‏ Ezekiel 1

Ezekiel kórgen birinshi ayan

1Otızınshı jıldıń tórtinshi ayınıń besinshi kúni edi. Men Kebar kanalınıń boyında súrgin etilgenlerdiń arasında turǵanımda, aspan ashıldı hám maǵan Qudaydan ayanlar kórine basladı. 2Aydıń besinshi kúni, yaǵnıy Ehoyakin patshanıń súrgindegi waqtınıń besinshi jılında, 3kaldeylerdiń jerindegi Kebar kanalı boyında maǵan, Buziy ulı ruwxaniy Ezekielge Qudaydan sóz tústi. Ol jerde Jaratqan Iyeniń qolı meniń ústimde edi.

4Qarap, arqadan kúshli quyınnıń kiyatırǵanın kórdim. Ol ot shashqan hám nur menen qaplanǵan úlken bult edi. Ottıń ortasında mıs sıyaqlı bir nárse jaltırap turdı. 5Ot ortasında kórinisi insanǵa uqsaǵan tórt tiri janzattıń turǵanın kórdim. 6Olardıń hár biriniń tórt bet-álpeti hám tórt qanatı bar edi. 7Ayaqları dúziw, al tabanları tananikine uqsaǵan bolıp, jıltıraǵan qoladay sáwle shashıp turdı. 8Tórt qaptalındaǵı qanatlarınıń astında adamnıń qolları bar edi. Olardıń bet-álpeti hám qanatları tórt qaptalında bolıp, 9qanatları bir-birine tiyip turdı. Janzatlar júrgende, burılmay, tuwrı alǵa qaray háreketlendi.

10Olardıń bet-álpetiniń kórinisi mınaday edi: tórtewiniń de aldınǵı bet-álpeti – adamdiki, oń jaǵındaǵısı – arıslandiki, shep jaǵındaǵısı – buǵaniki hám artındaǵısı – búrkittiki edi. 11Olardıń bet-álpeti usınday edi. Qanatları bolsa, joqarıǵa qaray jayılıp turdı. Hár janzattıń qanatlarınıń ekewi qasındaǵı janzatlardıń qanatlarına tiyip tursa, basqa eki qanatı óz denesin jawıp turdı. 12Olar tek aldıǵa qaray háreketlendi. Hesh jaqqa burılmay, ruwx qay jaqqa baǵdarlasa, sol jaqqa qaray júrdi. 13Janzatlardıń kórinisi janıp turǵan kómir shoǵına yamasa jalańlaǵan otqa megzer edi. Ot janzatlardıń ortasında tınımsız háreket eter edi. Ot jalın shashıp, onnan shaqmaq shaǵıp turdı. 14Janzatlardıń ózleri de jıldırımday tez ol jaqtan bul jaqqa barıp keler edi.

15Men janzatlarǵa ser salǵanımda, jerde, hár biriniń janında, bir dóńgelekten turǵanın kórdim. 16Tórt dóńgelektiń kórinisi menen dúzilisi birdey bolıp, sarı yaqıt kibi jaltırap turdı. Olardıń kórinisi hám dúzilisi dóńgelektiń ishine kesesine dóńgelek salınǵanday edi. 17Janzatlar qay tárepke baǵıt alsa da, dóńgelekler burılmay-aq tórt tárepke de jıljıy alatuǵın edi. 18Dóńgeleklerdiń sheńberleri bálent hám qorqınıshlı edi. Tórtewiniń de sheńberi aylana kózler menen qaplanǵan edi.

19Janzatlar qozǵalǵanda, olardıń janındaǵı dóńgelekler de háreketke keletuǵın edi. Jerden kóterilgende, dóńgelekler de kóteriletuǵın edi. 20Ruwx qayaqqa baǵıt alsa, olar da sol jaqqa baratuǵın, dóńgelekler de olar menen birge kóteriletuǵın edi. Sebebi janzatlardıń ruwxı dóńgeleklerdi de háreketke keltiretuǵın edi. 21Janzatlar qozǵalǵanda, dóńgelekler de qozǵalatuǵın, janzatlar toqtaǵanda, dóńgelekler de toqtaytuǵın, janzatlar jer betinen kóterilgende, dóńgelekler de olar menen birge kóteriletuǵın edi. Óytkeni janzatlardıń ruwxı dóńgeleklerdi de háreketke keltirip turdı.

22Janzatlardıń basınıń ústinde gúmbezge uqsaǵan, kristallday jaltıraǵan hám qorqınıshlı bir nárse jayılıp turǵan edi. 23Janzatlardıń gúmbez astında jayǵan qanatları bir-birine qaray sozılıp turdı. Olardıń hár biriniń denesin jawıp turǵan basqa eki qanatı da bar edi. 24Janzatlar qozǵalǵanda, qanatlarınıń shuwıldısın esittim. Ol kúshli suwlardıń shuwıldısına, Qúdireti kúshli Qudaydıń dawısına, sawash maydanındaǵı láshkerlerdiń shawqımına uqsar edi. Janzatlar toqtaǵanda, qanatların túsirip otırdı. 25Olar toqtap, qanatların túsirip otırǵanda, gúmbez tárizli keńisliktiń joqarısınan bir dawıstı esittim. 26Gúmbezdiń ústinde lazuritten islengen taxtqa uqsaǵan bir nárse bar edi. Onda insan kórinisinde birew otırǵan edi. 27Onıń belinen joqarısınıń ishi otqa tolıp, jaltıldaǵan mıstay bolıp turǵanın kórdim. Belinen tómeniniń bolsa, otqa megzes ekenin kórdim. Onı jarqıraǵan nur qaplap turǵan edi. 28Onıń átirapındaǵı nur jawınlı kúni bultta payda bolatuǵın ayqulaqqa uqsar edi. Bul kórinis Jaratqan Iyeniń saltanatınıń kórinisi edi.

Bunı kórgende, et betimnen jıǵıldım hám birewdiń sóylegen dawısın esittim.