Exo 34 | KaaIBT22L | STEP | Jaratqan Iye Muwsaǵa bılay dedi: – Burınǵıǵa uqsaǵan eki tas jonıp al. Men usı taslarǵa aldın óziń sındırıp taslaǵan taslardaǵı buyrıqlardı jazaman.

‏ Exodus 34

Muwsanıń buyrıqlardı qaytadan alıwı

(Nzm 10:1-5)

1 Jaratqan Iye Muwsaǵa bılay dedi:

– Burınǵıǵa uqsaǵan eki tas jonıp al. Men usı taslarǵa aldın óziń sındırıp taslaǵan taslardaǵı buyrıqlardı jazaman. 2 Azanǵa deyin tayarlan. Azan bolǵanda, Sinay tawına shıǵıp, tawdıń tóbesinde, Meniń menen ushırasıwǵa aldıma bar. 3 Seniń menen birge basqa hesh kim tawǵa shıqpasın hám tawdıń hesh bir jerinde hesh kim kórinbesin. Tawdıń eteginde mal-janlıqlar da otlamasın.

4 Muwsa burınǵıǵa uqsaǵan eki tas jonıp aldı. Jaratqan Iyeniń buyırǵanınday, erteńine azanda taslardı alıp, Sinay tawına shıqtı. 5 Jaratqan Iye bult ishinde sol jerge túsip, Muwsanıń qasında turdı hám Óziniń «Jaratqan Iye» degen atın járiyaladı. 6 Ol Muwsanıń aldınan ótip:

– Jaratqan Iyemen, Jaratqan Iyemen. Rehimli, miyrimli, sabır-taqatlı, súyispenshiligi ullı hám sadıq Qudayman. 7 Mıńınshı áwladlarǵa deyin súyispenshilik kórsetip, ayıplardı, jınayatlardı hám gúnalardı keshiriwshimen. Biraq hesh bir ayıptı jazasız qaldırmayman. Ata-babalardıń islegen ayıpları ushın, olardıń ulların, aqlıqların, úshinshi hám tórtinshi áwladın jazalayman, – dedi.

8 Sonda Muwsa dárhal jerge jıǵılıp, Jaratqan Iyege sıyındı da:

9 – O, Iyem! Eger men Seniń miyrimińe erisken bolsam, bizler menen birge bar. Bul xalıq – qaysar xalıq bolsa da, Sen bizlerdiń ayıp-gúnalarımızdı keshirip, bizlerdi Óz xalqıń sıpatında qabıl et, – dedi.

Kelisimniń jańalanıwı

(Nzm 7:1-5)

10 Jaratqan Iye Muwsaǵa bılay dedi:

– Mine, seniń xalqıń menen kelisim dúzemen. Olardıń aldında dúnyada hám basqa xalıqlar arasında bolıp kórilmegen káramatlar isleymen. Sen arasında jasap atırǵan pútkil xalıq neler isleytuǵınımdı kóredi. Meniń sen ushın isleytuǵın islerim qorqınıshlı boladı. 11 Búgin sizlerge beretuǵın buyrıqlarıma boysınıńlar. Amor, qanan, xet, periz, xiw hám ebus xalıqların sizlerdiń aldıńızdan quwıp shıǵaraman. 12 Ózlerińiz kiretuǵın eldegi adamlar menen kelisim jasawdan awlaq bolıń. Sebebi bul sizler ushın duzaq boladı. 13 Olardıń qurbanlıq orınların qıyratıp, kiyeli tasların sındırıp taslańlar hám kiyeli aǵashların shawıp taslańlar. 14 Basqa qudaylarǵa sıyınbań. Óytkeni Men qızǵanıwshı degen atı bar Jaratqan Iyemen, qızǵanıwshı Qudayman. 15 Sol jerdiń xalqı menen hesh qanday kelisim dúzbeń. Bolmasa, olar opasızlıq qılıp, óz qudaylarına arnap qurbanlıq shalǵanda, sizlerdi de mirát etedi, sizler de olardan jeysizler. 16 Eger olardıń qızların ullarıńızǵa alıp berseńiz, onda sol qızlar óz qudaylarına erip, buzıqlıq qılǵanda, ullarıńızdı da izlerine ertip ketedi.

