‏ Ezekiel 11

Izraildıń jetekshileriniń jazalanıwı

1Ruwx meni kóterip, Jaratqan Iyeniń Úyiniń shıǵıs dárwazasına alıp keldi. Dárwazanıń kirer awzında jigirma bes adam bar edi. Olardıń arasında men xalıq jetekshilerinen Azzur ulı Yazaniyanı, Benaya ulı Pelatiyanı kórdim.

2Jaratqan Iye maǵan:

– Insan ulı! Jawız niyetli mına adamlar qaladaǵılarǵa jaman keńes berip: 3«Úy salatuǵın waqıt ele kelmedi. Bul qala – qazan, al bizler – onıń ishindegi góshpiz», – dep júr. 4Sonlıqtan olarǵa qarsı payǵambarshılıq et, payǵambarshılıq et, insan ulı!

5Sońınan Jaratqan Iyeniń Ruwxı ústime túsip, maǵan mınalardı aytıwdı buyırdı: «Jaratqan Iye bılay deydi: Izrail xalqı, sizlerdiń ne aytqanıńızdı hám ne oylaǵanıńızdı Men bilemen. 6Sizler bul qalada kóp adamlardı óltirip, kóshelerin óli denelerge toltırdıńız.

7Sonlıqtan Quday Iye bılay deydi: Sizler qalada qaldırǵan óliler – gósh, al qala – qazan boladı. Biraq ózlerińizdi bul qaladan quwıp shıǵaraman. 8Sizler qılıshtan qorqasız, Men sizlerge qılısh jawdıraman, – deydi Quday Iye. 9– Sizlerdi qaladan quwıp shıǵarıp, ózlerińizdi basqalardıń qolına tapsıraman hám ústińizden húkim shıǵaraman. 10Sizler qılıshtan qırılasız, sizlerdi Izrail shegaraları ishinde húkim qılaman. Sonda Meniń Jaratqan Iye ekenimdi bilip alasız. 11Qala sizlerge hesh qashan qazan, al sizler onıń ishindegi gósh bolmaysızlar. Sizlerdi Izrail shegaraları ishinde húkim etemen. 12Sonda Meniń Jaratqan Iye ekenimdi bilip alasız. Sizler Meniń qaǵıydalarıma ámel qılmadıńız, nızamlarıma boysınbadıńız. Kerisinshe, aynalańızdaǵı xalıqlardıń ádetlerine say jasadıńız».

13Men payǵambarshılıq qılıp atırǵanımda, Benaya ulı Pelatiya jan tapsırdı. Men et betimnen jerge jıǵılıp:

– Ah, Quday Iye, Izraildıń aman qalǵanların tolıq qırıp taslamaqshımısań? – dep dawıslap jiberdim.

14Maǵan Jaratqan Iyeden sóz tústi:

15– Insan ulı! Tuwısqanlarıń, qanlaslarıń hám pútkil Izrail xalqı tuwralı Erusalim turǵınları bılay dep aytpaqta: «Jaratqan Iyeden awlaq jasań, bul jer bizlerge múlik qılıp berildi». 16Sonlıqtan súrginde bolǵanlarǵa ayt: «Quday Iye bılay deydi: Men olardı uzaqtaǵı milletler arasına jiberip, jer boylap tarqatqan bolsam da, olar barǵan jerlerinde Maǵan sıyınadı, biraq muxaddes orın bolmaydı».

17– Keyin olarǵa ayt: «Quday Iye bılay deydi: Men sizlerdi xalıqlar arasınan jıynap alaman, tarqap ketken jerlerińizden qaytaraman hám sizlerge Izrail jerin beremen». 18Xalqım qaytıp kelgende, barlıq jerkenishli hám haram nárselerdi ol jerden alıp taslaydı. 19Olarǵa bir tutas júrek berip, jańa ruwx sıylayman. Denesinen tas júrekti alıp taslap, jumsaq júrek beremen. 20Sonda olar qaǵıydalarıma ámel qılıp, nızamlarıma boysınıp, olardı orınlap jasaydı. Olar Meniń xalqım, Men olardıń Qudayı bolaman. 21Al júrekleri jerkenishli hám haramı islerge qumar adamlardı islerine jarasa jazalayman, – deydi Quday Iye.

22Keyin kerublar qanatların jaydı, dóńgelekler de olardıń janında edi. Izraildıń Qudayınıń saltanatı olardıń ústinde edi. 23Jaratqan Iyeniń saltanatı qalanıń ishinen kóterilip, qala shıǵısındaǵı tawdıń ústinde toqtadı. 24Qudaydıń Ruwxı arqalı kórgen ayanda Ruwx meni kóterip, kaldeylerdiń elindegi súrgin etilgenlerdiń arasına alıp keldi. Keyin men kórgen ayan meni tárk etti. 25Men Jaratqan Iyeniń ayan qılǵanlarınıń hámmesin súrgindegilerge aytıp berdim.