‏ Exodus 40

Muxaddes shatırdı qurıw

1Jaratqan Iye Muwsaǵa bılay dedi:

2– Muxaddes shatırdı, yaǵnıy Ushırasıw shatırın birinshi aydıń birinshi kúni qur. 3Kelisim sandıǵın shatırdıń ishine kirgizip, onı perde menen tasalap qoy. 4Stoldı ishke ákelip, oǵan tiyisli hámme nárseni onıń ústine qoy. Shıra qoyǵıshtı da ákelip, shıraların ústine qoy. 5Altınnan islengen tútetki tútetiletuǵın orındı Kelisim sandıǵınıń aldına qoyıp, shatırdıń kirer awzına perde taq. 6Qurbanlıq jandırılatuǵın orındı Muxaddes shatırdıń, yaǵnıy Ushırasıw shatırınıń kirer awzınıń aldına qoy. 7Úlken lágendi shatır menen qurbanlıq orınnıń arasına qoyıp, ishine suw quy. 8Shatırdıń átirapın aylandırıp, háwli isle hám háwliniń kirer awzına perde taq.

9Sońınan maylawǵa arnalǵan záytún mayın alıp, shatırdı hám onıń ishindegi barlıq buyımlardı maylap, muxaddes qıl. 10Qurbanlıq jandırılatuǵın orındı hám onıń barlıq buyımların maylap, orındı muxaddes qıl. Sonda orın júdá muxaddes boladı. 11Úlken lágendi hám onıń tuyaqların maylap, muxaddes qıl.

12Xarondı hám onıń ulların Ushırasıw shatırınıń kirer awzınıń aldına ákelip, olardı suw menen juwındır. 13Xaronǵa muxaddes kiyimlerdi kiygiz hám ruwxaniy bolıp, xızmet etiwi ushın, onıń basına may quyıp, Maǵan baǵıshla. 14Onıń ulların alıp kelip, olarǵa uzın kóylek kiygiz. 15Ruwxaniy bolıp, Maǵan xızmet etiwi ushın, olardı da ákesi sıyaqlı mayla. Bul maylaw olardıń áwladlar boyı máńgige ruwxaniy bolıwın támiyinleydi.

16Muwsa hámme nárseni Jaratqan Iyeniń buyırǵanınday qılıp isledi. 17Solay etip, ekinshi jıldıń birinshi ayınıń birinshi kúni Muxaddes shatır qurıldı. 18Muwsa shatırdı qurdı: ultanların qoydı, taxtayların ornattı, qadaların kirgizip, baqanların kótertti. 19Keyin shatırdıń ústine ishki hám sırtqı jabıwların japtı. Muwsa bulardıń hámmesin Jaratqan Iyeniń ózine buyırǵanınday etip isledi.

20Keyin buyrıqlar jazılǵan eki tastı alıp, sandıqqa saldı. Sandıqtıń sırıqların kiygizdi hám sandıqtıń qaqpaǵın sandıqtıń ústine qoydı. 21Kelisim sandıǵın shatırǵa kirgizdi de, perde tutıp, sandıqtı kózden tasalap qoydı. Muwsa hámmesin Jaratqan Iyeniń ózine buyırǵanınday etip isledi.

22Nanlar turatuǵın stoldı Ushırasıw shatırınıń ishine, yaǵnıy shatırdıń arqaǵa qaraǵan tárepine, ishki perdeniń sırtına qoydı. 23Jaratqan Iyeniń aldına, stoldıń ústine nanlardı dizip qoydı. Muwsa bulardı Jaratqan Iyeniń ózine buyırǵanınday etip isledi.

24Shıra qoyǵıshtı Ushırasıw shatırına, stoldıń qarsısına, shatırdıń qubla tárepine qoydı. 25Jaratqan Iyeniń ózine buyırǵanınday, ol Jaratqan Iyeniń aldına shıralardı qoydı.

26Altınnan islengen tútetki tútetiletuǵın orındı Ushırasıw shatırına, perdeniń aldına qoydı. 27Orınnıń ústinde xosh iyisli tútetki tútetti. Muwsa bulardı da Jaratqan Iyeniń ózine buyırǵanınday etip isledi.

28Shatırdıń kirer awzına perde taqtı. 29Qurbanlıq jandırılatuǵın orındı Muxaddes shatırdıń, yaǵnıy Ushırasıw shatırınıń kirer awzınıń aldına qoydı. Orınnıń ústinde jandırılatuǵın qurbanlıq hám ǵálle sadaqasın usındı. Muwsa hámmesin Jaratqan Iyeniń ózine buyırǵanınday etip isledi.

30Úlken lágendi Ushırasıw shatırı menen qurbanlıq orınnıń arasına qoydı hám juwınıw ushın, ishine suw quydı. 31Muwsa, Xaron hám Xaronnıń ulları ayaq-qolların sol jerde juwatuǵın boldı. 32Olar Ushırasıw shatırına kiretuǵın yaki qurbanlıq orınǵa jaqınlasatuǵın waqıtta, Jaratqan Iyeniń buyırǵanınday, sol jerde juwınatuǵın edi.

33Shatırdıń hám qurbanlıq orınnıń átirapındaǵı háwlini perde menen qorshadı hám háwliniń kirer awzına da perde taqtı.

Solay etip, Muwsa jumıstı tamamladı.

Ushırasıw shatırı ústindegi bult

34– 35Sonnan keyin, Ushırasıw shatırın bult qaplap, Jaratqan Iyeniń saltanatı shatırdı toltırdı. Sonıń ushın, Muwsa Ushırasıw shatırına kire almadı. 36Pútkil saparları dawamında izraillılar bult shatırdan joqarı kóterilgende, jolın dawam etetuǵın edi. 37Biraq olar bult joqarı kóterilmegenshe, jolǵa shıqpaytuǵın edi. 38Solay etip, olardıń pútkil saparı dawamında, barlıq Izrail xalqınıń kóz aldında Jaratqan Iyeniń bultı kúndiz shatırdıń ústinde turdı, al túnde bult ishinde ot bolıp janıp turdı.