‏ Ezekiel 12

Yahudanıń súrgin etiliwiniń belgisi

1Maǵan Jaratqan Iyeden sóz tústi:

2– Insan ulı! Sen qozǵalańshı xalıq arasında jasap atırsań. Olardıń kóriwge kózi bar, biraq kórmeydi, esitiwge qulaǵı bar, biraq esitpeydi. Óytkeni olar qozǵalańshı xalıq. 3Sen, insan ulı, súrgin qılınǵan adam kibi zatlarıńdı tayarlap, kúndiz olardıń kóz aldında jolǵa shıq. Olardıń kóz aldında óz ornıńnan basqa jerge kósh. Olar qozǵalańshı xalıq bolsa da, bálkim, túsiner. 4Kóshiwge kerek nárselerińdi kúndiz sırtqa shıǵarıp qoy, al óziń, olardıń kóz aldında súrgin qılınǵan adam kibi keshte jolǵa shıq. 5Diywaldı tesip, túyinshigińdi sol tesikten alıp shıq. 6Gewgim túskende, olardıń kózinshe túyinshikti jelkeńe salıp, jolǵa shıq. Tárk etip atırǵan jerdi kórmew ushın júzińdi jawıp al. Sebebi Men seni Izrail xalqı ushın bir belgi qıldım.

7Men buyırılǵanlardı isledim. Súrginge kerek nárselerdey etip, zatlarımdı kúndiz shıǵarıp qoydım. Keshte diywaldı qolım menen oydım. Gewgim túskende, túyinshigimdi shıǵarıp, adamlardıń kóz aldında onı jelkeme saldım.

8Azanda maǵan Jaratqan Iyeden sóz tústi:

9– Insan ulı! Bul qozǵalańshı Izrail xalqı sennen ne qılıp atırǵanıńdı soramadı ma? 10Olarǵa Quday Iye bılay deydi dep ayt: «Bul Erusalimdegi húkimdarǵa hám ol jerde jasap atırǵan pútkil Izrail xalqına tiyisli xabar». 11Izrail xalqına ayt: «Men sizler ushın belgimen. Men ne qılǵan bolsam, Erusalimdegilerge de sol boladı. Olar tutqın qılınıp, súrginge alıp ketiledi». 12Arasındaǵı húkimdarı da qarańǵılıqta zatların iynine artıp, jolǵa túsedi. Diywal arqalı shıǵıw ushın onı tesedi, tárk etilip atırǵan bul jerdi kórmew ushın betin jawıp aladı. 13Men onıń ústine torımdı taslayman, ol duzaǵıma túsedi. Onı Babilonǵa, kaldeylerdiń jerine alıp baraman. Biraq ol Babilondı kórmeydi hám sol jerde jan tapsıradı. 14Onıń dógeregindegilerdiń hámmesin, barlıq járdemshilerin hám barlıq láshkerlerin hár tárepke tarqatıp jiberemen hám qılısh jalańashlap izinen quwaman. 15Olardı milletler arasına tarqatıp, ózge jurtlarǵa shashıp jibergenimde, olar Meniń Jaratqan Iye ekenimdi bilip aladı. 16Barǵan jerlerinde ózleriniń jerkenishli isleri tuwralı aytıp beriwi ushın, olardıń ayırımların qılıshtan, ashlıqtan hám illetten aman saqlap qalaman. Sonda olar Meniń Jaratqan Iye ekenimdi bilip aladı.

17Jaratqan Iyeden maǵan sóz tústi:

18– Insan ulı, jegenińde titire, ishkenińde qorqıwdan qaltıra. 19Eldegi adamlarǵa mınalardı ayt: «Erusalim turǵınları hám Izrail xalqı tuwralı Quday Iye bılay deydi: Olar nanın qorqıw menen jep, suwın ǵulǵılaǵa túsip otırıp ishetuǵın boladı. Óytkeni eldiń turǵınlarınıń jawızlıqları kesirinen jer barı-joǵınan ayırıladı. 20Qonıslı qalalar wayran bolıp, el qańırap bos qaladı. Sonda olar Meniń Jaratqan Iye ekenimdi bilip aladı».

Aytılǵan sóz sózsiz orınlanadı

21Maǵan Jaratqan Iyeden sóz tústi:

22– Insan ulı! Sizlerde, Izrail jerinde: «Kúnler óter, barlıq payǵambarshılıq sózler pushqa shıǵar», – dep aytılıp júrgeni ne naqıl ózi? 23Olarǵa Quday Iye bılay deydi dep ayt: «Men bul naqıldı joq qılaman, qaytıp Izrailda bunı hesh kim aytpaytuǵın boladı». Olarǵa: «Barlıq payǵambarshılıq ayanlar orınlanatuǵın kúnler jaqınlaspaqta», – dep ayt. 24«Endi Izrail xalqında jalǵan payǵambarshılıq hám aldamshı boljawlar bolmaydı. 25Men, Jaratqan Iye ne aytsam da orınlanadı, endi keshikpeydi. Qozǵalańshı xalıq, sizlerdiń kúnlerińizde Men sóz aytaman hám onı ámelge asıraman, – deydi Quday Iye».

26Quday Iyeden maǵan sóz tústi:

27– Insan ulı! Izraillılar: «Onıń kórgen ayanları kóp waqıttan keyin orınlanadı, ol tek ǵana uzaq keleshek haqqında payǵambarshılıq qıladı», – dep aytpaqta. 28Sonlıqtan olarǵa Quday Iye bılay deydi dep ayt: «Aytqan sózlerimniń birde birewi endi keshiktirilmeydi. Ne aytqan bolsam, hámmesi orınlanadı, – deydi Quday Iye».