Eze 14 | KaaIBT22L | STEP | Izrail aqsaqallarınıń bazıları kelip, qarsı aldıma otırdı.

‏ Ezekiel 14

Quday butparazlıqtı jazalaydı

1 Izrail aqsaqallarınıń bazıları kelip, qarsı aldıma otırdı. 2 Sonda Maǵan Jaratqan Iyeden sóz tústi:

3 – Insan ulı, mına adamlar óz butların júrek tórine jaylap, azǵırıwshını ózleriniń aldına qoydı. Solay eken, Mennen másláhát sorawına qalay jol qoyaman? 4 Sonlıqtan olar menen sóylesip, olarǵa ayt: «Quday Iye bılay deydi: Óz butların júrek tórine jaylap, azǵırıwshını ózleriniń aldına qoyǵan Izrail xalqınan bir adam payǵambardıń aldına kelse, Men, Jaratqan Iye oǵan butlarınıń kópligine jarasa juwap beremen. 5 Solay etip, butları sebepli Maǵan jat bolǵan Izrail xalqınıń júregin Ózime qarataman».

6 – Sonlıqtan Izrail xalqına ayt: «Quday Iye bılay deydi: Táwbe qılıń, butlarıńızdan waz keshiń hám pútkil jerkenishli zatlarıńızdan júz burıń. 7 Eger Izrail xalqınan bolǵan birew yamasa Izrailda jasap atırǵan kelgindilerden biri Meni tárk etse, óz butların júrek tórine jaylap, azǵırıwshını óziniń aldına qoysa hám Mennen másláhát soraw ushın payǵambarǵa kelse, onda Men, Jaratqan Iye, oǵan Óz juwabımdı beremen. 8 Men sol adamǵa qarsı shıǵaman, onı eskertiwshi mısalǵa hám ápsanaǵa aylandıraman, onı xalqımnıń arasınan joq qılaman. Sonda Meniń Jaratqan Iye ekenimdi bilip alasız.

9 Eger payǵambar joldan azıp, bir sóz aytsa, onda sol payǵambardı Men, Jaratqan Iye azǵırǵan bolaman. Men oǵan qarsı qolımdı kóterip, xalqım Izraildıń arasınan joq qılaman. 10 Payǵambar da, onnan másláhát sorap kelgen de jazasın aladı. Ekewi birdey ayıplı. 11 Sonda Izrail xalqı basqa Mennen ayırılmaydı hám gúnaları menen ózlerin haramlamaydı. Olar Meniń xalqım, Men olardıń Qudayı bolaman, – deydi Quday Iye».

12 Maǵan Jaratqan Iyeden sóz tústi:

13 – Insan ulı, eger bir el qıyanet etip, Maǵan qarsı gúna islese, Men oǵan qarsı qolımdı kóteremen, olardı bir tislem nanǵa zar qılıp, ashlıqqa duwshar qılaman. Eldegi adam hám haywanlardı qırıp taslayman. 14 Eger mına úsh adam: Nux, Daniel hám Ayup sol jerde bolǵanda da, olar haqlıǵı menen tek ózleriniń janların ǵana qutqarıp qalǵan bolar edi, – deydi Quday Iye. 15 – Eger Men sol jerge jırtqısh haywanlardı jibersem, olar sol jerdi adamsız qılsa hám sol jer jırtqıshlar sebepli bosap, adam ayaq baspaytuǵın bolıp qalsa, 16 sonda usı úsh adam olardıń arasında bolsa, Men Quday Iye, tiriligim haqı ant ishemen: olar ózlerinen basqa hesh kimdi, hátte, ulların da, qızların da qutqara almas edi. Jer bolsa qańırap bos qalar edi. 17 Yamasa, Men sol jerge qılısh jiberip: «Qılısh, el boylap ót!» – desem hám ondaǵı adamlar menen haywanlardı qırsam, 18 sonda usı úsh adam olardıń arasında bolsa, Men Quday Iye, tiriligim haqı ant ishemen: olar ózlerinen basqa hesh kimdi, hátte, ulların da, qızların da qutqara almas edi. 19 Bolmasa, Men bul elge illet jibersem, yamasa qan tógiw ushın ǵázebimdi tógip, adamlardı hám haywanlardı qırıp taslasam, 20 Men Quday Iye, tiriligim haqı ant ishemen: Nux, Daniel hám Ayup olardıń arasında bolsa da, olar ulların da, qızların da qutqara almas edi. Tek haqlıǵı menen ózleriniń janın ǵana qutqara alar edi.

21 Al endi Quday Iye bılay deydi: Erusalimdegi adamlardı hám haywanlardı joq qılıw ushın, olarǵa bunnan da beter tórt awır jazanı: qılısh, ashlıq, jırtqısh haywanlar hám illet jiberemen. 22 Degen menen ayırım adamlar aman qaladı. Aman qalǵan erkek hám hayallar ol jerden shıǵıp, Babiloniyaǵa, aldıńızǵa keledi. Sizler olardıń júris-turısın hám islerin kórgenińizde, Men Erusalimge nege usınday apatlardı jibergenimdi túsinip, olardıń basına salǵan hámme nárseden táselle tabasız. 23 Awa, olardıń júris-turısın hám islerin kórip táselle tabasız. Sizler Meniń Erusalimde islegen barlıq islerimniń qurıdan-qurı islenbegenin bilesiz, – deydi Quday Iye.