Eze 10 | KaaIBT22L | STEP | Men kerublardıń ústi betindegi gúmbezdiń joqarısında lazuritten islengen taxtqa uqsaǵan bir nárseni kórdim.

‏ Ezekiel 10

Qudaydıń saltanatınıń Ibadatxananı tárk etiwi

1 Men kerublardıń ústi betindegi gúmbezdiń joqarısında lazuritten islengen taxtqa uqsaǵan bir nárseni kórdim. 2 Jaratqan Iye zıǵır kiyimli adamǵa:

– Kerublar astındaǵı dóńgelekler arasına kir. Kerublar arasında janıp turǵan kómirden bir qosuwıs alıp, onı qalaǵa shash, – dedi.

Ol adam dóńgelekler arasına kirdi, men kórip turdım. 3 Ol adam kirgende, kerublar Ibadatxananıń qubla tárepinde turǵan edi. Ishki háwli bultqa toldı. 4 Jaratqan Iyeniń saltanatı kerublardan ayırılıp, Ibadatxananıń bosaǵasına kelip turdı. Ibadatxana bultqa toldı, al háwli Jaratqan Iyeniń saltanatınıń nurına toldı. 5 Kerublardıń qanatlarınıń dawısı Qúdireti kúshli Qudaydıń sóylegendegi dawısına uqsap, sırtqı háwliden esitilip turdı.

6 Jaratqan Iye zıǵır kiyimli adamǵa: «Dóńgeleklerdiń arasınan, kerublardıń arasınan ot alıp shıq», – dep buyrıq bergende, adam kirip, dóńgelektiń arasında turdı. 7 Sonda kerublardıń biri ózleriniń janındaǵı otqa qolın sozıp, biraz ot alıp zıǵır kiyim kiygen adamnıń alaqanına saldı. Adam ottı alıp, ol jerden shıqtı. 8 Kerublardıń qanatları astında adamnıń qolına uqsaǵan nárse kórindi.

9 Qaraǵanımda, kerublardıń janında tórt dóńgelekti kórdim. Hár bir kerubtıń janında bir dóńgelekten bolıp, dóńgelekler sarı yaqıt kibi jaltıldar edi. 10 Olardıń tórtewiniń de kórinisi birdey bolıp, hár dóńgelektiń ishinde kesesine salınǵan jáne bir dóńgelekten bar edi. 11 Olar qozǵalǵanda, tórt tárepke de háreket ete alatuǵın edi. Bas qay jaqqa baǵıtlansa, olar burılmastan, sol jaqqa júrdi. Júrgende olar hesh jaqqa burılmadı. 12 Olardıń pútkil denesi, arqası, qolları, qanatları hám dóńgelekleri, barlıq tórt dóńgelegi de kózler menen qaplanǵan edi. 13 Dóńgeleklerdiń «quyın» dep aytılatuǵının esitip qaldım. 14 Olardıń hár biriniń tórt bet-álpeti bar edi: birinshi bet-álpeti – kerubtiki, ekinshisi – adamdiki, úshinshisi – arıslandiki, tórtinshisi – búrkittiki edi.

15 Kerublar kóterildi. Olar meniń Kebar kanalı boyında kórgen janzatlarım edi. 16 Kerublar júrgende, janındaǵı dóńgelekler de júretuǵın edi. Kerublar jerden kóteriliw ushın qanatların jayǵanda, dóńgelekler de olardan ayırılmay júrdi. 17 Janzatlardıń ruwxı dóńgeleklerde bolǵanlıqtan, olar toqtaǵanda, dóńgelekler de toqtaytuǵın, olar kóterilgende, dóńgelekler de kóteriletuǵın edi.

18 Jaratqan Iyeniń saltanatı Ibadatxananıń bosaǵasınan ketip, kerublardıń ústinde turdı. 19 Kerublar qanatların qaǵıp, meniń kóz aldımda jerden kóterildi. Dóńgelekler de olar menen birge kóterilip, Jaratqan Iyeniń Úyiniń shıǵıs dárwazasınıń kirer awzında toqtadı. Izraildıń Qudayınıń saltanatı olardıń ústinde edi.

20 Bul janzatlardı men Kebar kanalı boyında, Izraildıń Qudayınıń tómengi jaǵında kórgen edim. Men olardıń kerublar ekenin endi bildim. 21 Hár bir kerubtıń tórt bet-álpeti, tórt qanatı hám qanatlarınıń astında adam qolına uqsaǵan qolları bar edi. 22 Olardıń bet-álpeti de, kórinisi de, ózleri de men sol Kebar kanalı boyında kórgenlerime uqsaytuǵın edi. Hár biri tuppa-tuwrı aldıǵa qaray júretuǵın edi.