17 Ózlerińizge butlardıń músinlerin soǵıp almań.

18 Sizlerge buyırǵanımday, abib ayınıń belgilengen kúnlerinde jeti kún ashıtqısız nan jep, Ashıtqısız nan bayramın bayramlań. Sebebi sizler Mısırdan abib ayında shıqtıńlar.

19 Qarınnan birinshi shıqqanlardıń hámmesi, barlıq iri hám mayda mallarıńızdıń tuńǵısh erkek tólleri Maǵan tiyisli. 20 Eshektiń birinshi tuwılǵan tóliniń ornına bir qozı berip, satıp alıńlar. Eger olay etpeseńiz, gúrreniń moynın sındırıń. Barlıq tuńǵısh ullarıńızdıń qunın ótewińiz tiyis.

Hesh kim aldıma qurı qol kelmesin.

21 Altı kún jumıs islep, jetinshi kúni dem alıń. Egin egiw hám onı orıw waqtında da dem alıń.

22 Biydaydıń birinshi ónimin jıynaǵanda, Hápteler bayramın ^{▼▼ Hápteler bayramı – Zúráát bayramınıń basqa atı. 23:16 qarań.}, al gúzde Jıyın-terim bayramın ótkiziń. 23 Barlıq erkeklerińiz jılına úsh márte Iyeń bolǵan Meniń, yaǵnıy Izraildıń Qudayı Jaratqan Iyeniń aldına keliwi kerek. 24 Men basqa milletlerdi aldıńızdan quwıp jiberip, shegaralarıńızdı keńeytemen. Jılına úsh ret Qudayıńız Jaratqan Iyeniń aldına kelgenińizde, hesh kim jerińizdi basıp alıwdı niyet etpeydi.

25 Maǵan berilgen qurbanlıqtıń qanın ashıtqı salınǵan nan menen usınbań. Qutqarılıw bayramınıń qurbanlıǵı azanǵa deyin qaldırılmasın.

26 Jerińizdiń dáslepki óniminiń eń jaqsısın Qudayıńız Jaratqan Iyeniń Úyine alıp keliń.

Ílaqtıń góshin óz anasınıń sútine pisirmeń.

27 Sonnan soń, Jaratqan Iye Muwsaǵa:

– Mına sózlerdi jaz. Sebebi Men seniń menen hám izraillılar menen usı sózlerge tiykarlanıp, kelisim dúzemen, – dedi.

28 Muwsa sol jerde qırıq kún, qırıq tún Jaratqan Iye menen birge boldı. Ol hesh nárse iship-jemedi hám kelisim sózlerin, yaǵnıy on buyrıqtı taslarǵa jazdı.

Muwsanıń Sinay tawınan túsiwi

29 Muwsa qolına buyrıqlar jazılǵan eki tastı alıp, Sinay tawınan tústi. Ol Jaratqan Iye menen sóyleskenlikten, júzinen nur shashıp tur edi. Biraq bunı ózi bilmedi. 30 Xaron hám pútkil izraillılar Muwsanıń nur shashqan júzin kórgende, oǵan jaqınlasıwǵa qorqtı. 31 Biraq Muwsa olardı qasına shaqırdı. Xaron hám jámiyettiń barlıq basshıları onıń janına keldi. Muwsa olar menen sóylesti. 32 Keyin pútkil Izrail xalqı oǵan jaqın keldi. Muwsa Jaratqan Iyeniń Sinay tawında ózine aytqanlarınıń hámmesin orınlawdı xalıqqa buyırdı. 33 Muwsa olar menen sóylesip bolǵannan soń, júzin jawlıq penen jawdı. 34 Muwsa sóylesiw ushın, Jaratqan Iyeniń aldına barǵanda, sırtqa shıqqansha, júzindegi jawlıqtı alıp qoyatuǵın edi. Qaytıp kelgennen keyin, ol ózine aytılǵan buyrıqlardı izraillılarǵa bildiretuǵın edi. 35 Sonda izraillılar onıń júzinen nur shashıp turǵanın kóretuǵın edi. Al Muwsa ishke kirip, Jaratqan Iye menen ushırasıwǵa deyin, júzin jawlıq penen jawıp qoyatuǵın edi.