Eze 13 | KaaIBT22L | STEP | Maǵan Jaratqan Iyeden sóz tústi:

‏ Ezekiel 13

Jalǵan payǵambarlardıń jazalanıwı

1 Maǵan Jaratqan Iyeden sóz tústi:

2 – Insan ulı, házir payǵambarshılıq qılıp atırǵan Izrail payǵambarları menen sóyles. Ózliginen payǵambarshılıq qılıp atırǵanlarǵa ayt: «Jaratqan Iyeniń sózin tıńlań! 3 Quday Iye bılay deydi: Hesh nárse kórmey, ayanlardı ózleri qıyalınan shıǵarıp júrgen aqılsız payǵambarlardıń sorı qurısın! 4 Izrail, seniń payǵambarlarıń qarabaqanalar arasındaǵı saǵallarǵa uqsaydı. 5 Jaratqan Iyeniń kúni kelgende, Izrail xalqı sawashta bekkem turıwı ushın, olar diywallarǵa shıǵıp, olardıń opırılǵan jerlerin dúzetpedi. 6 Olardıń ayanları ótirik, ashqan palları jalǵan. Olardı Jaratqan Iye jibermegen bolsa da: „Jaratqan Iye usılay aytadı“, – dep járiyalaydı hám sol sózlerdiń orınlanıwın kútedi. 7 Men aytpaǵan bolsam da: „Bunı Jaratqan Iye aytadı“, – degenińizde, jalǵan ayanlar kórip, ótirik boljawlardı aytpadıńız ba?

8 Sonlıqtan Quday Iye bılay deydi: Sizlerdiń sózlerińiz ótirik hám ayanlarıńız jalǵan. Bunıń ushın Men sizlerge qarsı shıǵaman, – deydi Quday Iye. 9 – Jalǵan ayanlar kórip, ótirik boljawlar aytatuǵın payǵambarlarǵa qarsı qolımdı kóteremen. Olar Meniń xalqımnıń keńesinde qatnaspaydı, Izrail xalqınıń dizimine tirkelmeydi hám Izrail jerine kirmeydi. Sonda sizler Meniń Quday Iye ekenimdi bilesiz.

10 Sebebi bul payǵambarlar tınıshlıq bolmaytuǵın bolsa da, tınıshlıq bolatuǵının aytıp, Meniń xalqımdı azǵırdı. Olar hálsiz diywaldı háklegendey qıldı. 11 Olardı háklep atırǵanlarǵa diywaldıń qulaytuǵının ayt. Nóser jawın quyıp, úlken burshaq jawıp, kúshli dawıl kóteriledi. 12 Diywal qulaǵanda, adamlar jaqqan hágińizdiń qayaqta ekenin soramay ma?

13 Endi Quday Iye bılay demekte: Men ǵázeplenip, kúshli dawıl turǵızaman, qáhárim menen nóser hám burshaq jawdırıp, diywaldı opat qılaman. 14 Sizler háklegen diywaldı qulatıp, jer menen jeksen etemen, onıń túbi kórinip qaladı. Diywal qulaǵanda, sizler astında qalıp, nabıt bolasız. Sonda Meniń Jaratqan Iye ekenimdi bilip alasız. 15 Men diywalǵa hám onı háklegenlerge ǵázebimdi tolıq shashıp, sizlerge: „Diywal da, onı háklegenler de joq boldı, 16 yaǵnıy Erusalimde tınıshlıq bolmaytuǵın waqıtta tınıshlıqtıń keletuǵının aytıp, payǵambarshılıq qılǵan Izraildıń payǵambarları joq boldı“, – deymen, – deydi Quday Iye».

17 – Al endi, insan ulı, ózinshe payǵambarshılıq etip júrgen xalqıńnıń hayal-qızlarına júzińdi bur da, olarǵa qarsı payǵambarshılıq qıl. 18 Olarǵa Quday Iye bılay deydi dep ayt: «Hár bir adamnıń janın awlap, olardıń qollarına tumar taqqan hám adamlardıń basına túrli ólshemdegi japqısh tikken hayallardıń sorı qurıydı! Xalqımnıń janına qaslıq qılıp, óz janımdı saqlap qalaman dep oylaysız ba? 19 Bir neshe uwıs arpa hám bir neshe tislem nan ushın, xalqımnıń aldında Meni xorladıńız. Jalǵanǵa háwes bolǵan xalqıma ótirik sóylep, óliwge tiyisli bolmaǵan adamdı óltirdińiz, óliwi kerek adamnıń janın aman saqlap qaldıńız.

20 Sonlıqtan Quday Iye bılay deydi: Men sizlerdiń adam janın qus kibi awlap atırǵan tumarlarıńızǵa qarsıman. Olardı qollarıńızdan julıp alaman, qus kibi awlaǵan janlarıńızdı azat qılaman. 21 Japqıshlarıńızdı da jırtıp, xalqımdı qolıńızdan qutqaraman. Olar endi sizlerge olja bolmaydı. Sonda sizler Meniń Jaratqan Iye ekenimdi bilip alasız. 22 Men haq adamǵa zıyan keltirmekshi bolmasam da, sizler ótirik penen onı úmitsizlendirdińiz. Sizler nahaq adamdı qollap quwatladıńız. Sonlıqtan olar jaman jolınan qaytpadı hám janın saqlap qala almadı. 23 Sol sebepli endi sizler jalǵan ayanlar kórmeysiz hám pal ashpaysız. Men xalqımdı sizlerdiń qolıńızdan qutqaraman. Sonda Meniń Jaratqan Iye ekenimdi bilip alasız».