir bólek qılıp, bir-biri menen biriktirdi. 17Usı biriktirilgen eki bólek perdelerdi bir-birine qosıw ushın, hár bir bólektiń shetlerine eliw-eliwden ilgek tikti. 18Shatırdıń perdelerin bir tutas qılıp biriktiriw ushın, qoladan eliw ilmek isledi. 19Shatır ushın qızılǵa boyalǵan qoshqar terisinen japqısh, onıń ústine jumsaq teriden sırtqı japqısh isledi.

20Taǵı da, olar akaciya aǵashınan shatır ushın tikkesine turatuǵın taxtaylar isledi. 21Hár bir taxtaydıń uzınlıǵı on shıǵanaq, eni bir yarım shıǵanaq edi. 22Hár bir taxtaydıń astına bir-birine qatarlastırıp, eki tuyaqtan ózinen shıǵarıp isledi. Shatırdıń hámme taxtayların usılay isledi. 23Al shatırdıń qubla tárepi ushın jigirma taxtay isledi. 24Usı jigirma taxtaydıń astına qoyılatuǵın qırıq gúmis ultan isledi. Hár bir taxtaydıń tuyaǵınıń astında bir ultannan bolıwı ushın, hár bir taxtayǵa eki ultannan isledi. 25Shatırdıń arqa tárepi ushın jigirma taxtay 26hám hár bir taxtaydıń astına eki ultannan qoyıw ushın, qırıq gúmis ultan isledi. 27Al shatırdıń batısqa qaraǵan art jaǵı ushın altı taxtay 28hám shatırdıń artındaǵı múyeshler ushın eki taxtay isledi.

29Bul múyeshlerdegi taxtaylar tómennen joqarıǵa deyin juplasıp, joqarıdaǵı bir halqa menen biriktirildi. Eki múyesh te usılay islendi. 30Solay etip, segiz taxtay hám hár bir taxtaydıń astına eki ultannan qoyıw ushın, on altı gúmis ultan islendi.

31Akaciya aǵashınan shatırdıń bir tárepindegi taxtaylar ushın bes qada, 32ekinshi tárepindegi taxtaylar ushın bes qada hám artındaǵı, yaǵnıy batıs tárepindegi taxtaylar ushın bes qada isledi. 33Jáne de, taxtaylardıń orta belinen ótetuǵın qadalardı shatırdıń bir shetinen ekinshi shetine jetetuǵın qılıp isledi.

34Taxtaylardı hám qadalardı altın menen qaplap, qadalar ótkeriletuǵın halqalardı altınnan isledi.

35Júnnen iyirilgen qızǵısh kók, shım qızıl, qırmızı jip hám hasıl zıǵır jiplerden bir perde isledi. Onıń ústine kerublardıń súwretlerin sheberlik penen kesteledi. 36Perde ushın akaciya aǵashınan tórt baqan islep, olardı altın menen qapladı. Olardıń ayrı ildirgishleri de altın edi. Baqanlar ushın tórt gúmis ultan quydı. 37Shatırdıń kirer awzına júnnen iyirilgen qızǵısh kók, shım qızıl, qırmızı jip hám hasıl zıǵır jiplerden naǵıslı perde toqıdı. 38Perdeni taǵıw ushın ayrı ildirgishi bar bes baqan islep, olardıń joqarısın hám karnizlerin altın menen qapladı. Al baqanlar ushın qoladan bes ultan isledi.